ឱសថបុរាណចិនTCM (Traditional Chinese Medicine) បានសម្រេចទាក់ទាញបាននូវការចាប់អារម្មណ៍ជាសកលជាថ្មីម្ដងទៀត បន្ទាប់ពីលោកស្រី Tu Youyou ដែលជាអ្នកស្រាវជ្រាវជនជាតិចិនមួយរូប ដែលបណ្ដុះគំនិតដោយឱសថបុរាណប្រភេទនេះពេលរកឃើញប្រភេទថ្នាំប្រឆាំងនឹងជំងឺគ្រុនចាញ់ ឈ្មោះហៅថា Artemisinin ហើយជាជ័យលាភីរង្វាន់ Nobel Prize ប្រចាំឆ្នាំ២០១៥ សម្រាប់វិស័យវេជ្ជសាស្ដ្រ ឬសរីរវិទ្យា។
ប៉ុន្ដែលោក Fang Shuting នាយកនៃសមាគមឱសថបុរាណចិន របស់ប្រទេសនេះ បានបង្ហាញឲ្យឃើញថា ថ្វីបើលោកស្រី Tu សម្រេចបានក្នុងការផ្សព្វផ្សាយឱសថបុរាណចិនជាសកលយ៉ាងណាក្ដី ក៏ការខិតខំប្រឹងប្រែងដ៏ខ្លាំងក្លានឹងកាន់តែច្រើនថែមទៀត ជាករណីចាំបាច់ដើម្បីធ្វើឲ្យប្រសើរឡើងនូវវិស័យឱសថ និងគុណភាពនៃឱសថវេជ្ជសាស្ដ្រដែលផ្សំឡើងពីរុក្ខជាតិក្រអូប ឬតិណទេស នៅក្នុងប្រទេសចិន។
សេចក្ដីថ្លែងប្រកាសនេះ ត្រូវបានធ្វើឡើងនៅពេលតាំងពិព័រណ៍ពាណិជ្ជកម្មឱសថមួយកាលពីថ្ងៃអាទិត្យ នៅក្រុង Zhangshu នៃខេត្ដ Jiang Xi។
យោងតាមការលើកឡើងដោយលោក Fang មានក្រុមហ៊ុនឱសថដល់ទៅជិត១,៦០០ក្រុមហ៊ុនក្នុងចំណោមក្រុមហ៊ុនឱសថទាំងជាង៤,០០០ក្រុមហ៊ុននៅក្នុងប្រទេសចិន ស្ថិតនៅក្នុងការផលិតវិស័យឱសថបុរាណចិន ហើយភាគច្រើននៃក្រុមហ៊ុនទាំងនោះមានបច្ចេកវិទ្យាទាប ហើយគ្រប់គ្រងក៏មិនសូវបានត្រឹមត្រូវ។
លោក Fang និយាយថា រដ្ឋាភិបាលចិន គួរតែគាំទ្រឲ្យផលិតករឱសថរួបរួមបញ្ចូលជាមួយគ្នា ហើយរៀបចំចាត់ចែងជាថ្មីឡើងវិញ ចាប់តាំងពីពេលដែលមានការរៀបចំឲ្យត្រឹមត្រូវទៅតាមស្ដង់ដារភាវូបនីយកម្ម និងការគ្រប់គ្រងបានយ៉ាងត្រឹមត្រូវនៃសហគ្រាសផលិតឱសថដែលអាចទទួលបាននូវកាលានុវត្ដក្នុងឧស្សាហកម្មនេះ។
ជាងនេះផងទៅទៀត ប្រទេសចិន បានបង្កើតទីតាំងដល់ទៅជាង៦០០មូលដ្ឋានសម្រាប់ដាំ ដុះតិណទេសបុរាណចិនគ្របដណ្ដប់លើផ្ទៃដីជាង៦លាន mu (៤០០,០០០ហិកតា)។
ទោះជាយ៉ាងណាក៏គុណភាពនៃតិណទេសវេជ្ជសាស្ដ្រនៅក្នុងទីផ្សារមានការប្រែប្រួល។ នោះហើយដែលលោក Fang ផ្ដោតជាសំខាន់ទៅលើការពង្រឹងការពិនិត្យលើគុណភាព និងបង្កើនការប្រើប្រាស់បច្ចេកវិទ្យាឈានមុខនៅក្នុងការដាំដុះ និងបែបបទនៃការប្រើប្រាស់តិណទេស។
មានមនុស្សជាច្រើនបានទទួលយករួចទៅហើយ ឬក៏បានសាកល្បងប្រើប្រាស់ឱសថបុរាណចិន នៅប្រទេសក្រៅ រួមមានកាណាដា ហុល្លង់ និងអង់គ្លេស។ លោក Fang ប្រាប់ថា ឱសថបុរាណចិនប្រភេទថ្មីមួយដែលត្រូវបានអភិវឌ្ឍដោយអ្នកស្រាវជ្រាវមកពីសមាគមកំពុងត្រូវបានពិសោធនៅប្រទេសអូស្ដ្រាលី ហើយត្រូវបានគេរំពឹងថា នឹងចូលមកកាន់ទីផ្សារនៅអនាគតដ៏ខ្លីខាងមុខនេះ៕
Xinhua
មានការខិតខំប្រឹងប្រែងជាចាំបាច់ទៀតដើម្បីបង្កើនវត្តមានឱសថបុរាណចិន ជាសកល
0 Comments