កំពង់ឆ្នាំង ៖ លោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង និងជាប្រធានគណៈកម្មការចម្រុះថ្នាក់ខេត្តនៅព្រឹកថ្ងៃទី១៩ ខែតុលា ឆ្នាំ២០១៥មានការចូលរួមពីលោក ម៉ម ឈឿម លោកឡុច វណ្ណរ៉ា ជាសមាជិកក្រុមចម្រុះបានចុះដោះស្រាយបញ្ហាទំនាស់កន្លែងលក់ដូរ រវាងអាជីវករ និងអាជីវករ២នាក់បានជោគជ័យ។
ក្រោយពីគណៈកម្មការចម្រុះចុះវាស់វែង និងអនុវត្តតាមគម្រោងរៀបចំសណ្ដាប់ធ្នាប់លក់ដូរជុំវិញផ្សារលើមានរយៈពេល៣ថ្ងៃគឺ ចាប់ពីថ្ងៃទី១៧ ខែតុលា ដល់ថ្ងៃទី១៩ ខែតុលា ឆ្នាំ២០១៥មក មានអាជីវករ២នាក់ ១.លោក ស្រី ឌឿន លក់សាច់ជ្រូក និង២លោកយាយ ហឹង សុទ្ធី លក់ស្លាម្លូបានដណ្ដើមទីតាំងគ្នាថា ពួកគាត់បានកាន់កាប់តាំងរសៀលថ្ងៃទី១៨ ខែតុលា ឆ្នាំ២០១៥មក។ ដោយមើលឃើញការទំនាស់នេះនៅព្រឹកថ្ងៃទី១៩ ខែតុលា ឆ្នាំ២០១៥ លោក ស៊ុន សុវណ្ណារិទ្ធិ ប្រធានគណៈកម្មការចម្រុះបានសម្របសម្រួលឲ្យគូរទំនាស់ទាំង២លក់នៅកន្លែងតែមួយដោយឲ្យម្នាក់លក់នៅខាងមុខ និងម្នាក់ទៀតលក់នៅខាងក្រោយទល់ខ្នងគ្នា បន្ទាប់ពីការសម្របសម្រួលពីប្រធានគណៈកម្មការចម្រុះខេត្ត លោកស្រីឌឿន និងលោកយាយ ហឹង សុទ្ធី បានឯកភាពគ្នាទទួលយកតាមការសម្របសម្រួលរបស់លោក ស៊ុន សុវណ្ណារិទ្ធិ បន្តលក់ដូរទាំងអស់គ្នារហូតដល់ថ្ងៃគណៈកម្មការចម្រុះខេត្តរៀបចំឲ្យអាជីវករទាំងអស់ចាប់ឆ្នោតដោយតម្លាភាព និងតាមលទ្ធិប្រជាធិបតេយ្យជ្រើសរើសយកកន្លែងលក់ដូរនៅពេលក្រោយ។
លោក ស៊ុន សុវណ្ណរិទ្ធ អភិបាលរងខេត្ត និងជាប្រធានគណៈកម្មការចម្រុះខេត្ត សូមអំពាវនាវដល់អាជីវករទាំងអស់ដែលលក់ដូរនៅសងខាងផ្សារលើក្រុងកំពង់ឆ្នាំង សូមធ្វើការសហការចូលរួមជាមួយគណៈកម្មការចម្រុះខេត្ត ដើម្បីឲ្យបងប្អូនអាជីវករឆាប់បានកន្លែងលក់ដូរត្រឹមត្រូវដែលមានសណ្ដាប់ធ្នាប់ សោភ័ណភាព និងអនាម័យល្អ។
លោកបានបញ្ជាក់ទៀតថា បើសិនបងប្អូនមានបញ្ហាកើតមានឡើងត្រូវចេះយោគយល់អធ្យាស្រ័យគ្នា និងបើមានចម្ងល់ត្រូវសួរមកគណៈកម្មការចម្រុះខេត្តចៀសវាងការបង្កទំនាស់ និងការរំខានដល់ការអនុវត្តគម្រោងរបស់គណៈកម្មការខេត្ត ដើម្បីរៀបចំផ្សារក្នុងទីក្រុងកំពង់ឆ្នាំងឲ្យមានសោភ័ណភាពល្អស្របតាមផែនការប្រឡងប្រណាំងទីក្រុងស្អាត។ ចំពោះការរៀបចំសណ្ដាប់ធ្នាប់លក់ដូរជុំវិញផ្សារលើនេះគឺឈរលើតម្លាភាព និងអាចឲ្យអាជីវករទទួលយកបានទាំងអស់គ្នា៕
ទំនាស់នៅកន្លែងលក់ដូរត្រូវបានគណៈកម្មការក្រុមចម្រុះខេត្តចុះដោះស្រាយបញ្ចប់ដោយជោគជ័យ
0 Comments