ប្រដាល់ ៖ ការប្រកួតប្រដាល់ដណ្ដើមខ្សែក្រវាត់ជើងឯកTIFFY SUPER FIGHT ទម្ងន់៦០គីឡូក្រាមលើសង្វៀន TV5 Arena នៅថ្ងៃអាទិត្យ ទី០១ ខែវិច្ឆិកា ឆ្នាំ២០១៥ខាងមុខនេះ ជាការប្រកួតជម្រុះលើកចុងក្រោយក្នុងដំណាក់កាលទី៣ហើយ។
អ្នកប្រដាល់ដែលត្រូវជួបគ្នាលើកចុងក្រោយនេះ គឺ ឡុង សំណាង ក្លិបសាលវ័ន្តកីឡា ,ថន ភឿត ក្លិបឃ្លាំងមឿងកីឡា,ធន់ ចាន់តាក់ ក្លិបមជ្ឈមណ្ឌលកីឡា ខ.ភ.ម និងឌុន ប៊ុនធឿន ក្លិបខេត្តព្រៃវែង។ ការប្រកួតក្នុងដំណាក់ទី៣នេះ ក៏ប្រកួតតែបីទឹកដែរ។
ដំណាក់កាលទី៣នេះ មានអ្នកប្រដាល់ចំនួន៨រូប ដែលបានឈ្នះក្នុងការប្រកួតជម្រុះដំណាក់កាលទី២នោះ។ កាលពីចុងសប្ដាហ៍កន្លងមក អ្នកប្រដាល់ពីររូបបានជ្រុះធ្លាក់ហើយ គឺឃីម សាវ៉េត ក្លិបព្រះខ័នរាជ និងផា សុផាតនិល ក្លិបពន្លឺសាមគ្គីខេត្តបាត់ដំបង។ ឯអ្នកឡើងទៅប្រកួតបន្ត គឺផៃ គឹមហឿត ក្លិបគីសែមានរិទ្ធ និងញ៉េ សិទ្ធ ក្លិបអេភូថងកីឡា។ ដូច្នេះនៅចុងសប្ដាហ៍ខាងមុខនេះ នឹងមានពីរនាក់ទៀតដែលត្រូវនៅបន្តការប្រកួតទៀត និងពីរនាក់ដែលត្រូវជ្រុះធ្លាក់ចេញពីការប្រកួតនេះ ។
សម្រាប់ការប្រកួតជម្រុះដំណាក់កាលទី៣លើកចុងក្រោយ ថ្ងៃទី០១ ខែវិច្ឆិកានេះ ក្នុងចំណោម ឡុង សំណាង,ថន ភឿត,ធន់ ចាន់តាក់ និងឌុន ប៊ុនធឿន មិនដឹងថា តើអ្នកណានៅ អ្នកណាជ្រុះធ្លាក់នោះទេ?
រវាង ឡុង សំណាង និងថន ភឿត ពួកគេមិនធ្លាប់ជួបគ្នាទេកន្លងមក។ កាលពីក្នុងដំណាក់កាលទី១ ឡុង សំណាង គេវាយឈ្នះ ម៉ន គឹមឡុង ក្លិបការិយាល័យទី៥កងទ័ពជើងគោកដោយពិន្ទុ ហើយក្នុងដំណាក់កាលទី២ គេបានឈ្នះ ផុន ផុល ក្លិបតាព្រហ្មមានជ័យដោយពិន្ទុ។
ឯ ថន ភឿត គេវាយឈ្នះផល សីហា ក្លិបសុភានូ ដោយពិន្ទុដែរ និងលើកទី២ឈ្នះ យ៉ាម ឡយ ក្លិបរស្មីកុមារកំព្រាក្នុងទឹកទី២។
សម្រាប់ការជួបគ្នារវាង ឡុង សំណាង និងថន ភឿតនេះ តាមក្រុមអ្នកវិភាគប្រដាល់អះអាងនោះថា សំណាង ទំនងជាមិនឈ្នះ ថនភឿត នោះឡើយ។ ព្រោះ ថន ភឿត វាយបុកខ្លាំង និងមានផ្លែល្អជាងសំណាង។ ចាំមើល តើ ថន ភឿត អាចយកឈ្នះ ឡុង សំណាង បានឬអត់?
ចំពោះការប្រកួតរវាង ធន់ ចាន់តាក់ និងឌុន ប៊ុនធឿនវិញ គូនេះទើបជាគូដែលមានការប្រកួតតឹងតែង ពិបាកទស្សន៍ទាយមុនថា អ្នកណាឈ្នះ អ្នកណាចាញ់នោះណាស់ ព្រោះពួកគេទាំងពីរមានសមត្ថភាព និងបច្ចេកទេសប្រហាក់ប្រហែលគ្នា។ ប៉ុន្តែយ៉ាងណា ឌុន ប៊ុនធឿន គេជាអ្នកប្រដាល់ស្រករមុនចាន់តាក់ និងមានកលល្បិចនិងបទពិសោធន៍លើរេញច្រើនជាងចាន់តាក់។ ទោះជាយ៉ាងណា អ្នកណាឈ្នះ អ្នកណាចាញ់នោះ មិនអាចទាយមុនបានឡើយ។
កាលពីប្រកួតក្នុងដំណាក់កាលទី១នោះ ធន់ ចាន់តាក់ វាយឈ្នះ ម៉ឺន ដា ក្លិបខ្លារខិនមានរិទ្ធដោយពិន្ទុ ដំណាក់កាលទី២ គេឈ្នះ ប្រាក់ រ៉ាម៉ាញ ក្លិបតាឯកដំបងដែកមានរិទ្ធក្នុងទឹកទី២។ ឯ ឌុន ប៊ុនធឿន លើកទី១គេវាយឈ្នះ ធឿន គឹមហៀង ក្លិបកងពលតូចលេខ៨ក្នុងទឹកទី២ ហើយលើកទី២គេឈ្នះ ទេស ឧត្តម ក្លិបកងពលតូចលេខ៧០ដោយពិន្ទុ។ ចាំមើល ក្នុងដំណាក់កាលទី៣ រវាង ធន់ ចាន់តាក់ និងឌុន ប៊ុនធឿន តើនរណានៅ នរណាជ្រុះធ្លាក់ហាលអាវនោះ?៕
អ្នកណានឹងត្រូវជ្រុះបន្តទៀត ក្នុងដំណាក់កាលទី៣ ខ្សែក្រវាត់TIFFY SUPER FIGHT
0 Comments