ភ្នំពេញ ៖ ក្មេងប្រុសជាសិស្សសាលាអាយុ១៣ឆ្នាំម្នាក់ ត្រូវបានរថយន្តដឹកអ្នកដំណើររបស់សាលារាជធានីបើកបុក និងកិនស្លាប់ភ្លាមៗនៅកន្លែងកើតហេតុកាលពីវេលាម៉ោង១៣និង៣០នាទីរសៀលថ្ងៃអាទិត្យទី២៥ ខែតុលា ឆ្នាំ២០១៥ នៅតាមបណ្ដោយផ្លូវសហព័ន្ធរុស្ស៊ី ម្តុំខាងកើតផ្សារទឹកថ្លា ស្ថិតក្នុងសង្កាត់ទឹកថ្លា ខណ្ឌសែនសុខ។
សពជនរងគ្រោះឈ្មោះ រស់ រ័ត្នបញ្ញា ភេទប្រុសអាយុ១៣ឆ្នាំ ជាសិស្សរៀននៅថ្នាក់ទី៧ មានទីលំនៅផ្ទះជួលក្នុងសង្កាត់ទឹកថ្លា ខណ្ឌសែនសុខ។
សាក្សីនៅកន្លែងកើតហេតុបាននិយាយថា មុនពេលគ្រោះថ្នាក់នេះកើតឡើង គេបានឃើញក្មេងរងគ្រោះកំពុងតែជិះម៉ូតូម៉ាកToday ឬហៅកូនទា ពណ៌ស ពាក់ស្លាកលេខភ្នំពេញ1FC-7853
តែម្នាក់ឯង ក្នុងទិសដៅពីលិចទៅកើត ក្នុងល្បឿនយឺតល្មមទេ ហើយប្រកាន់ស្ដាំទៀតផង។ លុះជិះមកដល់ចំណុចកើតហេតុ ត្រង់ម្តុំមុខវត្តវង្កដ្ឋបុរី ក៏ត្រូវរថយន្តក្រុងសម្រាប់ដឹកអ្នកដំណើររបស់សាលារាជធានី មួយគ្រឿងប្រព័ន្ធខ្សែទី៣ ពាក់ស្លាកលេខរដ្ឋ ៣៧-៣-០០៤៩ បើកពីចោមចៅមកបុក និងកិនលើជនរងគ្រោះ បណ្ដាលឲ្យស្លាប់ភ្លាមៗតែម្តង។
ក្រោយពេលដឹងថា បើកបុកមនុស្សស្លាប់ អ្នកបើកបររថយន្តនេះបានរត់គេចខ្លួនបាត់ភ្លាមៗក្នុងពេលនោះ ដោយបន្សល់តែរថយន្តចតចោលនៅកន្លែងកើតហេតុ។
មន្ត្រីប៉ូលិសជំនាញផ្នែកចរាចរណ៍បាននិយាយថា រថយន្តបង្កពិតជាបានខុសមែន ប៉ុន្តែបើយោងទៅតាមច្បាប់ចរាចរណ៍វិញ ជនរងគ្រោះក៏មានកំហុសដែរ ដោយសារតែឪពុកម្ដាយមានការធ្វេសប្រហែសបណ្ដោយឲ្យកូនមិនទាន់គ្រប់អាយុបើកបរយានយន្តនៅលើផ្លូវសាធារណៈ នាំឲ្យមានគ្រោះថ្នាក់ដូច្នេះកើតឡើងតែម្ដង៕
រថយន្តដឹកអ្នកដំណើររបស់សាលារាជធានីភ្នំពេញបើកបុក និងកិនក្មេងសិស្សសាលាម្នាក់ស្លាប់
0 Comments