បាត់ដំបង ៖ លំនៅដ្ឋាន១ខ្នង និងទ្រព្យសម្បត្តិមួយចំនួន ត្រូវអគ្គីភ័យលេបត្របាក់ទាំងស្រុងកាលពីថ្ងៃទី២១ ខែតុលា ឆ្នាំ២០១៥ វេលាម៉ោង១និង៣០នាទីរសៀល ត្រង់ចំណុចក្រុមទី២៤ ភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង ខណៈដែលម្ចាស់ផ្ទះបានចេញមកសម្រាកលេងនៅក្រោមម្លប់ឈើខាងមុខផ្ទះ។
យោងតាមរបាយការណ៍របស់សមត្ថកិច្ចស្រុកសង្កែបានឲ្យដឹងថា ផ្ទះនេះមានទំហំ៥ម៉ែត្រគុណ៩,៥០ម៉ែត្រ ធ្វើអំពីឈើប្រក់ស័ង្កសី និងជាកម្មសិទ្ធិរបស់លោក កើត សារិន ភេទប្រុស អាយុ៧២ឆ្នាំ រស់នៅត្រង់ចំណុចកើតហេតុខាងលើ។
តាមការរៀបរាប់ពីម្ចាស់ផ្ទះបាននិយាយថា រាល់ថ្ងៃ កូនៗគេចេញទៅធ្វើការអស់ហើយ ដោយមានតែលោក និងភរិយាប៉ុណ្ណោះដែលនៅចាំផ្ទះ ហើយម្យ៉ាងទៀតផ្ទះរបស់លោកបាននៅដាច់ឆ្ងាយពីគេប្រហែល២០០ម៉ែត្រ គឺនៅក្នុងចម្ការខាងក្រោយភូមិ។
លោកបានបន្តថា នៅមុនពេលកើតហេតុ គឺរូបលោក និងប្រពន្ធ បាននាំគ្នាទៅសម្រាកនៅលើគ្រែក្រោមម្លប់ឈើខាងមុខផ្ទះ ដោយសារតែអាកាសធាតុក្តៅខ្លាំងពេក គឺនៅពេលនោះហើយដែលអគ្គិភ័យបានឆាបឆេះពីខាងក្នុងផ្ទះ ដែលធ្វើឲ្យរូបលោកផ្ទាល់មិនបានឃើញទាល់តែសោះ រហូតដល់អណ្ដាតភ្លើងឆាបឆេះខ្លាំងទើបបានលោកដឹង តែអ្វីៗគឺហួសពេលអស់ទៅហើយ បើទោះបីជាប្រជាពលរដ្ឋនៅក្នុងភូមិនាំគ្នាមកជួយពន្លត់ក៏ជ្រុលពេលដែរ ព្រោះភ្លើងបានឆក់យកផ្ទះរបស់លោកខ្ទេចខ្ទីគ្មានសល់ទៅហើយ។
តាមការអះអាងពីម្ចាស់ផ្ទះ គឺសម្ភារៈដែលបាត់បង់នៅក្នុងភ្លើងរួមមាន ម៉ូតូ១គ្រឿង ទូរទឹកកក១ ម៉ាស៊ីនបោកគក់ខោអាវ១គ្រឿង និងសម្ភារៈមួយចំនួនធំ ប៉ុន្តែលុយកាក់ និងទ្រព្យសម្បត្តិមានតម្លៃពុំមានបាត់បង់ឡើយ។
ដោយឡែកលោក គឹម ប៊ុនធឿន នាយការិយាល័យបង្ការពន្លត់អគ្គិភ័យ នៃស្នងការដ្ឋាននគរបាលខេត្តបាត់ដំបងបានបញ្ជាក់ថា រឿងនេះគឺលោកពុំបានដឹងទាល់តែសោះ ដោយសារតែគ្មានអ្នកណាមួយរាយការណ៍មកសោះ ប៉ុន្តែបើរាយការណ៍ក៏ប្រហែលជាទៅមិនទាន់ដែរ ព្រោះភ្លើងនេះឆេះលឿនខ្លាំងពេក៕
ម្ចាស់ដេកនៅខាងក្រៅ ត្រូវភ្លើងឆេះពីក្នុងផ្ទះគ្មានសល់
0 Comments