កណ្តាល ៖ មូលដ្ឋានសង្កាត់ព្រែកឫស្សីមានទីតាំងឋិតតាមបណ្តោយផ្លូវជាតិលេខ២ ក្នុងក្រុងតាខ្មៅ ខេត្តកណ្តាល ជាសង្កាត់លេចធ្លោជាងគេក្នុងចំណោមសង្កាត់ទាំង៦នៃខេត្តកណ្តាល។ មូលដ្ឋាននៃការអភិវឌ្ឍមានផ្លូវចាក់បេតុងខ្វាត់ខ្វែង និងប្រព័ន្ធលូបានទុកជាស្នាដៃជូនប្រជាពលរដ្ឋប្រើប្រាស់។
លោក អេង ថន ចៅសង្កាត់ព្រែកឫស្សីបានអនុញ្ញាតឲ្យកម្ពុជាថ្មីផ្តល់បទសម្ភាសន៍ដោយផ្តោតពីសកម្មភាពការអភិវឌ្ឍតាំងពីមានផ្លូវដីលំបាកធ្វើដំណើររហូតដល់បានផ្លូវចាក់បេតុងក្នុងភូមិទាំង៥នាចុងអាណត្តិនេះ។
កម្ពុជាថ្មី ៖ ជម្រាបសួរលោកចៅសង្កាត់ តើអាចបញ្ជាក់បានទេនៅក្នុងការដឹកនាំរបស់លោក មានរយៈពេលប៉ុន្មានឆ្នាំ ? ហើយប្រជាពលរដ្ឋយើងប្រកបមុខរបរអ្វីខ្លះ?
លោក អេង ថន ៖ តួនាទីក្នុងតំណែងចៅសង្កាត់ព្រែកឫស្សីនេះមានរយៈពេល៣០ឆ្នាំមកហើយ ដោយទទួលបានការគាំទ្រច្រើនពីប្រជាពលរដ្ឋយើង។ ក្នុងនោះសង្កាត់ព្រែកឫស្សីមានមន្ត្រីរាជការ១៥ភាគរយ ,កម្មករ១៥ភាគរយ, អ្នកអាជីវករ២០ភាគរយ និងកសិករធ្វើស្រែចម្ការ៥០ភាគរយ ដោយមានចំនួនសរុប១.៩៤៦គ្រួសារ ស្មើនឹងចំនួនមនុស្ស៩៣១៨នាក់។ សង្កាត់ព្រែកឫស្សីយើងខ្ញុំមាន៥ភូមិ គឺភូមិក្រពើហាកើត ,ភូមិក្រពើហា ,ភូមិព្រែកឫស្សី, ភូមិព្រែកអញ្ចាញ, ភូមិព្រែកឫស្សីលិច។
កម្ពុជាថ្មី ៖ ក្នុងការអភិវឌ្ឍមូលដ្ឋានស្របតាមគោលនយោបាយចតុកោណទី២ តើមានការអភិវឌ្ឍអ្វីខ្លះ ដែលបានជំរុញឲ្យសង្កាត់ព្រែកឫស្សីលេចធ្លោជាងសង្កាត់ដទៃក្នុងក្រុងតាខ្មៅនេះ?
លោក អេង ថន ៖ នៅក្នុងភូមិទាំង៥ បានដំណើរការអភិវឌ្ឍហេដ្ឋារចនាសម្ព័ន្ធផ្លូវ ដោយចាក់បេតុងទាំងអស់ក្នុងឆ្នាំ២០១៥ សម្រេចបានផ្លូវចំនួន៥ខ្សែចំពោះភូមិព្រែកអញ្ចាញ។ ផ្លូវបេតុងចំនួន១ខ្សែចំពោះភូមិព្រែកឫស្សី។ ភូមិក្រពើហាទទួលបានចំនួន២ខ្សែ និងភូមិក្រពើហាកើតចំនួន២ខ្សែ ដោយសរុបផ្លូវទាំង១០ខ្សែ ស្មើនឹងប្រវែង៦.៤៤២ម៉ែត្រការ៉េ ដោយសរុបចំណាយទាំងអស់១០.៩៥១៤ដុល្លារ។ ក្នុងនោះការកសាងផ្លូវបេតុងដោយប្រើប្រាស់ថវិកាមូលនិធិអភិវឌ្ឍន៍មូលដ្ឋានសង្កាត់ឆ្នាំ២០១៥មានមួយគម្រោងប្រវែង៣០៣ម៉ែត្រ អស់ទឹកប្រាក់៧៦.៣៣៨២៧១រៀល។ អាចនិយាយបានថា ក្នុងមូលដ្ឋាននៅសេសសល់ផ្លូវដីតិចតួចប៉ុណ្ណោះ។ ក្រៅពីការអភិវឌ្ឍផ្លូវថ្នល់ និងដាក់លូក្នុងមូលដ្ឋាន ចៅសង្កាត់បានជួយដល់ការចំណាយបូជាសពជនអនាថា និងឧបត្ថម្ភដល់គ្រួសារក្រីក្រជាច្រើនទៀត។ លោក អេង ថន ចៅសង្កាត់ព្រែកឫស្សីបន្តថា រដ្ឋបាលសង្កាត់បានយកចិត្តទុកដាក់រក្សាបាននូវសន្តិសុខ , សណ្ដាប់ធ្នាប់ក្នុងមូលដ្ឋាន ដោយរួមសហការល្អជាមួយកងកម្លាំងទាំង៣ ជាពិសេសសហការជាមួយក្រុមប្រជាការពារតាមបណ្តាភូមិទាំង៥ទូទាំងសង្កាត់ចូលរួមយ៉ាងសស្រាក់សស្រាំធ្វើឲ្យបទល្មើសពុំមានកើតឡើងឡើយ។
នៅក្នុងការអនុវត្តគោលនយោបាយភូមិ-សង្កាត់មានសុវត្ថិភាពឆ្នាំ២០១៥នេះ សង្កាត់ព្រែកឫស្សីទទួលបានប័ណ្ណសរសើរជ័យលាភីលេខ១ នៅទូទាំងក្រុងតាខ្មៅ។ ដោយឡែកក្នុងបទសម្ភាសន៍ជាមួយលោក គឹម នី មេភូមិព្រែកអញ្ចាញតំណាងឲ្យប្រជាពលរដ្ឋមូលដ្ឋានបានមានប្រសាសន៍ថា នៅក្នុងភូមិព្រែកអញ្ចាញនៅសល់ផ្លូវដែលមិនទាន់ចាក់ផ្លូវបេតុងចំនួន៤ខ្សែទៀតដែលនឹងគ្រោងកសាងនាឆ្នាំ២០១៧ខាងមុខ។
លោកមេភូមិបានសំដែងនូវទឹកចិត្តត្រេកអរច្រើនដែលសង្កាត់ព្រែកឫស្សីបានអភិវឌ្ឍផ្លូវថ្នល់ចាក់បេតុងនេះឡើងឃើញថា កាត់បន្ថយច្រើនក្នុងការធ្វើដំណើរដែលពីមុនមានការលំបាកតែមកដល់ពេលនេះមានភាពងាយស្រួលច្រើនទាំងការដឹកជញ្ជូនកសិផលទៅកាន់ទីផ្សារ និងការធ្វើដំណើរយប់អធាត្រមានសុវត្ថិភាពច្រើនហើយឆាប់រហ័ស៕
សង្កាត់ព្រែកឫស្សីលេចធ្លោលើការអភិវឌ្ឍលើផ្លូវថ្នល់ក្នុងមូលដ្ឋាន
0 Comments