ភ្នំពេញ ៖ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភាព និងអធិការកិច្ច និងជាអ្នកតំណាងរាស្ត្រខេត្តស្វាយរៀងបានសម្ដែងនូវការគាំទ្រ និងអរគុណចំពោះសកម្មភាពមនុស្សធម៌ទាំងឡាយណាដែលបានជួយឧបត្ថម្ភគាំទ្រដល់កុមារកំព្រានៅកម្ពុជា។ ការផ្ដល់នូវការគាំទ្រនេះធ្វើឡើងខណៈពេលដែលលោកជំទាវដឹកនាំប្រតិភូជាន់ខ្ពស់ក្នុងជួររាជរដ្ឋាភិបាលអ្នកតំណាងរាស្ត្រ និងក្រសួងទំនាក់ទំនង ព្រមទាំងខាងយុវជនមកពីសហព័ន្ធសហជីពសំឡេងយុវជនខ្មែរអញ្ជើញចុះសួរសុខទុក្ខ និងសំណេះសំណាលជាមួយក្មេងកំព្រានៅមជ្ឈមណ្ឌលខេត្តស្វាយរៀងកាលពីវេលាម៉ោង១០និង៥០នាទីព្រឹក ថ្ងៃទី២៤ ខែតុលា ឆ្នាំ២០១៥។
លោកស្រី ដួង ឡានី ប្រធានមជ្ឈមណ្ឌលកុមារកំព្រាបានបញ្ជាក់ថា ដោយមើលឃើញអំពីបញ្ហា និងការប្រឈមគ្រោះថ្នាក់ផ្សេងៗរបស់កុមារតាមថ្នល់ ទើបបង្កើតឡើងនូវមជ្ឈមណ្ឌលកំព្រានេះឡើង និងមានការជួយបន្ថែមពីអង្គការ សប្បុរសជន ពិសេសលោកជំទាវឧបនាយករដ្ឋមន្ត្រីផ្ទាល់ក៏ដូចអ្នកតំណាងរាស្ត្រមណ្ឌលស្វាយរៀង និងក្រុមការងារចុះជួយខេត្តស្វាយរៀងទាំងអស់ ដែលតែងតែជួយឧបត្ថម្ភដល់កុមារដែលចាប់ផ្ដើមដំបូងគេបង្អស់ គឺផ្ដល់ចំណីអាហារ និងផ្ដល់សុវត្ថិភាពដល់កុមារកំព្រាជារៀងខែរាល់ថ្ងៃ។ ស្ថិតក្នុងស្ថានភាពងាយរងគ្រោះពីការំលោភបំពាន ការកេងប្រវ័ញ្ច និងគ្រោះថ្នាក់ផ្សេងៗ ពិសេសកំព្រាឪពុកម្ដាយ។ ដោយឃើញទុក្ខលំបាករបស់ប្អូនៗកុមារទាំងអស់នេះហើយ ទើបលោកជំទាវឧបនាយករដ្ឋមន្ត្រី សប្បុរសជន និងអង្គការអាសស្បេកាបានផ្ដល់ឲ្យកុមារនៅតាមថ្នល់កុមារងាយរងគ្រោះ និងកុមាររងគ្រោះនៅក្នុងខេត្តស្វាយរឿងទាំងអស់ទទួលបាននូវសុវត្ថិភាព ការថែទាំ គាំទ្រផ្លូវកាយនិងផ្លូវចិត្តដោយផ្ដល់ឲ្យពួកគេមានឱកាសទទួលបាននូវកាអប់រំ ជំនាញវិជ្ជាជីវៈ បំណិនជីវិត សកម្មភាពច្នៃប្រឌិតនានា និងការពារពួកគេពីការរំលោភបំពានគ្រប់រូបភាព ហើយអង្គការនឹងផ្ដល់នូវសេវាវិជ្ជមានមួយឲ្យពួកគេក្លាយជាពលរដ្ឋល្អមួយក្នុងសង្គម។
លោកស្រីបានបន្តទៀតថា មកទល់បច្ចុប្បន្ន អង្គការមានមណ្ឌលសម្រាប់បម្រើសេវាកម្មជូនកុមារតាមថ្នល់ និងកុមារក្រីក្រមកទល់ពេលនេះ កុមារសរុបមានចំនួន៥៨នាក់ និងបុគ្គលិកថែទាំ៩នាក់ អង្គការជួយមិនប្រកាន់ពូជសាសន៍ ពណ៌សម្បុរ សាសនា និងនិន្នាការនយោបាយណាមួយឡើយ។
លោកជំទាវឧបនាយករដ្ឋមន្ត្រី ម៉ែន សំអន បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់អង្គការដែលបានជួយកុមារកំព្រាក្មេងអនាថារស់នៅតាមចិញ្ចើមថ្នល់ មកចិញ្ចឹមបីបាច់ថែរក្សាបណ្ដុះបណ្ដាលបានសិក្សារៀនសូត្រ និងមានមុខជំនាញផ្សេងៗសម្រាប់ជាទន់ប្រកបរបរទៅថ្ងៃអនាគត។
ឆ្លើយតបទៅនឹងសកម្មភាពមនុស្សធម៌ នាឱកាសនោះ លោកជំទាវឧបនាយករដ្ឋមន្ត្រី ម៉ែន សំអន បានថ្លែងនូវការអរគុណចំពោះលោក ឡុង សុផាត ប្រធានសហព័ន្ធសហជីពសំឡេងយុវជនខ្មែរ និងលោកឧត្ដមសេនីយ៍ត្រី កែប សុវណ្ណដារា អនុប្រធាននាយកដ្ឋានចារកិច្ចក្រសួងមហាផ្ទៃ ព្រមទាំងលោកវរសេនីយ៍ទោ មុំាង សុខលុច នាយការិយាល័យប្រឆាំងបទល្មើសព្រហ្មទណ្ឌ កងរាជអាវុធហត្ថរាជធានី ក៏ដូចជាសម្បុរសជនជិតឆ្ងាយក្នុងក្រៅប្រទេសដែលបានចូលរួមបរិច្ចាគថវិកា និងកម្លាំងកាយចិត្តជួយឧបត្ថម្ភគាំទ្រដល់ប្អូនៗកុមារក្នុងមណ្ឌលទាំងអស់ មិនថាតែខេត្តស្វាយរៀង ឬខេត្តរាជធានីដទៃទេ សូមជួយមេត្តាបន្តជួយឧបត្ថម្ភគាំទ្រដល់កុមារកំព្រាស្របតាមទិសដៅកាត់បន្ថយភាពក្រីក្ររបស់រាជរដ្ឋាភិបាល។
លោកជំទាវ ម៉ែន សំអន ក៏បានមានប្រសាសន៍ផ្ដាំផ្ញើដល់កុមារកំព្រាទាំងអស់ ត្រូវខិតខំរៀនសូត្រ ដើម្បីឲ្យក្លាយជាកូនល្អ សិស្សល្អ ពលរដ្ឋល្អ នៅក្នុងសង្គម និងជាទំពាំស្នងឫស្សី។
នៅក្នុងឱកាសនោះ លោកជំទាវ រួមជាមួយគណៈប្រតិភូអមដំណើរបាននាំយកនូវថវិកាជូនដល់ក្មេងកំព្រា៥៨នាក់ ម្នាក់ៗ៤០.០០០រៀល និងគ្រូៗជាបុគ្គលិកថែទាំបង្ហាត់បង្រៀន៩នាក់ ម្នាក់ៗ៥០.០០០រៀល រួមជាមួយគ្រឿងឧបភោគបរិភោគមាន អង្ករ ទឹកសុទ្ធ ជូនមជ្ឈមណ្ឌល រួមនឹងការជួបជុំញាំនំបញ្ចុកជាអាហារថ្ងៃត្រង់ជូនដល់ប្អូនៗក្មួយៗកុមារក្នុងមណ្ឌលបរិភោគមួយពេលទៀតផងដែរ៕
លោកជំទាវ ម៉ែន សំអន គាំទ្រគ្រប់សកម្មភាពមនុស្សធម៌ដែលជួយដល់ក្មេងកំព្រានៅកម្ពុជា
0 Comments