កោះកុង ៖ ជុំវិញករណីព្រះមហាក្សត្រ នៃព្រះរាជាណាចក្រកម្ពុជា និងព្រះរាជមាតានរោត្តមមុនីនាថ សីហនុ បានសរសេរព្រះរាជសារព្រះរាជទានព្រះរាជដំណាក់ដែលជាព្រះរាជទ្រព្យផ្ទាល់របស់ព្រះករុណា ព្រះបាទនរោត្តមសីហនុ នាសម័យសង្គមរាស្ត្រនិយមទសវត្សទី៦០ ជូនមន្ទីរពេទ្យគន្ធបុប្ផានោះ អភិបាលខេត្តកោះកុងអះអាងថា នៅមិនទាន់ទទួលបានលិខិតនោះជាផ្លូវការនៅឡើយទេ។
លោក ប៊ុន លើត អភិបាល នៃគណៈអភិបាលខេត្តកោះកុងបានថ្លែងថា មកទល់នឹងពេលនេះខាងសាលាខេត្តកោះកុងនៅពុំទាន់បានទទួលនូវលិខិតជាផ្លូវការណាមួយពីព្រះបរមរាជវាំង ដែលថា ព្រះមហាក្សត្រព្រះរាជទានព្រះរាជដំណាក់ជូនទៅមន្ទីរពេទ្យគន្ធបុប្ផានោះឡើយ។
លោកបន្តថា ករណីនេះ លោកគ្រាន់តែបានលឺតាមរយៈការប្រពន្ធផ្សព្វផ្សាយ និងសង្គមហ្វេសប៊ុក រួមទាំងការទូរស័ព្ទមកសួរនាំតាមរយៈអ្នកសារព័ត៌មានតែប៉ុណ្ណោះ។
គួររំលឹកថា កាលពីថ្ងៃទី១៧ ខែតុលា ឆ្នាំ២០១៥កន្លងទៅថ្មីៗនេះ មានលេចចេញនូវព្រះរាជសាររបស់ព្រះមហាក្សត្រ និងព្រះរាជមាតា ដោយព្រះអង្គទាំងទ្វេបានសព្វព្រះហឫទ័យ ព្រះរាជទាន ព្រះរាជដំណាក់នៅខេត្តកោះកុង ដែលជាព្រះរាជទ្រព្យផ្ទាល់របស់ព្រះករុណា ព្រះបាទ នរោត្តម សីហនុ នាសម័យសង្គមរាស្ត្រនិយមទសវត្សទី៦០ជូនមន្ទីរពេទ្យគន្ធបុប្ផា។
ការព្រះរាជទាននេះ គឺដោយសារព្រះអង្គមានព្រះរាជហឫទ័យព្រួយបារម្ភជាខ្លាំង ព្រោះតែមើលឃើញថា មន្ទីរពេទ្យគន្ធបុប្ផានៅរាជធានីភ្នំពេញ ក៏ដូចជានៅខេត្តសៀមរាបកំពុងប្រឈមមុខនឹងការលំបាកផ្នែកហិរញ្ញវត្ថុ៕
អភិបាលខេត្តកោះកុង ៖ នៅពុំទាន់ទទួលបានលិខិតជាផ្លូវការអំពីការប្រទានព្រះរាជដំណាក់ជូនមន្ទីរពេទ្យគន្ធបុប្ផានៅឡើយទេ
0 Comments