ភ្នំពេញ ៖ បន្ទាប់ពីបញ្ចប់បេសកកម្មដ៏មមាញឹកនៅក្រៅប្រទេសរួចមក នាថ្ងៃអាទិត្យថ្ងៃទី២៥ ខែតុលា ឆ្នាំ២០១៥ ចុងសប្ដាហ៍នេះ លោកហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោបានអញ្ជើញពិនិត្យការវះកាត់ និងសួរសុខទុក្ខកុមារមានមាត់ឆែប ដែលធ្វើការវះកាត់ដោយអង្គការ ស្នាមញញឹមកម្ពុជា (Smile Cambodia) សហការជាមួយអង្គការស្នាមញញឹមសិង្ហបូរី (Smile Singapore)នៅមន្ទីរពេទ្យមិត្តភាពខ្មែរ សូវៀត (ពេទ្យរុស្សី) ដែលកម្មវិធីនេះគ្រោងនឹងវះកាត់កុមារដែលមានមាត់ឆែបចំនួន៥៣នាក់ក្នុងរយៈពេល០៤ថ្ងៃ។
ការវះកាត់ និងព្យាបាលជំងឺមាត់ឆែបដល់កុមារគឺជាសកម្មភាពមនុស្សធម៌ដ៏ល្អប្រពៃដើម្បីដើម្បីជួយឲ្យកុមារមានជីវិតថ្មី ស្នាមញញឹមថ្មីប្រកបដោយក្តីសង្ឃឹម។ លោកហ៊ុន ម៉ាណែត បានបង្ហាញការស្រឡាញ់ ការអាណិតអាសូរដល់កុមារទាំងអស់នោះ និងបានផ្តល់ថវិកា និងអំណោយមួយចំនួនដែលជាអំណោយសម្តេចតេជោ និងសម្តេចកិត្តិព្រឹទ្ធបណ្ឌិតជូនដល់ក្មួយៗកុមារផងដែរ។
បន្ទាប់ពីសកម្មភាពមនុស្សធម៌ទី១ លោកហ៊ុន ម៉ាណែតបានដឹកនាំក្រុមវេជ្ជបណ្ឌិត និង និស្សិតពេទ្យស្ម័គ្រចិត្តនៃសមាគមគ្រូពេទ្យស្ម័គ្រចិត្តយុវជនសម្តេចតេជោសហការជាមួយអាជ្ញាធរ និងអង្គការKOTRA ចុះព្យាបាល ជំងឺមាត់ធ្មេញ ជំងឺភ្នែក ជំងឺទូទៅ ពិនិត្យអេកូ ពិនិត្យឈាម និងព្យាបាលរោគស្ត្រីដោយឥតគិតថ្លៃជូនដល់បងប្អូន កម្មករ កម្មការិនីចំនួន១២៥៥នាក់ស្ថិតនៅភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ។ បងប្អូន កម្មករ-ការិនីដែលបម្រើការងារតាម រោងចក្រកាត់ដេរដែលបានទទួលសេវាព្យាបាលដោយឥតគិតថ្លៃនេះបានបង្ហាញអារម្មណ៍សប្បាយរីករាយ ដោយពួកគេទទួលបានការយកចិត្តទុកដាក់ចំពោះការថែទាំសុខភាព និងការរស់នៅពីសំណាក់ប្រមុខរាជរដ្ឋាភិបាលតាមរយៈការបញ្ចុះថ្លៃទឹក ភ្លើង ការដំឡើងប្រាក់ឈ្នួល និងការចុះព្យាបាលដោយឥតគិតថ្លៃសមាគមគ្រូពេទ្យស្ម័គ្រចិត្តយុវជនសម្តេចតេជោនាពេលនេះ។
សូមបញ្ជាក់ថា នេះគឺជាលើកទី១ដែលសមាគមគ្រូពេទ្យស្ម័គ្រចិត្តយុវជនសម្តេចតេជោចុះព្យាបាល ដោយឥតគិតថ្លៃជូនដល់បងប្អូន កម្មករ-ការិនីរោងចក្រកាត់ដេរ ហើយសមាគមមានគម្រោងចុះព្យាបាលដោយឥតគិតថ្លៃជូនដល់បងប្អូន កម្មករ -ការិនីរោងចក្រកាត់ដេរនៅពេលខាងមុខទៀត៕
ថ្ងៃអាទិត្យចុងសប្ដាហ៍នេះលោកហ៊ុន ម៉ាណែតបានដឹកនាំធ្វើសកម្មភាពមនុស្សធម៌ចំនួន២ផ្សេងគ្នា
0 Comments