ភ្នំពេញ ៖ ប្រជាពលរដ្ឋក្រីក្រ១៤០គ្រួសាររស់នៅក្នុងភូមិ៣ក្នុងសង្កាត់សំរោងបានទទួលអំណោយធុងចម្រោះទឹកស្អាត និងម៉ុងពីអង្គការជួយកុមារក្រីក្រនៅអាស៊ី ដែលមានការចូលរួមពីលោកស្រីសួន ចាន់ណារី និងមន្ត្រីសាលាសង្កាត់ព្រមទាំងមន្ត្រីអង្គការជាច្រើននាក់ទៀតផងដែរ នៅក្នុងវិទ្យាល័យសម្ដេចអគ្គមហាសេនាបតីតេជោ ហ៊ុន សែន ស្ថិតក្នុងខណ្ឌព្រែកព្នៅ រាជធានីភ្នំពេញ កាលពីថ្ងៃទី២៥ ខែតុលា ឆ្នាំ២០១៥នេះ។
ដោយមើលឃើញពីការកង្វះខាតទឹកស្អាត និងអនាម័យក្នុងការប្រើប្រាស់ជីវភាពប្រចាំថ្ងៃរបស់ប្រជាពលរដ្ឋក្រ១ ក្រ២ និងក្រ៣ក្នុងសង្កាត់សំរោងដែលមានភូមិសំរោងត្បូង ភូមិសំរោងកណ្ដាល និងភូមិគ្រោះនោះ អង្គការជួយកុមារក្រីក្រអាស៊ី សហការជាមួយសាលាសង្កាត់សំរោងបានចែកអំណោយជាធុងចម្រោះទឹកស្អាត និងម៉ុងចំនួន១៤០ ដើម្បីឲ្យប្រជាពលរដ្ឋប្រើប្រាស់ជៀសឆ្ងាយពីជំងឺដង្កាត់ផ្សេងៗ។
ក្នុងឱកាសចែកធុងចម្រោះទឹកស្អាត និងម៉ុងព្រមទាំងសាប៊ូដុសខ្លួន នាខណៈនោះលោក សាត សាម៉េត នាយកអង្គការសង្គ្រោះកុមារក្រីក្រនៅអាស៊ីបានលើកឡើងថា លោកសប្បាយចិត្តដែលបាននាំយកអំណោយអង្គការ មកចែកជូនប្រជាពលរដ្ឋក្រ១ ក្រ២ និងក្រ៣ក្នុងសង្កាត់សំរោងនាពេលនេះ។
លោកបន្តថា ថ្វីត្បិតតែអំណោយទាំងនេះវាតិចតួចមែន ប៉ុន្តែវាចំបាច់ណាស់សម្រាប់បងប្អូនប្រើប្រាស់ជារៀងរាល់ថ្ងៃ ព្រោះបើយើងមិនមានទឹកស្អាតបរិភោគនោះទេ វានឹងបង្កឲ្យបងប្អូនប្រជាពលរដ្ឋអាចកើតនូវជំងឺផ្សេងៗដែលអាចខាតពេលវេលា និងប្រាក់កាសជាច្រើនទៀតផងក្នុងការព្យាបាលជំងឺនោះ។
នាខណៈនោះដែរលោកយិន អ៊ីម ចៅសង្កាត់សំរោងបានមានប្រសាសន៍ឲ្យដឹងថា ចាប់ពីថ្ងៃនេះពេលនេះទៅ យើងត្រូវចូលរួមលុបបំបាត់ ភាពក្រីក្រ និងភាពល្ងង់ខ្លៅជាមួយគ្នា ដោយប្រជាពលរដ្ឋទាំងអស់ត្រូវប្រើប្រាស់ទឹកស្អាត និងបញ្ជូនកូនទៅសាលារៀនឲ្យបានគ្រប់គ្នា ដើម្បីអភិវឌ្ឍប្រទេសជាតិយើង ឲ្យបានរុងរឿងជាលំដាប់។
ជាមួយគ្នានោះផងដែរលោកក៏បានផ្តាំផ្ញើ និងជំរុញឲ្យសិស្សានុសិស្សទាំងអស់ត្រូវខិតខំរៀនសូត្រ ចាប់ពីថ្នាក់ដំបូងរហូតដល់វិទ្យាល័យ និងបន្តទៅសាកលវិទ្យាល័យទៀតឲ្យបានគ្រប់គ្នា ខណៈដែលរាជរដ្ឋាភិបាលកម្ពុជាបានកំណែទម្រង់វិស័យអប់រំតាមរយៈការរឹតបន្តឹងពេលប្រឡងនោះ។ លោកបន្តថា បងប្អូនប្រជាពលរដ្ឋទាំងអស់ត្រូវណែនាំកូនរបស់ខ្លួនកុំឲ្យគេចសាលា និងប្រព្រឹត្តអំពើអបាយមុខផ្សេងៗដូចជា ការសេពគ្រឿងញៀន បងតូចបងធំ ល្បែងស៊ីសង និងចូលក្លិបរាំលេងកម្សាន្ត ភ្លេចការរៀនសូត្រឲ្យសោះ ជាមួយគ្នានោះផងដែរអាណាព្យាបាលត្រូវដាស់តឿនឲ្យកុលបុត្រគ្រប់រូបប្រតិបត្តិច្បាប់ចរាចរណ៍ឲ្យបានខ្ជាប់ខ្ជួនដោយត្រូវយោគយល់ និងមានអធ្យាស្រ័យគ្នាទៅវិញទៅមក ដើម្បីធានាបាននូវសុវត្ថិភាពផ្ទាល់ខ្លួនឯង និងអ្នកដទៃក៏ដូចជារក្សាបាននូវសេចក្ដីថ្លៃថ្នូរដល់សង្គមជាតិទាំងមូលផងដែរ។
ជាចុងក្រោយលោក យិម អ៊ីម បានអំពាវនាវសូមឲ្យយុវជន និងប្រជាពលរដ្ឋទាំងអស់ដែលមានលទ្ធភាព គួរចូលរួមធ្វើសកម្មភាពមនុស្សធម៌ពោលគឺខ្មែរត្រូវតែជួយខ្មែរ ដើម្បីអនាគតសម្រាប់កូនខ្មែរទាំងអស់គ្នា។ ជាងនេះទៅទៀតគួរយកចិត្តទុកដាក់ក្នុងការជួយដល់អ្នកដែលគ្មានទីពឹង ដើម្បីឲ្យជីវិតខ្មែរគ្រប់រូបរស់នៅដោយសេចក្ដីសុខក្នុងដំបូលសុខសន្តិភាពតែមួយជាមួយគ្នា៕
ប្រជាពលរដ្ឋ៣ភូមិទទួលអំណោយពីអង្គការជួយកុមារក្រីក្រអាស៊ី
0 Comments