ព្រះសីហនុ ៖ កម្មករសំណង់ម្នាក់ត្រូវបានខ្សែភ្លើងឆក់រងរបួសធ្ងន់ស្ទើរស្លាប់ស្ទើររស់ ខណៈពេលឡើងបូកជញ្ជាំងសំណង់ផ្ទះមួយកន្លែងស្ថិតនៅចំណុចខាងមុខសាលក្រុងព្រះសីហនុស្ថិតនៅក្នុងក្រុមលេខ២០ ភូមិលេខ៤ សង្កាត់លេខ៤ កាលពីវេលាម៉ោង០៩និង១០នាទីព្រឹកថ្ងៃទី២២ ខែតុលា ឆ្នាំ២០១៥។
សមត្ថកិច្ចប៉ូលិសសង្កាត់លេខ៤បានឲ្យដឹងថា ជនរងគ្រោះដែលត្រូវខ្សែភ្លើងឆក់ខាងលើមានឈ្មោះ ហ៊ី តូ ភេទប្រុស អាយុ៣០ឆ្នាំ មានស្រុកកំណើតនៅភូមិអង្គមាស ឃុំដងទង់ ស្រុកដងទង់ ខេត្តកំពតបច្ចុប្បន្នស្នាក់នៅចំណុចកើតហេតុមានមុខរបរជាកម្មករសំណង់។ ជនរងគ្រោះក្រោយពេលកើតត្រូវ បានរថយន្តសាម៉ុយដឹកយកទៅកាន់មន្ទីរពេទ្យបង្អែកចម្ការចេក ខេត្តព្រះសីហនុ ដើម្បីជួយសង្គ្រោះភ្លាមៗផងដែរ ហើយមកដល់ពេលនេះអាការៈជំងឺជនរងគ្រោះបានធូរស្រាលខ្លះហើយ។
ទាក់ទិនទៅនឹងហេតុការណ៍ខាងលើនេះបើតាមសាក្សីជាកម្មករសំណង់ដូចគ្នាបានប្រាប់ឲ្យដឹងថា នៅមុខពេលកើតជនរងគ្រោះបានឡើងរន្ទាសំណង់ជាន់ទី១ផ្នែកខាងមុខ ដើម្បីធ្វើការបូកជញ្ជាំងដែលនៅជិតបង្គោលខ្សែភ្លើង និងខ្សែភ្លើង ក្រោយមកជនរងគ្រោះមិនបានប្រយ័ត្នក៏បានប៉ះ និងខ្សែភ្លើង (ប្រភេទកាប)ដែលមានចរន្តភ្លើងខ្លាំងបណ្ដាលឲ្យឆក់រងរបួសធ្ងន់ក្នុងពេលនោះតែម្តងទៅ។ក្រោយពេលកើតហេតុដោយសារគ្មានជណ្ដើរចុះ ជនរងត្រូវបានជាប់នៅជាន់ទីមួយរយៈពេលជិតមួយម៉ោងទើបគេអាចជួយដាក់ចុះមកដីបាន រូចហើយក៏បានលើកដាក់លើរថយន្តសាម៉ុងនាំយកទៅកាន់មន្ទីរពេទ្យជួយសង្គ្រោះ។
សូមបញ្ជាក់ថា ម្ចាស់សំណង់កើតហេតុខាងលើនេះមាន ឈ្មោះ ទុយ រ៉ា ភេទប្រុស អាយុ៤១ឆ្នាំជាកូនប្រសារលោក ឈាវ រៀង មន្ត្រីបម្រើការងារច្រកចេញចូលតែមួយសាលាក្រុងព្រះសីហនុ។ ពាក់ព័ន្ធទៅនឹងសំណង់ខាងលើនេះត្រូវបានមន្ត្រីភូមិ ក្រុងព្រះសីហនុធ្វើការបញ្ជាក់ថា ទីតាំងសំណង់នេះនៅមិនទាន់មានប្លង់កម្មសិទ្ធិនៅឡើយទេ ហើយសំណង់នេះក៏មិនច្បាប់អនុញ្ញាតនោះដែរ។ ហើយអ្វីដែលគួរឲ្យកត់សម្គាល់ផងដែរនោះគឺសំណង់នេះផ្នែកខាងក្រោយធ្វើការសាងសង់រំលោភលើដីអូរ រីឯចំណែកខាងមុខសាងសង់រំលោភលើដីចំណីផ្លូវសាធារណៈគឺធ្វើការសាងសង់ជាប់ និងបង្គាលខ្សែភ្លើងតែម្តងទើបបានជាមានបញ្ហាដូចនេះ។ ជាមួយគ្នានេះប្រជាពលរដ្ឋជាច្រើនបានធ្វើសំណូមពរទៅដល់អាជ្ញាធរក្រុង/ខេត្តព្រះសីហនុ មេត្តាចុះមកពិនិត្យ និងមានវិធានការតាមផ្លូវច្បាប់ជាមួយម្ចាស់សំណង់នេះផង ពីព្រោះសំណង់នេះមានចម្ងាយពីសាលាក្រុងព្រះសីហនុប្រមាណ៥០ម៉ែត្រតែប៉ុណ្ណេះ៕
កម្មករសំណង់ម្នាក់ត្រូវខ្សែភ្លើងឆក់ ក្នុងពេលបំពេញការងារ
0 Comments