តាកែវ ៖ កាលពីព្រឹកមិញនេះនៅលើបណ្ដាញទំនាក់ទំនងសង្គមហ្វេសប៊ុក ត្រូវបានគេចែកចាយរូបភាពស្តីអំពីដំណឹងទទួលមរណភាពរបស់កវីជើងចាស់ចាប៉ីដងវែងលោកតា ប្រាជ្ញ ឈួនជាលើកទី២ ហើយចំពោះព័ត៌មានដ៏អកុសលនេះដែរ ក៏បានធ្វើឲ្យមហាជនទូទាំងប្រទេសមានការសោកស្ដាយយ៉ាងខ្លាំងនៅការបាត់បង់វីរសិល្បករផ្នែកចម្រៀងចាប៉ីដ៏ល្បីល្បាញ របស់ប្រទេសកម្ពុជានោះ។
ដើម្បីជម្រះមន្ទិលសង្ស័យចំពោះពាក្យចចាមអារ៉ាមខាងលើនេះ កាលពីព្រឹកថ្ងៃទី២០ ខែតុលា ឆ្នាំ២០១៥ភ្នាក់ងារសារព័ត៌មានកាសែត«កម្ពុជាថ្មី»បានភ្ជាប់ប្រព័ន្ធទូរស័ព្ទទៅកាន់ក្រុមគ្រួសាររបស់លោកតាប្រាជ្ញ ឈួន ហើយបើតាមលោកប្រាជ្ញ ឆាតដែលជាកូនបង្កើតបានប្រាប់ឲ្យដឹងថា ដំណឹងនេះមិនពិតនោះឡើយ ពោល ឪពុករបស់គាត់(ប្រាជ្ញ ឈួន)មានសុខភាពល្អធម្មតាទេនៅថ្ងៃនេះ គឺពុំមានរឿងអ្វីកើតឡើងដូចដែលគេល្បីតៗគ្នានៅក្នុងបណ្ដាញហ្វេសប៊ុកថា គាត់ទទួលមរណភាពនោះឡើយ។
លោកប្រាជ្ញ ឆាតបាននិយាយប្រាប់បន្ថែមថា ស្របពេលដែលគេល្បីថា គាត់ស្លាប់នេះដែរគឺឪពុករបស់លោកកំពុងតែទៅសុំសីលជារូបលោកនៅវត្តស្រម៉រ ដែលមានទីតាំងស្ថិតនៅភូមិស្រម៉រ ឃុំខ្វាវ ស្រុកទ្រាំង ខេត្តតាកែវ ដែលជាវត្តស្ថិតនៅក្បែរផ្ទះ។ លោកប្រាជ្ញ ឆាតនិយាយបញ្ជាក់ថា ចំពោះដំណឹងដែលល្បីថាឪពុករបស់លោកទទួលមរណភាពនេះ កាលពីកន្លងទៅក៏ធ្លាប់ត្រូវបានក្រុមអ្នកលេងហ្វេសប៊ុកនាំគ្នាផ្សព្វផ្សាយ និងចែករំលែកបន្តគ្នារួមម្តងទៅហើយ តែទោះយ៉ាងណាលោកមិនមានការខឹងសម្បានោះឡើយ។
សូមបញ្ជាក់ឲ្យដឹងដែរថា លោកតាប្រាជ្ញ ឈួនចាប់កំណើតនៅខែតុលាឆ្នាំ១៩៣៦ក្នុងត្រកូលគ្រួសារកសិករដែលមានបងប្អូន៦នាក់(លោកជាកូនពៅ)។ លោកតាប្រាជ្ញ ឈួនមានស្រុកកំណើតនៅភូមិត្រពាំងកក់ ឃុំខ្វាវ ស្រុកទ្រាំង ខេត្តតាកែវ។ លោកតាប្រាជ្ញ ឈួន បានធ្លាក់ខ្លួនពិការភ្នែកទាំងសងខាងតាំងពីអាយុប្រាំឆ្នាំ ដោយសាររោគកញ្ជ្រិល និងបានចាប់ផ្តើមរៀនច្រៀងចម្រៀងចាប៉ីតាំងពីអាយុ៩ឆ្នាំពីឪពុកមាខាងឪពុកម្នាក់ឈ្មោះប៉ែត ឌុបហៅចង្កូមប្រាំបី៕
កវីជើងចាស់ចាប៉ីដងវែងលោកតា ប្រាជ្ញ ឈួន ត្រូវគេល្បីថា ស្លាប់ជាលើកទី២
0 Comments