*អ្នកនាំពាក្យក្រសួងយុត្តិធម៌ លោក គឹម សន្តិភាព អះអាងថា “ការសម្តែងមតិជាសិទ្ធិសេរីភាព ប៉ុន្តែអំពើហិង្សាជាអំពើល្មើសច្បាប់”
ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានសម្រេចបង្កើតគណៈកម្មការមួយ ដើម្បីស៊ើបអង្កេតស្រាវជ្រាវករណី មនុស្សមួយក្រុមបានព្រួតគ្នាប្រើអំពើហិង្សាលើអ្នកតំណាងរាស្ត្រគណបក្សសង្គ្រោះជាតិចំនួន២ រូប បណ្តាលឲ្យរងរបួសធ្ងន់កាលពីថ្ងៃទី២៦ ខែតុលា ឆ្នាំ២០១៥ ខណៈពេលដែលតំណាងរាស្ត្រទាំងពីររូបនោះ ជិះរថយន្តចេញពីប្រជុំរដ្ឋសភា នេះបើយោងតាមអ្នកនាំពាក្យ។
អ្នកតំណាងរាស្ត្រគណបក្សសង្គ្រោះជាតិ ដែលរងការប្រើអំពើហិង្សាពីសំណាក់មនុស្សមួយក្រុមនោះ គឺលោក ញ៉យ ចំរើន អ្នកតំណាងរាស្ត្រមណ្ឌលខេត្តកំពង់ចាម និងលោក គង់ សុភា អ្នកតំណាងរាស្ត្រមណ្ឌលខេត្តស្វាយរៀង។ អ្នកតំណាងរាស្ត្រទាំងពីរត្រូវបានបញ្ជូនទៅព្យាបាលនៅក្រៅប្រទេសហើយ។
តាមប្រភពព័ត៌មានពីមន្ត្រីជាន់ខ្ពស់ក្រសួងមហាផ្ទៃបានឲ្យដឹងនៅថ្ងៃទី២៧ ខែតុលា ឆ្នាំ២០១៥ ថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចបង្កើតគណៈកម្មការហើយ ដើម្បីធ្វើការស្រាវជ្រាវស៊ើបអង្កេតស្វែងរកចាប់ខ្លួនជនសង្ស័យ ដើម្បីបញ្ជូនទៅតុលាការចាត់វិធានការទៅតាមផ្លូវច្បាប់។
ដោយឡែកអ្នកនាំពាក្យក្រសួងមហាផ្ទៃ នាយឧត្តមសេនីយ៍ ខៀវ សុភ័គ បានថ្លែងប្រាប់អ្នកសារព័ត៌មានថា កាលពីព្រឹកថ្ងៃអង្គារ ទី២៧ ខែតុលា រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានសម្រេចបង្កើតគណៈកម្មការមួយ ដែលមានសមាសភាព៧ រូប ដើម្បីស៊ើបអង្កេត និងស្វែងរកចាប់ខ្លួនជនសង្ស័យលើករណីហិង្សាបណ្តាលឲ្យតំណាងរាស្ត្រ២ រូប របស់គណបក្សសង្គ្រោះជាតិរងរបួសធ្ងន់។
នាយឧត្តមសេនីយ៍បន្តថា គណៈកម្មការនេះដឹកនាំដោយ លោក ឯម សំអាន រដ្ឋលេខាធិការក្រសួងមហាផ្ទៃ ដោយមានសមាសភាព ចាប់ពីស្នងការរងរហូតដល់ប្រធាននាយកដ្ឋាន។
គណៈកម្មការស្រាវជ្រាវស៊ើបអង្កេតករណីមនុស្សមួយក្រុមប្រើអំពើហិង្សាលើអ្នកតំណាងរាស្ត្រនោះ គឺមានលោក ឯម សំអាន ជាប្រធាន លោកឧត្តមសេនីយ៍ឯក ឆៃ ស៊ីណារិទ្ធ អគ្គស្នងការរងនគរបាលជាតិ ជាអនុប្រធាន រួមទាំងមន្ត្រីជំនាញពាក់ព័ន្ធមួយចំនួនទៀតជាសមាជិក។
ទាក់ទងបញ្ហានេះ លោក កឹម សន្តិភាព មន្ត្រីអ្នកនាំពាក្យក្រសួងយុត្តិធម៌ បានសរសេរតាមបណ្តាញហ្វេសប៊ុករបស់ខ្លួននៅថ្ងៃទី២៧ ខែតុលា ថា “ការសម្តែងមតិជាសិទ្ធិសេរីភាព ប៉ុន្តែអំពើហិង្សាជាអំពើល្មើសច្បាប់”។ លោកសរសេរទៀតថា កម្ពុជាការពារនូវសិទ្ធិសេរីភាពបញ្ចេញមតិរបស់ពលរដ្ឋ តែសិទ្ធិនេះត្រូវស្ថិតក្នុងក្របខណ្ឌច្បាប់។ អំពើហិង្សាមិនមែនជាសិទ្ធិបញ្ចេញមតិនោះទេ វាជាអំពើល្មើសដែលត្រូវទទួលទោសតាមច្បាប់! អំពើល្មើស ជាកាតព្វកិច្ចរបស់សមត្ថកិច្ចក្នុងការស៊ើបអង្កេតស្វែងរកជនល្មើស! សូមជៀសឆ្ងាយពីអំពើហិង្សា និងសូមចូលរួមសោកស្តាយសម្រាប់ហេតុការណ៍ដែលបានកើតឡើង។
ចំណែករដ្ឋសភាកម្ពុជា ក៏បានចេញសេចក្តីថ្លែងការណ៍មួយផងដែរ ដោយបានធ្វើការថ្កោលទោសចំពោះការប្រើអំពើហិង្សានោះ។ សេចក្តីថ្លែងការណ៍បានលើកឡើងថា កាលពីវេលាថ្ងៃត្រង់ ថ្ងៃទី២៧ ខែតុលា នៅក្បែរវិមានរដ្ឋសភា តាមផ្លូវកែងស្ថានទូតអូស្ត្រាលី មានជនមិនស្គាល់មុខមួយក្រុមបានប្រើអំពើហិង្សាវាយដំទៅលើតំណាងរាស្ត្រចំនួន២ រូបបណ្តាលឲ្យរងរបួសធ្ងន់ និងបានបំផ្លិចបំផ្លាញរថយន្តខូចខាតយ៉ាងច្រើនផងដែរ។
រដ្ឋសភាកម្ពុជាបានបញ្ជាក់ថា រដ្ឋសភានៃព្រះរាជាណាចក្រកម្ពុជាចាត់ទុករាល់ការធ្វើកូដកម្ម កូដកម្មដោយសន្តិវិធី គ្មានអំពើហិង្សា ជាសិទ្ធិរបស់ប្រជាពលរដ្ឋ ហើយសិទ្ធិនេះត្រូវអនុវត្តន៍តាមក្របខណ្ឌច្បាប់។ តែរដ្ឋសភាសូមថ្កោលចំពោះអំពើហិង្សា ដែលរំលោភយ៉ាងធ្ងន់ធ្ងរដល់អភ័យឯកសិទ្ធិតំណាងរាស្ត្រ ដែលបានបញ្ញត្តិដោយរដ្ឋធម្មនុញ្ញ និងច្បាប់ជាធរមាន។ ជាមួយគ្នានោះរដ្ឋសភា ស្នើឲ្យអាជ្ញាធរមានសមត្ថកិច្ច រាជរដ្ឋាភិបាលចាត់វិធានការយ៉ាងម៉ឺងម៉ាត់ ស្រាវជ្រាវចាប់ខ្លួនជនល្មើសយកមកផ្ដន្ទាទោសតាមច្បាប់ជាធរមាន។
តាមព័ត៌មានពីគណបក្សសង្គ្រោះជាតិបានឲ្យដឹងដែរថា កាលពីព្រឹកថ្ងៃទី២៧ ខែតុលា ឆ្នាំ២០១៥ នៅទីស្នាក់ការគណបក្សសង្គ្រោះជាតិបានបើកកិច្ចប្រជុំអចិន្ត្រៃយ៍មួយក្រោមអធិបតីភាពលោក កឹម សុខា ដែលកិច្ចពិភាក្សានោះបានលើកឡើងពីមួយចំនួនដូចជា ករណីធ្វើលិខិតទៅស្ថានទូត និងថ្វាយព្រះមហាក្សត្រ, ស្នើឲ្យដាក់កម្លាំងការពារសុវត្ថិភាព, ឲ្យមេធាវីសិក្សាពីការដាក់ពាក្យបណ្តឹងទៅតុលាការករណីប្រើអំពើហិង្សាលើតំណាងរាស្ត្រទាំង២រូប និងករណីមួយចំនួនទៀត៕
រដ្ឋមន្ត្រីក្រសួងមហាផ្ទៃសម្រេចបង្កើតគណៈកម្មការស្រាវជ្រាវករណីប្រើអំពើហិង្សាលើអ្នកតំណាងរាស្ត្រ២រូប
0 Comments