បន្ទាយមានជ័យ ៖ នាព្រឹកថ្ងៃទី២៤ ខែតុលា ឆ្នាំ២០១៥ ក្នុងភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ សិក្ខាកាមជានាយទាហាន និងពលទាហានចំនួន២៥០នាក់ ស្រី១២នាក់បានចូលរួមធ្វើពិធីបិទវគ្គបំប៉នបាញ់គ្រាប់ពិតដើម្បីពង្រឹងដល់វរសេនាតូចរៀបរយ។ ពិធីបិទវគ្គបំប៉នបាញ់គ្រាប់ពិតនេះមានការចូលរួមលោក គោស៊ុំ សារឿត អភិបាលខេត្តបន្ទាយមានជ័យ លោកឧត្ដមសេនីយ៍ទោ អុង មុន្នី អគ្គនាយកដ្ឋានព័ត៌មាន លោកឧត្ដមសេនីយ៍ទោ ឈៀង ធារិទ្ធមេបញ្ជាការកងពលលេខ៥១ លោកឧត្ដមសេនីយ៍ត្រី ភ្លន់ តារា មេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ។
លោក ភ្លន់ តារា បានមានប្រសាសន៍ថា ក្នុងពិធីបំប៉នបាញ់គ្រាប់ពិតដល់សិក្ខាកាមទាំង២៥០នាក់នេះមានរយៈពេល៤៧ថ្ងៃ ក្នុងការហ្វឹកហាត់បាញ់គ្រាប់ពិតកន្លងមកនោះ ក្នុងគោលបំណងពង្រឹងជំនាញបច្ចេកទេសយោធា សំដៅបង្កើនសមត្ថភាពយល់ដឹងបន្ថែមលើនេះទៀត។
លោក ភ្លន់ តារា បាននិយាយបន្តទៀងថា សិក្ខាកាមដែលចូលរួមហ្វឹកហាត់បាញ់គ្រាប់ពិតនេះដែរដើម្បីយកចំណេះដឹងទាំងអស់ទៅការពារតាមខ្សែក្រវាត់ព្រំដែន ការពារបូរណភាពទឹកដី និងទាំងការងារសន្តិសុខសង្គម សណ្ដាប់ធ្នាប់សាធារណៈផងដែរ និងសិក្ខាកាមទាំងអស់ត្រូវធ្វើការទំនាក់ទំនងល្អជាមួយស្ថាប័នមានសមត្ថកិច្ច អាជ្ញាធរដែនដីគ្រប់លំដាប់ថ្នាក់ជាដើម។
លោក ភ្លន់ តារា បាននិយាយបន្តទៀតថា ដំណើរការបើកវគ្គហ្វឹកហ្វឺនកន្លងមកនេះបានចំនួន៩វគ្គ ដែលមានកំលាំងចូលរួម៤៤០នាក់ ខ្លឹមសារហ្វឹកហ្វឺននេះមានលំហាត់របៀបយុទ្ធវិធីថ្មើរជើង បច្ចេកទេសអាវុធ អប់រំចិត្តសាស្ត្រ កាយវិការតម្រង់ស៊ីបលេខ៤A អប់រំសុខភាព បាញ់គ្រាប់ពិត របៀបសង្គ្រោះបន្ទាន់ និងយ៉េនឌ័រជាដើម លទ្ធផលបញ្ចប់វគ្គនេះនិទ្ទេសល្អមានចំនួន១០៣នាក់និទ្ទេសល្អបង្គួរ៩៣នាក់ និងនិទ្ទេសមធ្យមមានចំនួន៥៤នាក់។
លោកបាននិយាយបន្តទៀតថា ក្នុងឆ្នាំ២០១៥កន្លងមកនេះ តំបន់ប្រតិបត្តិការសឹករងខេត្តបន្ទាយមានជ័យបានអនុវត្តតាមផែនការបានចំនួន១០វគ្គកន្លងមកហើយបង្រៀនដោយយោធាចារ្យដែលមានទេពកោសល្យខ្ពស់ធ្វើឲ្យការហ្វឹកហាត់ដល់កម្មសិក្សាការីភាគច្រើនស្រូលស្តាប់ និងងាយយល់ ទើបសិក្ខាកាមទាំងអស់រៀនឆាប់ចេះ។
ក្នុងបិទវគ្គបំប៉នបាញ់គ្រាប់ពិតនោះដែរ សិក្ខាកាមទទួលបានប័ណ្ណសរសើរមានចំនួន១៩នាក់និងបំពាក់សក្ដិដល់នាយទាហាន និងពលទាហានពីសក្ដិ១ដល់សក្ដិ៣មានចំនួន១៤០នាក់ដែលមានស្នាដៃឆ្នើមក្នុងការបាញ់គ្រាប់ពិតនេះ៕
បិទវគ្គបំប៉នហ្វឹកហ្វឺនបាញ់គ្រាប់ពិត ដើម្បីពង្រឹងវរសេនាតូចរៀបរយក្នុងតំបន់ប្រតិបត្តិការសឹករងខេត្តបន្ទាយមានជ័យ
0 Comments