ប្រដាល់ ៖ ការប្រកួតកីឡាប្រដាល់ជ្រើសរើសជើងឯកថ្នាក់ជាតិប្រចាំឆ្នាំ២០១៥ កាលពីល្ងាចថ្ងៃទី២២ ខែតុលា បានប្រារព្ធពិធីបើកកម្មវិធីប្រកួតជាផ្លូវការ ក្រោយពីដំណើរការប្រកួតមុនអស់រយៈពេល៤ថ្ងៃកន្លងមកនោះ។
លោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា បានអញ្ជើញចូលរួមបើកកម្មវិធីប្រកួតជាផ្លូវការនេះ ដោយបានសំណូមពរដល់កីឡាករទាំងអស់គោរពបទបញ្ជាការប្រកួត មិត្តភាព និងសាមគ្គីភាព។ ចំពោះគណៈកម្មការបច្ចេកទេស ត្រូវប្រកាន់ខ្ជាប់ខ្លួននូវបទបញ្ជាប្រកួត កាត់សេចក្ដីឲ្យបានត្រឹមត្រូវ មានតម្លាភាព និងយុត្តិធម៌ប្រកបដោយវិជ្ជាជីវៈ។
លោករដ្ឋលេខាធិការបានសង្កត់ធ្ងន់ថា ជាអ្នកកីឡាត្រូវផ្តល់ឲ្យគ្នាទៅវិញទៅមកនូវការគោរព ការស្រឡាញ់ និងចេះរួបរួមសាមគ្គីគ្នា ដោយមិនគិតអំពីអ្នកឈ្នះ ឬអ្នកចាញ់ អ្នកជាប់ចំណាត់ថ្នាក់ ឬអ្នកមិនជាប់ចំណាត់ថ្នាក់នោះឡើយ ពោលទាំងអ្នកជាប់ចំណាត់ថ្នាក់ និងអ្នកមិនជាប់ចំណាត់ថ្នាក់ ត្រូវខិតខំសិក្សាស្វែងយល់ ដើម្បីដកបទពិសោធន៍គ្នាទៅវិញទៅមក ពិសេសត្រូវយកចិត្តទុកដាក់ អំពីលក្ខណៈបច្ចេកទេសដែលគ្រូបង្វឹកបានបង្ហាត់បង្រៀន។
តាមរបាយការណ៍របស់លោកឧត្ដមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជាបានបង្ហាញថា ការប្រកួតប្រដាល់ជើងឯកថ្នាក់ជាតិឆ្នាំ២០១៥នេះ មានស្ថាប័ន ក្រសួង អង្គភាព សមាគម ក្លិបរាជធានី/ខេត្តចូលរួមចំនួន១៨ ដែលមានជាអាទិ៍ សមាគម ក្រសួងការពារជាតិ ក្រសួងមហាផ្ទៃ ខេត្តកណ្ដាល ខេត្តកំពង់ឆ្នាំង កំពង់ស្ពឺ កំពត តាកែវ បាត់ដំបង ពោធិ៍សាត់ ព្រៃវែង ត្បូងឃ្មុំ រតនគិរី រាជធានីភ្នំពេញ ខេត្តសៀមរាប បន្ទាយមានជ័យ ឧត្តរមានជ័យ សមាគមក្រសួងឧស្សាហកម្ម និងសិប្បកម្ម និងមជ្ឈមណ្ឌលសកម្មភាពកម្ចាត់មីនកម្ពុជា។
លោកឧត្ដមសេនីយ៍ តែម ម៉ឺន បានបញ្ជាក់ថា ចំពោះកីឡាករចូលរួមទាំងប្រដាល់សកល និងក្បាច់បុរាណខ្មែរសរុបចំនួន៥៤៥នាក់ (សកល២២៩នាក់ និងក្បាច់បុរាណខ្មែរ៣១៦នាក់)។ ការរៀបចំការប្រកួតចែកចេញជាក្របខ័ណ្ឌ ក១-ក២ ទាំងកីឡាប្រដាល់សកល ទាំងប្រដាល់ក្បាច់បុរាណខ្មែរ ដោយប្រកួតតាមរូបមន្តជម្រុះចាញ់ធ្លាក់ៗតែម្ដង។
បើប្រៀបធៀបឆ្នាំ២០១៤ ឃើញថា មានកីឡាករកើនឡើងដែលក្នុងឆ្នាំកន្លងទៅ ក្រុមចូលរួមមានតែ១៧ក្លិប និងកីឡាករចំនួន៤៦៧នាក់ប៉ុណ្ណោះ។
អ្វីដែលថ្មីសម្រាប់ការប្រកួតប្រដាល់ជើងឯកឆ្នាំនេះ គឺមានកីឡាករថ្នាលជាច្រើនបានចូលរួមប្រកួត និងមានកីឡាការិនីចំនួន៨នាក់ ដែលទាំងនេះជាការត្រៀមរបស់សហព័ន្ធសម្រាប់ការចូលរួមប្រកួតកីឡាSEA Games ឆ្នាំ២០២៣ ដែលកម្ពុជាធ្វើជាម្ចាស់ផ្ទះរៀបចំការប្រកួតនោះ។ គួរបញ្ជាក់ថា ឆ្នាំនេះក៏ដូចជារាល់ឆ្នាំដែរ ការប្រកួតប្រដាល់ជើងឯកថ្នាក់ជាតិនេះ គឺបានប្រើប្រាស់សង្វៀនពីរ ដែលមួយនៅក្នុងសាលដំបូលទូក និងមួយទៀតនៅសាលហ្វឹកហាត់ប្រដាល់ជម្រើសជាតិ។ ការប្រកួតនឹងត្រូវបញ្ចប់នៅថ្ងៃទី២៨តុលាខាងមុខ៕
បើកកម្មវិធីប្រដាល់ជើងឯកជាតិជាផ្លូវការ
0 Comments