ការកើនឡើងនូវភាពតានតឹង ចំពោះការបរិភោគសាច់គោ នៅក្នុងប្រទេសឥណ្ឌា ដែលមានប្រជាជនហិណ្ឌូភាគច្រើននោះ កំពុងតែចាប់ផ្ដើមប៉ះពាល់ ដល់ការធ្វើពាណិជ្ជកម្មសាច់ក្របីតម្លៃរាប់ពាន់លានដុល្លារ ស្របពេលការនាំចេញសាច់ក្របីបានធ្លាក់ចុះ នៅក្នុងរយៈពេល ៦ ខែចុងក្រោយនេះ ដោយសារឈ្មួញអស់ការផ្គត់ផ្គង់ ហើយប្រទេសចិន ដកការទិញពីប្រទេសប្រេស៊ីល។
ពួកសកម្មជនសាសនា ដែលពួកអ្នករិះគន់បាននិយាយថា ត្រូវបានធ្វើឲ្យក្លាហាន ដោយសារអំណាច របស់លោកនាយករដ្ឋមន្ដ្រីជាតិនិយម ណារ៉េនដ្រា ម៉ូឌី នោះបានបង្កើនការវាយប្រហារទៅលើឧស្សាហកម្មសាច់គោ ដោយការចោទប្រកាន់ថា គោត្រូវបានសម្លាប់ និងត្រូវបានបិទស្លាកក្លែងក្លាយ សម្រាប់ការនាំចេញថា ជាសាច់ក្របី។
អ្នកនាំចេញបាននិយាយឲ្យដឹងដូច្នេះថា សត្វគោត្រូវបានគេគោរព នៅក្នុងវប្បធម៌ហិណ្ឌូ ហើយការសម្លាប់គោ ត្រូវបានហាមឃាត់នៅក្នុងរដ្ឋមួយចំនួន។ ការនាំចេញសាច់គោត្រូវបានហាមឃាត់ ប៉ុន្ដែនៅរយៈពេលប៉ុន្មានសប្ដាហ៍កន្លងទៅថ្មីៗនេះ អ្នកផ្គត់ផ្គង់សាច់ក្របីត្រូវបានវាយទាត់ធាក់ ដោយជនខិលខូចឥតសណ្ដាប់ធ្នាប់ហិណ្ឌូ ពីបទសង្ស័យថា បានដឹកគោពន្លាត់ស្បែក តែមិនទាន់ពន្លះសាច់ នៅក្នុងរថយន្ដរបស់ពួកគេ។
ជាលទ្ធផល អ្នកនាំចេញបាននិយាយថា មានតែកន្លែងកែច្នៃសាច់គោមួយភាគ ដែលទទួលសិទ្ធិឲ្យនាំចេញប៉ុណ្ណោះ កំពុងធ្វើប្រតិបត្ដិការនៅក្នុងរដ្ឋលក់សាច់អ៊ូតាប្រាដេស ជាកន្លែងដែលជនហិណ្ឌូឥតសណ្ដាប់ធ្នាប់សម្លាប់បុរសមូស្លីមម្នាក់ កាលពីប៉ុន្មានខែកន្លងទៅ ពីបទឮពាក្យចចាមអារ៉ាមថា បុរសរូបនេះបានបរិភោគសាច់គោ។
លោក Mahammed Tauseef នាយកនៃក្រុមហ៊ុនផលិតផលម្ហូបអាហារ Al-Hamd Agro នៅរដ្ឋអ៊ូតាប្រាដេស បាននិយាយថា ប្រសិនបើយើងទទួលបានការបញ្ជាទិញនោះ វានឹងមិនមានផលិតផលសម្រាប់ផ្គត់ផ្គង់នោះទេ។ ប្រសិនបើអ្នកផ្គត់ផ្គង់ព្យាយាមដើម្បីផ្ដល់ការផ្គត់ផ្គង់នោះ ពួកគេនឹងត្រូវរងការយាយីរំខានមិនខាន។ រយៈពេលប៉ុន្មានថ្ងៃ បន្ទាប់ពីលោក ម៉ូឌី ថ្កោលទោសការសម្លាប់មនុស្សនៅរដ្ឋអ៊ូតាប្រាដេសនោះមក បន្ទាប់ពីការរិះគន់អំពីការកើនឡើងនូវការមិនអនុគ្រោះខាងសាសនានៅក្នុងប្រទេសឥណ្ឌានោះ អ្នកភូមិនៅរដ្ឋ ហ៊ីម៉ាចាល ប្រាដេស បានសម្លាប់បុរសមូស្លីមម្នាក់ទៀត ពីបទរត់ពន្ធសត្វគោ។
ព្រមជាមួយគ្នានេះ រដ្ឋាភិបាលបាននិយាយថា ជំហានទាំងឡាយប្រឆាំងនឹងការនាំចេញខុសច្បាប់ បានជួយកាត់បន្ថយការដឹកគោតាមនាវាទៅបរទេស។ រដ្ឋមន្ដ្រីក្រសួងកសិដ្ឋានលោក Sanjeev Balyan បាននិយាយនៅខែនេះថា ពុំមានព័ត៌មានពិតជាក់ស្ដែងនោះទេ ប៉ុន្ដែតែងតែមានពាក្យចចាមអារ៉ាមថា សាច់គោត្រូវបាននាំចេញ និងថា អាជ្ញាធរត្រូវបានស្នើឲ្យត្រួតពិនិត្យសាច់ និងរឹតបន្ដឹងការត្រួតពិនិត្យនៅកំពង់ផែ។
ប្រទេសឥណ្ឌា គឺជាប្រទេសអ្នកនាំចេញសាច់ក្របីដ៏ធំបំផុត នៅលើពិភពលោក ហើយការដឹកជញ្ជូន នៅក្នុងខែមេសា និងខែកញ្ញាបានធ្លាក់ចុះ ១៣ .២ ភាគរយ ពីឆ្នាំមុន ទៅដល់ចំនួន ៥៩៨,៩០១ តោន ហើយនៅក្នុងក្របខណ្ឌតម្លៃវាបានដាំក្បាលចុះ ១៥.៥ភាគរយទៅដល់ ១.៨៩ ពាន់លានដុល្លារ។ ការលក់របស់ប្រទេសឥណ្ឌា ក៏បានខាតបង់នៅប្រទេសប្រេស៊ីលផងដែរ ជាប្រទេសអ្នកផ្គត់ផ្គង់សាច់គោធំបំផុតទី ២ នៅលើពិភពលោក ដោយសារការធ្លាក់ចុះយ៉ាងខ្លាំង នៅក្នុងរូបិយប័ណ្ណ ដែលបានខាតបង់ ៣០ ភាគរយ នៅឆ្នាំនេះ ប្រៀបធៀបជាមួយប្រាក់រូពី ខាតបង់តែ ៣ ភាគរយនោះ៕
Reuters
ការវាយប្រហារឧស្សាហកម្មសាច់គោ ជះឥទ្ធិពលដល់ការជួញដូរសាច់ក្របី
0 Comments