កំពង់ធំ ៖ ក្នុងនាមក្រុមការងារថ្នាក់កណ្ដាល ចុះជួយខេត្តកំពង់ធំ លោកបណ្ឌិតងួន ញ៉ិល អនុប្រធានទី២រដ្ឋសភា អមដំណើរដោយអស់លោក លោកស្រី ជាទីប្រឹក្សា ព្រមទាំងក្រុមការងារចុះជួយស្រុកបារាយណ៍ កាលពីព្រឹកថ្ងៃទី២៣ ខែតុលា ឆ្នាំ២០១៥ បានអញ្ជើញចូលរួមរំលែកទុក្ខ និងគោរពវិញ្ញាណក្ខន្ធសពព្រះគ្រូមេគុណចរិយានុរ័ក្ខ លឿង ហ៊ំ ព្រះអនុគណស្រុកបារាយណ៍ និងជាព្រះវិន័យគណខេត្តកំពង់ធំ និងជាចៅអធិការវត្តព្រៃតាត្រាវ ដែលបានទទួលអនិច្ចធម្មកាលពីវេលាម៉ោង៨ និង១៥នាទីយប់ ថ្ងៃចន្ទ ៧ កើត ខែអស្សុជ ឆ្នាំមមែ សប្តស័ក ព.ស ២៥៥៩ ត្រូវនិងថ្ងៃទី ១៩ ខែតុលាឆ្នាំ២០១៥ ដោយរោគាពាធក្នុងជន្មាយុ៧៧ព្រះវស្សា។
នៅឯវត្តព្រៃតាត្រាវ ស្ថិតនៅភូមិព្រៃតាត្រាវ ឃុំបល្ល័ង្កស្រុកបារាយណ៍ ខេត្តកំពង់ធំ លោកបណ្ឌិត ងួន ញិលអនុប្រធានទី២រដ្ឋសភា និងជាប្រធានក្រុមការងារថ្នាក់កណ្ដាលចុះជួយខេត្តកំពង់ធំ និងមន្ត្រីក្រោមឱវាទ បានសម្ដែងការសោកស្ដាយយ៉ាងខ្លាំងបំផុត ចំពោះការបាត់បង់ជីវិតរបស់ ព្រះគ្រូចរិយានុរ័ក្ខ លឿង ហ៊ំ នាពេលនេះ។ មរណភាពរបស់ ព្រះគ្រូមេគុណចរិយានុរ័ក្ខ លឿង ហ៊ំ គឺជាការបាត់បង់ដ៏ធំបំផុតនៅក្នុងរង្វង់ក្រុមគ្រួសារ។ ជាមួយគ្នានោះដែរលោក បណ្ឌិត ងួន ញ៉ិល ព្រមទាំងអស់ លោកស្រីជាសហការី បាននាំយកថវិកាចំនួន ៣២លានរៀល ក្នុងនោះថវិកាផ្ទាល់របស់លោកបណ្ឌិត ងួន ញ៉ិល ចំនួន៥ពាន់ដុល្លា ចូលរួមបុណ្យសពព្រះគ្រូចរិយានុរ័ក្ខ លឿង ហ៊ំ នាពេលនោះផងដែរ។
ជាមួយនោះដែរក្រុមគ្រួសារ នៃសពបានសម្ដែងគារវកិច្ច និងអំណរគុណយ៉ាងជ្រាលជ្រៅចំពោះ លោកបណ្ឌិត អនុប្រធានទី២រដ្ឋសភា និងក្រុមការងារទាំងអស់ ដែលបានចំណាយពេលដ៏មានតម្លៃ និងនាំយកថវិកាដ៏សប្បុរសមកចូលរួមរំលែកទុក្ខជាមួយក្រុមគ្រួសារ នៃសព៕
អនុប្រធានទី២រដ្ឋសភា អញ្ជើញចូលរួមគោរពវិញ្ញាណក្ខន្ធសព ព្រះអនុគណស្រុកបារាយណ៍ខេត្តកំពង់ធំ
0 Comments