សៀមរាប ៖ ប្រជាពលរដ្ឋក្រីក្រចំនួន៥០០គ្រួសារ មកពី១៩ភូមិក្នុងឃុំចាន់សរ ស្រុកសូទ្រនិគម ខេត្តសៀមរាប បានទទួលអំណោយសប្បុរសធម៌របស់គណបក្សប្រជាជនកម្ពុជាខេត្ត និងបងប្អូនសប្បុរសជនរស់នៅសហរដ្ឋអាមេរិកផ្តល់តាមរយៈព្រះតេជព្រះគុណតាត មហាទីព្រះគ្រូចៅអធិការវត្តព្រះឥន្ធកោសា នូវគ្រឿងឧបភោគបរិភោគ ហើយកូនឈើ បេង គ្រញូង គគីរ ចំនួន១ពាន់ដើមត្រូវបានលោកបណ្ឌិតឃឹម ប៊ុនសុង ប្រធានគណៈកម្មាធិការនៃ គណបក្សប្រជាជនកម្ពុជាខេត្ត និងជាអភិបាល ខេត្ត នាំយកទៅចែកជូន ប្រជាជនក្រីក្រ កាលពីចុងសប្តាហ៍ ថ្ងៃទី២៩ ខែវិច្ឆិកា ឆ្នាំ២០១៥ នៅសាលាបឋមសិក្សា តាតោក ឃុំ ចាន់សរ ស្រុកសូទ្រនិគម ដោយមានការនិមន្ត អញ្ជើញចូលរួមពីព្រះអនុគណក្រុង ស្រុក និង អាជ្ញាធរ ស្រុកផងដែរ។
ក្នុងកិច្ចស្វាគមន៍របស់លោកម៉ក់ ប្រុសអភិបាលនៃគណៈអភិបាលស្រុកសូទ្រនិគម បានធ្វើការថ្លែងអំណរគុណ ចំពោះទឹកចិត្តដ៏ថ្លៃថ្លារបស់លោកបណ្ឌិតអភិបាលខេត្ត និង បងប្អូនសប្បុរសជនទាំងអស់ ដែលបានចូលរួមក្នុងការកៀរគររកនូវថវិកា គ្រឿងឧបភោគបរិភោគ ជូនដល់ប្រជាជនក្រីក្រស្របតាមគោលនយោបាយកាត់ បន្ថយភាពក្រីក្ររបស់រាជរដ្ឋាភិបាលកម្ពុជា។
ក្នុងនោះដែរព្រះតេជព្រះគុណតាត មហាទីបានមានសង្ឃដីកាបញ្ជាក់ថា អំណោយជាគ្រឿងឧបភោគ បរិភោគនេះ មួយចំនួនជារបស់លោកបណ្ឌិតអភិបាលខេត្ត និងលោកស្រីទុំវិជ្ជនីយ៉ា និង ស្វាមី យកមកចែកជូន បងប្អូនប្រជាជនក្រីក្រ ទាំង១៩ភូមិនៃឃុំចាន់សរនេះ។ ម្យ៉ាងទៀតក្នុងពេលកន្លងមកនេះ ព្រះអង្គក៏បានធ្វើការចែកជូនដល់ប្រជាជនក្រីក្រ ចំនួន២០០គ្រួសារផងដែរ។ មានប្រសាសន៍សំណេះសំណាលនោះដែរ លោកបណ្ឌិតឃឹម ប៊ុនសុងក៏បានធ្វើការថ្លែងអំណរព្រះគុណ និង អគុណ ចំពោះព្រះតេជព្រះគុណតាត មហាទីព្រះគ្រូចៅអធិការវត្តព្រះឥន្ធកោសា និង លោកស្រី ទុំ វិជ្ជនីយ៉ាជាសប្បុរសជននៅសហរដ្ឋអាមេរិក និង ក្រុមគ្រួសារ ដែលបានបរិច្ចាគទ្រព្យធន និងកៀរគរសប្បុរសជននៅ ក្រៅប្រទេសក្នុងការចូលរួមអនុវត្តនូវគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្ររបស់ ប្រជាពលរដ្ឋនៅកម្ពុជា ដែលជាទីដែនកំណើតរបស់ខ្លួន។ លោកបណ្ឌិត ក៏បានលើកឡើងផងដែរ អំពីការអភិវឌ្ឍន៍របស់ ប្រទេសជាតិក្រោមមាគ៌ាដឹកនាំដ៏ត្រឹមត្រូវរបស់រាជរដ្ឋាភិបាល ដែលមានសម្តេចតេជោ ហ៊ុន សែនជានាយករដ្ឋមន្ត្រី បានធ្វើឲ្យប្រទេសជាតិមានសុខសន្តិភាពពេញផ្ទៃប្រទេស និងមានកិច្ចអភិវឌ្ឍន៍រីកចម្រើនទាំងវិស័យអាណាចក្រ និង ពុទ្ធចក្រ។ លោកបណ្ឌិត ឃឹម ប៊ុនសុង ក៏បានលើកឡើងផងដែរថា វិស័យពុទ្ធចក្រ មានការរីកចម្រើន យ៉ាងខ្លាំង ហើយវិស័យសាសនាក៏បានកំពុងទាក់ទាញនូវភ្ញៀវទេសចរណ៍ ចូលមកសិក្សាស្វែងយល់ពីប្រពៃណីទំនៀមទម្លាប់ ពីព្រោះថាទីវត្តអារាមនេះហើយជាជង្រុកនៃអក្សរសាស្ត្រជាតិយើង ព្រមទាំងបង្កប់នូវវប្បធម៌ សិល្បៈ និង ការបណ្តុះបណ្តាលធនធានមនុស្សទៀតផង។ ម្យ៉ាងទៀតភាគក្រីក្រ គឺមិនថានៅកម្ពុជា ឬខេត្តសៀមរាបនោះ ទេ នៅតាមបណ្តាប្រទេសជឿនលឿន និង បណ្តាប្រទេសកំពុងអភិវឌ្ឍន៍ក៏នូវជួបភាពក្រីក្រនេះដែរ។ លោកបណ្ឌិត ក៏បានបញ្ជាក់ផងដែរថា នៅក្រោយការរលំរលាយនៃរបបប្រល័យពូជសាសន៍ ប៉ុល ពត ប្រជាពលរដ្ឋកម្ពុជា ជួបនូវភាពខ្វះខាតយ៉ាងខ្លាំង ដែលធ្វើឲ្យប្រជាពលរដ្ឋយើងជួបភាពក្រីក្រ ដោយប្រទេសជាតិយើងមានសន្តិភាពផង និង សង្គ្រាមផង។ លោកបណ្ឌិត ឃឹម ប៊ុនសុង ក៏បានគូសបញ្ជាក់ថា ក្រោមគោលនយោបាយឈ្នះៗ របស់សម្តេចតេជោ ហ៊ុន សែន បានធ្វើឲ្យប្រទេសជាតិមានសុខសន្តិភាពពេញផ្ទៃប្រទេស និង មានកិច្ចអភិវឌ្ឍន៍រីកចម្រើន បានធ្វើឲ្យ ជីវភាពប្រជាពលរដ្ឋមានភាពប្រសើរឡើងតាំងពីទីក្រុង ដល់ជនបទ មិនដូចមតិរបស់ក្រុមអគតិមួយចំនួនដែលបាន លើកឡើងនោះឡើយ។
លោកបណ្ឌិតក៏បានសំណូមពរដល់ព្រះតេជព្រះគុណតាតមហាទីនិង លោកស្រី ទុំវិជ្ជនីយ៉ា និង ក្រុមគ្រួសារ សូមបន្តនូវប្រពៃណី ទឹកចិត្តមនុស្សធម៌ ដ៏សប្បុរស ជួយដល់ប្រជាពលរដ្ឋកម្ពុជា សំខាន់ប្រជាពលរដ្ឋខេត្តសៀមរាប ជាមួយរាជរដ្ឋាភិបាល និង អាជ្ញាធរខេត្តសៀមរាប ក្នុងការកាត់បន្ថយនូវភាពក្រីក្រ របស់ប្រជាពលរដ្ឋកម្ពុជា។
បងប្អូនប្រជាពលរដ្ឋក្រីក្រទាំង៥០០គ្រួសារ ក្នុងមួយគ្រួសារបានទទួលអង្ករ ២០គក្រ មី១កេស អំបិល ១គក្រ ប៊ីចេងកន្លះគីឡូក្រាម , ខ្ទឹមសកន្លះគីឡូក្រាម , ទឹកស៊ីអ៊ីវ ៣ដប រួមនឹងកូនឈើនិង អណ្តូងទឹកស្អាត ៣កន្លែង ជូនដល់ភូមិចំនួន៣ ព្រមទាំងបានឧបត្ថម្ភនូវថវិកាមួយ ចំនួន ដល់អាជ្ញាធរស្រុក កម្លាំងសមត្ថកិច្ច សាលារៀន និង ការរៀបចំពិធីផងដែរ៕
ប្រជាពលរដ្ឋក្រីក្រទទួលអំណោយរបស់សប្បុរសជន
0 Comments