ភ្នំពេញ ៖ បណ្តាញសង្គមហ្វេសប៊ុក (Facebook Page) របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បច្ចុប្បន្នមានអ្នកចុច Like រហូតដល់ជិត១,៣ លាននាក់ហើយ ចំណែកក្រុមហ៊ុនទំនាក់ទំនងសង្គម Facebook បានផ្តល់ចំណាត់ថ្នាក់ជាមេដឹកនាំកំពូលចំនួន១០ រូប (Top 10) នៃ Facebook Pages របស់មេដឹកនាំលើពិភពលោក ដែលមានសកម្មភាពរស់រវើក នឹងមានអ្នកចូលមើល និងចុច Like, comment និង Share ជាច្រើនជាងគេ។
ការផ្តល់ចំណាត់ថ្នាក់នេះ ត្រូវបានក្រុមហ៊ុនទំនាក់ទំនងសង្គម Facebook ផ្ញើសារជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី២៧ ខែតុលា ឆ្នាំ២០១៥។
នៅក្នុងអ៊ីម៉ែលផ្លូវការរបស់ក្រុមហ៊ុន Facebook ដែលបានផ្ញើជូនសម្តេចតេជោ ហ៊ុន សែន សរសេរជាភាសាអង់គ្លេស ហើយត្រូវបានបកប្រែក្រៅផ្លូវការដោយកម្ពុជាថ្មីថា “ឯកឧត្តមនាយករដ្ឋមន្ត្រី ហ៊ុន សែន ជាទីគោរព ! ឯកឧត្តមប្រហែលជាបានកត់សម្គាល់ឃើញថា ទំព័រហ្វេសប៊ុករបស់ឯកឧត្តមត្រូវបានប្រតិបត្តិការបានយ៉ាងល្អនៅសប្តាហ៍នេះ។ ក្រុមការងាររបស់ខ្ញុំបានប្រាប់ខ្ញុំថា ឯកឧត្តម គឺជាមេដឹកនាំកំពូលមួយរូប ក្នុងចំណោមមេដឹកនាំកំពូលលើពិភពលោកចំនួន១០ រូប ដែលមានសកម្មភាពទៅវិញទៅមក ដូចជាការចូលចិត្ត ការបញ្ចេញយោបល់ និងចែករំលែកតៗគ្នានូវព័ត៌មានផ្សេងៗ។ ការផ្ទៀងផ្ទាត់ និងការរួមបញ្ចូលនៃគណនីហ្វេសប៊ុករបស់ឯកឧត្តម បានផ្ដល់ជាជំនួយស្របពេលមនុស្សចាប់ផ្តើមទស្សនា។
ទំព័ររបស់ឯកឧត្តម សម្រាប់ព័ត៌មានថ្មីៗ ផ្លូវការចុងក្រោយរបស់ឯកឧត្តម។ យើងខ្ញុំសូមសម្ដែងការអបអរសាទរចំពោះឯកឧត្តមនាយករដ្ឋមន្ត្រី។ សូមអនុញ្ញាតឲ្យខ្ញុំ និងក្រុមការងាររបស់ខ្ញុំ បានដឹងថា តើយើងខ្ញុំអាចជួយឯកឧត្តម ធ្វើឲ្យកាន់តែល្អប្រសើរឡើង ក្នុងការចែកចាយព័ត៌មានដល់ប្រជាជន និងមិត្តភក្តិរបស់ឯកឧត្តមនៅក្រៅប្រទេស ដោយរបៀបណា។ សូមទទួលយកនូវសេចក្ដីគោរពដ៏ខ្ពង់ខ្ពស់អំពីយើងខ្ញុំ, ក្រុមហ៊ុនហ្វេសប៊ុក Alvin Sheng Hui Tan ប្រធានច្បាប់សាធារណៈ ប្រចាំតំបន់អាស៊ីអាគ្នេយ៍”។
គួរបញ្ជាក់ថា បណ្តាញសង្គម Facebook របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានឈ្មោះថា Samdech Hun Sen, Cambodian Prime Minister បច្ចុប្បន្នមានអ្នកចុច Like រហូតដល់ជិត១,៣ លាននាក់ហើយ នៅក្នុងបណ្តាញសង្គមនេះ បានសរសេរព័ត៌មានជាច្រើនទាក់ទងសង្គម និងការអភិវឌ្ឍន៍ ព្រមទាំងនយោបាយទាំងក្រុង និងក្រៅប្រទេស ដែលធ្វើឲ្យមហាជនអ្នកលេងហ្វេសប៊ុកដូចគ្នា មានចំណាប់អារម្មណ៍យ៉ាងខ្លាំង ហើយបានចុច Like Shere និងComment ស្ទើរគ្រប់ៗគ្នា៕
ទំព័រ Facebook សម្តេចតេជោ ហ៊ុន សែន ជាប់ចំណាត់ថ្នាក់ Top 10 នៃមេដឹកនាំលើពិភពលោក
0 Comments