សៀមរាប ៖ ដើម្បីអនុវត្តឲ្យកាន់តែមានប្រសិទ្ធភាពនូវសេចក្ដីណែនាំរបស់ក្រសួងកសិកម្មរុក្ខាប្រមាញ់ និងនេសាទក៏ដូចបទបញ្ជារបស់គណៈបញ្ជាការឯកភាពរដ្ឋបាលខេត្តដែលមានលោក ឃឹមប៊ុនសុង អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តសៀមរាប និងការចង្អុលបង្ហាញរបស់លោកឧត្តមសេនីយ៍ត្រីប៉ោ វណ្ណនិតមេបញ្ជាការកងរាជអាវុធហត្ថខេត្ត កាលពីព្រឹកថ្ងៃទី១៩ ខែតុលា ឆ្នាំ២០១៥ ចុះធ្វើកាបង្ក្រាបទីតាំងស្រះចិញ្ចឹមត្រីឆ្ដោរចំនួន ០៤ស្រះ នៅភូមិភ្នំគ្រោម និងភូមិអារញ្ញ័ សង្កាត់សៀមរាប ក្រុង/ខេត្ត សៀមរាប។
ក្នុងការចុះធ្វើសកម្មភាពនៅតាមទីតាំងស្រះចិញ្ចឹមត្រីទាំង០៤ខាងលើនេះលោកព្រឹន សាវិន នាយខណ្ឌរដ្ឋបាលជលផលខេត្តបានឲ្យដឹងថា នាពេលកន្លងមកទីតាំងស្រះចិញ្ចឹមត្រីឆ្ដោរនេះត្រូវបានកម្លាំងសមត្ថកិច្ចចម្រុះដែលមានកម្លាំងនគរបាលប្រឆាំងបទល្មើសសេដ្ឋកិច្ចបានធ្វើការបង្ក្រាបម្តងរួចមកហើយ តែពួកគាត់មិនរាងចាលឡើយ ក៏បានលបលួចធ្វើការចិញ្ចឹមជាបន្តទៀត។ ក្នុងការចុះធ្វើប្រតិបត្តិការបង្ក្រាបនេះ ក្រុមមន្ត្រីជំនាញក៏បានធ្វើការសួរនាំម្ចាស់អ្នកចិញ្ចឹមត្រីទាំងនេះឲ្យមកធ្វើកិច្ចសន្យាជាមួយសមត្ថកិច្ចយើងផងដែរ។
តាមការបញ្ជាក់របស់លោកវរសេនីយ៍ឯក ស្រី យូរ៉ា បានឲ្យដឹងថា ក្រោយពីបានទទួលនូវសេចក្តីណែនាំរបស់ក្រសួងកសិកម្ម និងបទបញ្ជារបស់គណៈបញ្ជាការឯកភាពរដ្ឋបាលខេត្ត ដើម្បីក្នុងការអនុវត្តឲ្យកាន់តែមានប្រសិទ្ធភាពខ្ពស់ចំពោះបញ្ឈប់ការចិញ្ចឹមត្រីឆ្ដោរដែលជាប្រភេទត្រីស៊ីចំណីជាត្រីដូចគ្នាដែលធ្វើឲ្យហិនហោចនូវពូជត្រីធម្មជាតិព្រមទាំងធ្វើឲ្យកើតនូវបទល្មើសនេសាទទ្វេឡើងនិងប្រើប្រាស់នូវឧបករណ៍នេសាទខុសច្បាប់ទៀតផង។ លោកបានឲ្យដឹងទៀតថា ការបង្ក្រាបទីតាំងចិញ្ចឹមត្រីនេះសមត្ថកិច្ចយើងបានឲ្យម្ចាស់ធ្វើកិច្ចសន្យា តែបើនៅតែបន្តចិញ្ចឹមត្រីឆ្ដោរនេះតទៅទៀត សមត្ថកិច្ចយើងនឹងនាំខ្លួនម្ចាស់ចិញ្ចឹមទាំងនេះទៅផ្ដន្ទាទោសតាមច្បាប់ ។
ក្នុងកិច្ចប្រតិបត្តិការនេះយើងបានកំទេចកូនត្រីឆ្ដោរទាំង០៤ស្រះ មានកូនត្រីចំនួន៣ម៉ឺនក្បាល ក្នុងនោះមានម្ចាស់ឈ្មោះ សាំង សំអាត ភេទស្រី មានទីតាំងចិញ្ចឹមនៅភូមិភ្នំក្រោម ឈ្មោះ ទ្រី ជី ភេទប្រុស និងឈ្មោះ តូ យ៉ាងធឹង ភេទ ប្រុស មានទីតាំងចិញ្ចឹមនៅភូមិ អារ័ញ្ញ សង្កាត់សៀមរាប ក្រុង/ ខេត្តសៀមរាប៕
កម្លាំងសមត្ថកិច្ចចម្រុះបង្ក្រាបស្រះចិញ្ចឹមត្រីឆ្ដោរ៤កន្លែងនៅក្នុងសង្កាត់សៀមរាប
0 Comments