ប្រដាល់ ៖ ក្រុមហ៊ុនគូបូតា(ខេមបូឌា)សហការជាមួយស្ថានីយទូរទស្សន៍បាយ័ន និងសហព័ន្ធកីឡាប្រដាល់កម្ពុជា បង្កើតព្រឹត្តិការណ៍ប្រកួតដណ្ដើមខ្សែក្រវាត់គូបូតារដូវកាលថ្មី ដែលប្រសិទ្ធិនាមថា“ជើងឯកប្រដាល់លេខ១គូបូតាវគ្គ៤” ទម្ងន់៦៩គីឡូក្រាម ដែលមានអ្នកប្រដាល់ជើងខ្លាំងចំនួន៤រូបចូលរួមប្រកួត។
នៅក្នុងសន្និសីទសារព័ត៌មានកាលពីល្ងាចថ្ងៃអាទិត្យទី២៥ ខែតុលា ឆ្នាំ២០១៥ នៅសង្វៀនបឹងស្នោ លោក ឆា លឺមឆៃ គីទីប៊ុនតន អគ្គនាយកក្រុមហ៊ុនគូបូតា(ខេមបូឌា) មានប្រសាសន៍ថា តាមរយៈការគាំទ្រយ៉ាងពេញទំហឹងរបស់បងប្អូនអ្នកស្នេហាវិស័យកីឡាប្រដាល់ក្បាច់គុនបុរាណខ្មែរទាំងជាតិនិងអន្តរជាតិ ចំពោះកម្មវិធីប្រដាល់ដែលរៀបចំឡើងដោយ គូបូតា បីវគ្គជាប់ៗគ្នា ជាពិសេសគឺ “ជើងឯកប្រដាល់លេខ១ គូបូតា វគ្គខ្លាំងប៉ះខ្លាំង”ដែលទើបបញ្ចប់ទៅនោះ បានជំរុញឲ្យយើងខ្ញុំសម្រេចធ្វើការឧបត្ថម្ភទាំងស្រុងបន្តទៀត ដើម្បីនាំមកនូវការប្រកួតកាន់តែស្វិតស្វាញ និងកាន់តែអស្ចារ្យមកបំពេញការទទូចចង់បានរបស់អ្នកគាំទ្រ។
លើសពីនេះទៅទៀត ការឧបត្ថម្ភកម្មវិធីប្រដាល់នេះធ្វើឡើង ដើម្បីលើកស្ទួយវិស័យកីឡាប្រដាល់ក្បាច់បុរាណខ្មែរ ឲ្យកាន់តែល្បីថែមទៀតនៅក្នុងប្រទេសកម្ពុជា ក៏ដូចជាបង្ហាញស្នៀតប្រដាល់បុរាណខ្មែរទៅឲ្យអ្នកស្នេហាវិស័យកីឡាទាំងអស់បានឃើញ និងចង់ឲ្យកូនខ្មែរជំនាន់ក្រោយបន្ដថែរក្សាក្បាច់បុរាណដ៏មានតម្លៃមួយនេះ។
លោក ពេជ្រ អំបូពង្ស អ្នកគ្រប់គ្រងទូទៅរបស់ក្រុមហ៊ុនគូបូតា(កម្ពុជា)បានឲ្យដឹងដែរថា ការបន្ដកម្មវិធីប្រដាល់នេះ គឺដើម្បីចូលរួមផ្សព្វផ្សាយក្បាច់បុរាណខ្មែរឲ្យមានការរីកចម្រើនកាន់តែខ្លាំងឡើងៗ និងល្បីសុសសាយពេញសកលលោកផងដែរ។ យើងជឿជាក់ថាកម្មវិធីប្រដាល់នេះ នឹងអាចបម្រើអារម្មណ៍ក៏ដូចជាទទួលបានការគាំទ្រពីសំណាក់ប្រជាជនកម្ពុជាជាក់ជាមិនខាន។ លោកបន្តថា អ្នកស្នេហាកីឡាប្រដាល់ក្បាច់គុនបុរាណខ្មែរទាំងអស់ អាចអញ្ជើញទៅទស្សនាការប្រកួតនេះ ដោយផ្ទាល់នៅសង្វៀនបឹងស្នោ ឬតាមរយៈការផ្សាយផ្ទាល់លើកញ្ចក់ទូរទស្សន៍ ប៊ីធីវី រៀងរាល់ថ្ងៃអាទិត្យ ពីម៉ោង១ ដល់ម៉ោង៣រសៀល ចាប់ពីថ្ងៃទី១៥ ខែវិច្ឆិកា ឆ្នាំ២០១៥ តទៅ។
លោក នាង ស៊ីវុត្ថា អ្នកគ្រប់គ្រប់កម្មវិធីប្រដាល់ប្រចាំនៅស្ថានីយបាយ័នបានបញ្ជាក់ឲ្យដឹងថា វគ្គនេះខុសពីវគ្គមុនៗ និងខុសពីកម្មវិធីប្រដាល់ផ្សេងៗ វគ្គនេះត្រូវបានបង្កើតឡើង ដើម្បីនាំមកនូវការប្រកួតដ៏កក្រើកលើសពេលណាៗទាំងអស់។ កំពូលកីឡាករជើងខ្លាំងទម្ងន់៦៩គីឡូក្រាមចំនួន៤ រូប គឺកីឡាករ វង្ស ណយ កីឡាករ ឡៅស៊ីណាត កីឡាករ ម៉ឺន សុភា និងកីឡាករ ឡុង សុវណ្ណឌឿន ត្រូវបានជ្រើសរើសមកប្រកួតគ្នានៅលើសង្វៀនតែមួយ។
លោកឧត្ដមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជាបានប្រកាសថា លោកនឹងអនុវត្តតាមបទបញ្ជាប្រកួត ដែលប្រការសំខាន់ កីឡាករដែលបោះបង់ការប្រកួតដោយគ្មានមូលហេតុច្បាស់លាស់នោះ នឹងឲ្យចាញ់ដោយស្វ័យប្រវត្តិ។ ជាមួយគ្នានេះ លោកបានជំរុញឲ្យមន្ត្រីបច្ចេកទេស អាជ្ញាកណ្ដាល ចៅក្រម ត្រូវតែប្រកាន់ជំហរអព្យាក្រឹត យុត្តិធម៌ ត្រឹមត្រូវក្នុងការកាត់សេចក្តីឈ្នះចាញ់ ដើម្បីឲ្យមហាជនមានជំនឿទុកចិត្តបាន។ ចំពោះកីឡាករវិញ ត្រូវតែធ្វើខ្លួនឲ្យបានល្អ គោរពឲ្យបានដាច់ខាតនូវវិន័យ សីលធម៌ ពិសេសត្រូវរក្សាទម្ងន់របស់ខ្លួន៦៥គ.ក្រ ឲ្យបានល្អ។
គួរបញ្ជាក់ថា អ្នកប្រដាល់ទាំង៤រូបនេះ នឹងត្រូវប្រកួតគ្នាតាមរូបមន្តជម្រុះវិលជុំសន្សំពិន្ទុ ដោយក្នុងម្នាក់ៗ ត្រូវប្រកួតជាមួយគ្នាចំនួន៣ប្រកួតម្នាក់ ដោយជម្រុះចោល២នាក់ និងទុក២នាក់ដែលមានពិន្ទុច្រើនខ្ពស់ជាងគេ នឹងបានឡើងទៅប្រកួតផ្ដាច់ព្រ័ត្រតែម្ដង ដែលតំណែងជើងឯកម្ចាស់ខ្សែក្រវាត់ នឹងទទួលបានរង្វាន់អម៤.០០០ដុល្លារ ឯលេខ២បាន២.០០០ដុល្លារ។
ការប្រកួតជម្រុះជុំដំបូង នឹងត្រូវចាប់ផ្ដើមនៅថ្ងៃទី១៥ ខែវិច្ឆិកា ឆ្នាំ២០១៥ ដោយក្នុងមួយសប្ដាហ៍ៗ មានមួយគូ ដែលគូដំបូងនោះ គឺម៉ឺន សុភា ត្រូវជួបជាមួយឡុង សុវណ្ណឌឿន៕
វង្ស ណយ, ឡៅ ស៊ីណាត, ម៉ឺន សុភា និងឡុង សុវណ្ឌឌឿន ជួបគ្នាដណ្ដើមខ្សែក្រវាត់ "ជើងឯកប្រដាល់លេខ១គូបូតា”វគ្គ៤
0 Comments