ព្រះសីហនុ ៖ ជនសង្ស័យចំនួន៣នាក់ត្រូវបានសមត្ថកិច្ចប៉ូលិសការិយាល័យប្រឆាំងការជួញដូរគ្រឿងញៀនខេត្តព្រះសីហនុចាប់ឃាត់ខ្លួន ជាប់ពាក់ព័ន្ធនឹងករណីចែកចាយគ្រឿងញៀនកាលពីម៉ោងប្រមាណ១រសៀលថ្ងៃទី២៥ ខែតុលា ឆ្នាំ២០១៥នៅចំណុចក្រុម១ ភូមិ២ សង្កាត់៣ក្រុង-ខេត្តព្រះសីហនុ។
លោកវរសេនីយ៍ឯកសាន់ ប៊ុនថន ស្នងការរង ទទួលបន្ទុកប្រធានការិយាល័យកណ្ដាលប្រឆាំងបទល្មើស នៃស្នងការដ្ឋាននគរបាលខេត្តព្រះសីហនុ បានឲ្យដឹងថា ជនសង្ស័យទី១.មានឈ្មោះភឿក ភេទប្រុស អាយុ២៨ឆ្នាំមានទីលំនៅភូមិ២ សង្កាត់លេខ៣ ក្រុងព្រះសីហនុ មុខរបរមិនពិតប្រាកដជាមេបណ្ដាញ ចែកចាយគ្រឿងញៀន។ ទី២. ឈ្មោះ ម៉េង រដ្ឋា ភេទប្រុស អាយុ២២ឆ្នាំមានទីលំនៅភូមិ២ សង្កាត់លេខ៣ ក្រុងព្រះសីហនុ មុខរបរមិនពិតប្រាកដ ជាមុខសញ្ញាចែកចាយគ្រឿងញៀន និងជនសង្ស័យទី៣. ឈ្មោះ ហង្ស សីថា ភេទប្រុសអាយុ២០ឆ្នាំ មុខរបរមិនពិតប្រាកដ មានទីលំនៅភូមិ២ សង្កាត់លេខ៣ ក្រុងព្រះសីហនុជាមុខសញ្ញាចែកចាយ គ្រឿងញៀន។
លោក សាន់ប៊ុនថន បានឲ្យដឹងថា វត្ថុតាងដែលដកហូតបានរួមមាន-ថ្នាំញៀនប្រភេទម៉ាទឹកកកចំនួន១៥កញ្ចប់តូច។ បច្ចុប្បន្នកំពុងកសាងសំណុំរឿងបញ្ជូនទៅសាលាដំបូងខេត្ត៕
ប៉ូលិសខេត្តព្រះសីហនុឃាត់ខ្លួនមនុស្សបីនាក់ ដកហូតបានគ្រឿងញៀនបាន១៥កញ្ចប់
0 Comments