ប្រទេសហ្វីលីពីន បានលុបចោលជើងហោះហើរ និងប្រកាសអាសន្ននៅតាមមន្ទីរពេទ្យ កាលពីថ្ងៃ អាទិត្យម្សិលមិញ ខណៈដែលតំបន់កោះស្ថិតនៅភាគកណ្តាល និងខាងត្បូងប្រទេសគ្របដណ្តប់ដោយផ្សែងអ័ព្ទយ៉ាងក្រាស់ ដែលបណ្តាលមកពីភ្លើងឆេះព្រៃ នៅក្នុងប្រទេសឥណ្ឌូណេស៊ី។
ផ្សែងអ័ព្ទ ដែលបង្កឡើងដោយសារការកាប់បំផ្លាញព្រៃឈើ ធ្វើកសិកម្មនៅក្នុងប្រទេសឥណ្ឌូណេស៊ី បានបង្កភាពវឹកវរអស់រយៈពេលជាច្រើនសប្តាហ៍មកហើយ នៅតំបន់អាស៊ីអាគ្នេយ៍ ដោយបានសម្លាប់មនុស្សយ៉ាងហោច ១០ នាក់ និងបង្ខំឲ្យលុបចោលព្រឹត្តិការណ៍សង្គម កីឡា ហើយសាលារៀនត្រូវបានបិទទ្វារ នៅទូទាំងតំបន់។
ដោយឡែកកិច្ចខិតខំអន្តរជាតិ ដើម្បីទប់ស្កាត់ភ្លើងឆេះព្រៃ ហាក់ដូចជាទទួលបានផលតិចតួចខ្លាំងណាស់ ហើយនៅតែមិនអាចធ្វើឲ្យបរិយាកាសល្អប្រសើរឡើងវិញដដែល ខណៈដែលក្រុមអាជ្ញាធរហ្វីលីពីន បានប្រកាសអាសន្ន ពីកម្រិតគ្រោះថ្នាក់នៃផ្សែងអ័ព្ទនៅតាមតំបន់កោះ ភាគខាងត្បូង។
លោក ហ៊ឺមីនីញ៉ូ កូឡុំម៉ា អ្នកនាំពាក្យប្រធានាធិបតីហ្វីលីពីន បាននិយាយប្រាប់ក្រុមអ្នកសារព័ត៌មានថា មន្ទីរសុខាភិបាល បានណែនាំឲ្យអ្នក ដែលមានបញ្ហាផ្លូវដង្ហើម ត្រូវពាក់ម៉ាស់។
លោកបានបន្តទៀតថា មន្ទីរពេទ្យនៅតំបន់ភាគខាងត្បូង បានត្រៀមរួចរាល់ ដើម្បីទទួលព្យាបាលអ្នក ដែលរងផលប៉ះពាល់ដោយសារផ្សែងអ័ព្ទ៕
ហ្វីលីពីនលុបចោលជើងហោះហើរ ស្របពេលដែលមានវិបត្តិផ្សែងអ័ព្ទបង្កឡើងដោយសារភ្លើងឆេះព្រៃនៅឥណ្ឌូណេស៊ី
0 Comments