ភ្នំពេញ ៖ យុវជនម្នាក់ត្រូវបានគេស្គាល់ឈ្មោះ យេន ទិត្យវង្សា មានអាយុ១៨ឆ្នាំ មុខរបរកម្មករសំណង់ មានស្រុកកំណើតនៅភូមិព្រែកយ៉ាត ឃុំប្រធាតុ ស្រុកកំពង់ត្របែក ខេត្តព្រៃវែង បានស្លាប់នៅកន្លែងកើតហេតុ ខណៈពេលដែលជនរងគ្រោះ និងមិត្តភក្ដិត្រូវបានបក្ខពួកម្ខាងទៀតជិះម៉ូតូដេញវាយ ហើយពេលដែលកំពុងជិះម៉ូតូនោះ ក៏មានរថយន្តលុចស៊ីសមួយគ្រឿងបើកកាត់ទទឹងផ្លូវធ្វើឲ្យម៉ូតូជនរងគ្រោះបើកទៅបុក និងបណ្តាលឲ្យជនរងគ្រោះបាក់កស្លាប់ និងអ្នករួមដំណើររបួស៣នាក់។
ហេតុការណ៍នេះបានកើតឡើងនៅវេលាម៉ោង២៣និង៣០នាទីយប់ថ្ងៃទី២១ ខែតុលា ឆ្នាំ២០១៥ នៅតាមបណ្តោយផ្លូវវេងស្រេង ខាងកើតផ្សារឯករាជ្យមួយភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ប្រភពនៅកន្លែងកើតហេតុបានឲ្យដឹងថា នៅមុនពេលកើតហេតុជនរងគ្រោះជិះម៉ូតូម៉ាកលែតពណ៌សឌុបមិត្តភក្ដិ ពាក់ស្លាកលេខភ្នំពេញ1FE6452 និងមួយគ្រឿងទៀតជារបស់មិត្តភក្ដិម៉ាកនិកពណ៌សបិទស្គុតខ្មៅពាក់ស្លាកលេខភ្នំពេញ1CM0733ត្រូវបានក្មេងស្ទាវ៣ម៉ូតូសរុបទាំងអស់៥ម៉ូតូមានគ្នា១០នាក់ បានដេញវាយគ្នាតាមផ្លូវវេងស្រេង លុះមកដល់ចំណុចកើតហេតុក៏មានរថយន្តលុចស៊ីសបានបត់កាត់ទទឹងផ្លូវ ហើយម៉ូតូជនរងគ្រោះបានទៅបុកនឹងរថយន្តលុចស៊ីសចំទទឹងបណ្តាលឲ្យបាក់កស្លាប់ និងម៉ូតូ១គ្រឿងទៀតរងបួស៣នាក់ ចំណែកឯម្ចាស់រថយន្តបានគេចខ្លួនបាត់៕
ក្មេងស្ទាវជិត១០នាក់ជិះម៉ូតូដេញវាយគ្នាតាមផ្លូវ ជ្រុលទៅបុករថយន្តស្លាប់ម្នាក់ របួសធ្ងន់៣នាក់
0 Comments