បាត់ដំបង ៖ នារីវ័យក្មេងម្នាក់ដែលជាមុខសញ្ញាចែកចាយគ្រឿងញៀនដ៏សកម្មត្រូវបានកម្លាំងកងរាជអាវុធហត្ថខេត្តធ្វើការឃាត់ខ្លួនកាលពីថ្ងៃទី២៤ ខែតុលា ឆ្នាំ២០១៥នៅវេលាម៉ោង៩និង៤០នាទីព្រឹកត្រង់ចំណុចខាងក្នុងស្ថានីយរថភ្លើង ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខណៈដែលនារីរូបនេះកំពុងធ្វើសកម្មភាពជាក់ស្តែង។
លោកអនុសេនីយ៍ឯក សូ ឌី ប្រធានមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្តបានបញ្ជាក់ថា ក្រោយពីទទួលបានព័ត៌មានស្ដីពីករណីចែកចាយគ្រឿងញៀនខុសច្បាប់រួចមក លោកបានចាត់កម្លាំងចុះទៅចំនុចខាងលើព្រមទាំងបានឃាត់ខ្លួននារីវ័យក្មេងម្នាក់នៅនឹងផ្ទះជួលរបស់នាង។
ក្នុងកិច្ចប្រតិបត្តិការនេះដែរ សមត្ថកិច្ចបានដកហូតនូវសារធាតុញៀនប្រភេទយ៉ាម៉ាចំនួន៦៨គ្រាប់ ជញ្ជីងសម្រាប់ថ្លឹងគ្រឿងញៀនមួយ ដាវសាំម៉ូរ៉ៃចំនួនពីរដើម ទូរស័ព្ទចំនួនពីរគ្រឿង ម៉ូតូម៉ាកឌ្រីមចំនួនពីរគ្រឿង និងសម្ភារៈសម្រាប់វេចខ្ចប់មួយចំនួនធំផងដែរ។
លោកប្រធានមន្ទីរបានសង្កត់ធ្ងន់ថា នារីរូបនេះកន្លងមកគឺជាមុខសញ្ញាចែកចាយគ្រឿងញៀនយ៉ាងសកម្មជាទីបំផុតដែលសមត្ថកិច្ចបានតាមដានជាយូរមកហើយ ដោយគ្រាន់តែមិនទាន់មានឱកាសក្នុងការបង្ក្រាបតែប៉ុណ្ណោះ បច្ចុប្បន្នកម្លាំងកងរាជអាវុធហត្ថខេត្តបានបញ្ជូនខ្លួនរួមទាំងវត្ថុតាងទៅកាន់តុលាការហើយ ដើម្បីចាត់ការតាមផ្លូវច្បាប់៕
ឃាត់ខ្លួនមុខសញ្ញាចែកចាយម្នាក់គ្រឿងញៀនព្រមទាំងយ៉ាម៉ា៦៨គ្រាប់
0 Comments