កំពង់ឆ្នាំង ៖ អនុវត្តតាមអនុសាសន៍របស់ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងនាព្រឹកថ្ងៃទី២៤ ខែតុលា ឆ្នាំ២០១៥ ក្រុមការងារចម្រុះខេត្តមួយក្រុមដឹកនាំដោយលោក ម៉ម ឈឿម ប្រធានមន្ទីរព័ត៌មានខេត្តកំពង់ឆ្នាំងរួមដំណើរដោយលោក ថោង ចំរើន ប្រធានមន្ទីរសង្គមកិច្ចខេត្ត, លោក សោម សុជាតាប្រធានមន្ទីរអធិការកិច្ចខេត្ត,លោក លី សុភា អនុប្រធានមន្ទីរសុរិយោដីខេត្តព្រមទាំងមានការចូលរួមពីអាជ្ញាធរដែនដីបានជួបប្រជុំពិភាក្សាគ្នា និងចុះពិនិត្យដល់ផ្ទះកុមារកំព្រាទាំង៥នាក់ ដែលមានទំនាស់ដីធ្លីរ៉ាំរៃនៅភូមិពោធិអណ្ដែត ឃុំកំពង់ហៅ ស្រុកកំពង់លែង ខេត្តកំពង់ឆ្នាំង។
លោក ម៉ម ឈឿម ប្រធានមន្ទីរព័ត៌មានខេត្ត និងជាប្រធានក្រុមការងារចំរុះខេត្តបានលើកឡើងពីគោលបំណងសំខាន់គឺអនុវត្តអនុសាសន៍របស់ឯកឧត្តម ឈួរ ច័ន្ទឌឿន អភិបាលខេត្ត ដើម្បីឲ្យក្រុមចម្រុះចុះមកពិនិត្យមើលជាក់ស្តែងចំណុចសំខាន់មាន២គឺ ពិនិត្យមើលជាក់ស្តែងអំពីស្ថានភាពរស់នៅរបស់កុមារកំព្រាទាំង៥នាក់ដែលត្រូវម្តាយជាប់គុក និងឪពុករត់ចោល និងពិនិត្យមើលស្ថានភាពទំនាស់ដីភូមិរវាងគ្រួសារកុមារកំព្រា ជាមួយលោកស្រី ធឹម វុធ ដែលមានទំនាស់តាំងពីឆ្នាំ២០០៣មក។
លោក មាន់ អ៊ានលី អភិបាលស្រុកកំពង់លែងបានរាយការណ៍ជូនអង្គប្រជុំថា ម្តាយកុមារកំព្រាទាំង៥នាក់នេះឈ្មោះ នៅ ច្រឹប ត្រូវបានជាប់ពន្ធធនាគារពីបទជួញដូរ រយៈពេលជិត៦ខែហើយក្រោយពីប្រពន្ធជាប់ពន្ធធនាគារបាន៣ខែប្ដីក៏បានរត់ចោលកូនបាត់ដំណឹងសូន្យឈឹង កូនៗមានចំនួន៤នាក់ដោយបងស្រីមានប្ដី។ កន្លងមកអាជ្ញាធរស្រុកអនុសាខាកាកបាទក្រហមស្រុក, សសយកស្រុក និងអង្គការនានាបានឧបត្ថម្ភអង្ករ និងថវិកាជាប់ជាប្រចាំទើបតែពេលនេះបងស្រីកុមារទាំង៤នេះ បានមករស់នៅគ្រប់គ្រងប្អូនវិញដោយមានចំណូលអាចចិញ្ចឹមប្អូនៗបានតែអាជ្ញាធរ និងអង្គការនៅតែយកចិត្តទុកដាក់ជួយពីគ្រួសារនេះគ្រប់ពេលវេលា។
ចំពោះបញ្ហាទំនាស់ដីភូមិបានកើតតាំងពីឆ្នាំ២០០៣ លោកអភិបាលស្រុក និងមន្ត្រីជំនាញពាក់ព័ន្ធបានដោះស្រាយ និងសម្របសម្រួលបាន២លើកហើយ ឃើញថា ភាគីទាំង២មានទំនោរឈានទៅរកភាពស្រុះស្រួលគ្នាអាចទទួលយកបាននៅលើកទី៣ក្នុងសប្ដាហ៍ក្រោយនេះ។
អ្នកនាង អ៊ុច ស៊ីណា អាយុ២១ឆ្នាំមានប្ដីឈ្មោះ ហេង រាជ បានរៀបរាប់ឲ្យដឹងថា ក្រោយពីម្តាយនាងបានជាប់ពន្ធធនាគារ និងឪពុករត់ចោលប្អូនៗនាង និងប្ដីបានបោះបង់ការងារនៅក្រុងភ្នំពេញមកគ្រប់គ្រងប្អូនទាំង៣នាក់វិញដោយប្រកបមុខរបរនេសាទត្រី ហើយចំណូលក្នុងមួយថ្ងៃជាមធ្យមគឺទទួលបាន១២.០០០រៀល។ ចំណែកប្អូនប្រុសបន្ទាប់ពីនាងម្នាក់ទៀតបានទៅធ្វើការនៅទីក្រុងភ្នំពេញក៏បានផ្តល់ប្រាក់ឧបត្ថម្ភមួយចំនួនសម្រាប់ចិញ្ចឹមប្អូនៗឲ្យរៀនសូត្រផងដែរ។ អ្នកនាង អ៊ុច ស៊ីណា ក៏បានសំណូមពរសុំឲ្យគណៈកម្មការចម្រុះរបស់ខេត្តមេត្តាជួយដោះស្រាយទំនាស់ដីរ៉ាំរៃជូននាងដោយយុត្តិធម៌ផង។
លោក ម៉ម ឈឿម បានសំណូមពរដល់មន្ទីរសង្គមកិច្ចខេត្តត្រូវតាមដានជាប្រចាំពីជីវភាពរស់នៅរបស់កុមារកំព្រាទាំងនេះ បើជួបបញ្ហាត្រូវរាយការណ៍ជូនឯកឧត្តមអភិបាលខេត្តឲ្យបានទាន់ពេលវេលា។ ចំពោះបញ្ហាទំនាស់ដីភូមិសុំឲ្យអាជ្ញាធរស្រុក សហការជាមួយលោក ប្រធានមន្ទីរអធិការកិច្ចខេត្ត និងលោកប្រធានមន្ទីរសុរិយោដីខេត្តរកវិធីដោះស្រាយសម្របសម្រួលឲ្យបានជោគជ័យ និងរាយការណ៍ជូនឯកឧត្តមអភិបាលខេត្ត៕
ក្រុមការងារចម្រុះខេត្តកំពង់ឆ្នាំងចុះពិនិត្យមើលស្ថានភាពកុមារកំព្រា និងដោះស្រាយទំនាស់ដី
0 Comments