ភ្នំពេញ ៖ ជនសង្ស័យ២នាក់ក្នុងចំណោមបក្ខពួកច្រើននាក់ និង ធ្លាប់បានធ្វើសកម្មភាពវាយប្លន់ឆក់ញឹកញាប់ក្នុងមូលដ្ឋានខណ្ឌពោធិ៍សែន មកដល់ពេលនេះ ត្រូវបានសមត្ថកិច្ចនគរបាលខណ្ឌពោធិ៍សែនជ័យ បង្ក្រាបបានពីរនាក់ និងបានកសាងឯកសារបញ្ជូនទៅតុលាការឲ្យចាត់ការតាមនីតិវិធីកាលពីរសៀល ថ្ងៃទី១៣ ខែតុលា ឆ្នាំ២០១៨នេះ បន្ទាប់ពីស្រាវជ្រាវចាប់ខ្លួនបានកាលពីថ្ងៃទី៩ខែតុលាកន្លងនេះ។
តាមលោក យឹម សារ៉ាន់ អធិការនគរបាលខណ្ឌពោធិ៍សែនជ័យ បានបញ្ជាក់ឲ្យដឹងដែរថា ហេតុការណ៍នេះ បានកើតឡើងនៅយប់រំលងអធ្រាត្រវេលាម៉ោង១២និង៣០នាទីថ្ងៃទី២៣ ខែកញ្ញា ឆ្នាំ២០១៨ចំណុចផ្លូវជាតិលេខ៣ ក្នុងភូមិព្រៃកី(ក) សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ។
លោក យឹម សារ៉ាន់ បានឲ្យដឹងថា ជនសង្ស័យទី១ឈ្មោះ ឆែម ប៊ុនឌឿន អាយុ១៨ឆ្នាំនិងទី២.ឈ្នោះ នុត សុធុន អាយុ១៨ឆ្នាំ ក្រុមនេះប្រើរូបភាព ជិះម៉ូតូជាក្រុមៗដូចដើរលេងអញ្ចឹង ហើយក្រុមនេះជិះសុទ្ធតែ ម៉ូតូហុងដាឌ្រីម លុះនៅពេលឃើញឱកាសល្អក៏ធ្វើសកម្មភាពតែម្តងវាយប្លន់តែម្ដង ចំណែកជនរងគ្រោះឈ្មោះ បាន បញ្ញា អាយុ១៩ឆ្នាំនិង ម៉ូតូដែលជនសង្ស័យនោះម៉ាក ហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៨មិនចាំស្លាកលេខ និង ទូរស័ព្ទម៉ាកអាហ្វូនមួយគ្រឿង។
សមត្ថកិច្ចបានឲ្យដឹងថា មុនពេលកើតហេតុជនរងគ្រោះរួមជាមួយមិត្តភក្តិ៤នាក់ផ្សេងទៀត បានជិះម៉ូតូ២គ្រឿងធ្វើដំណើរចេញពីដើរលេងនៅកោះពេជ្រ តាមបណ្ដោយផ្លូវវ៉េងស្រេង កាត់តាមរង្វង់មូលចោមចៅមកតាមផ្លូវជាតិលេខ ៣ មកដល់ត្រង់ចំណុចការដ្ឋានជួសជុលរថយន្តមួយកន្លែងក្នុងភូមិព្រៃកី(ក) សង្កាត់ភ្លើងឆេះរទេះ ក៏ស្រាប់តែមានជនសង្ស័យចំនួន០៨នាក់ជិះម៉ូតូ៤គ្រឿងហើយពេលនោះជនសង្ស័យជិះម៉ូតូម៉ាកហុងដាឌ្រីម C១២៥ ស៊េរីឆ្នាំ ២០១៦ ជិះកៀរម៉ូតូជនគ្រោះរួចយកមួកសុវត្ថិភាពវាយទៅលើក្បាលជនរងគ្រោះបណ្ដាលឲ្យជនរងគ្រោះរេចង្កូតដួលចូលប្រឡាយទឹកតាមចិញ្ចើមផ្លូវ រួចក្រុមជនសង្ស័យបានស្រែកថា កាប់វាឲ្យងាប់ បន្ទាប់មកជនសង្ស័យក៏យកទូរស័ព្ទនិងលើកម៉ូតូរបស់ជនរងគ្រោះជិះចេញទៅទិសខាងត្បូងបាត់ស្រមោលតែម្តង។
ប្រភពបន្តទៀតថា បន្ទាប់មកជនរងគ្រោះបាននាំគ្នាមកដាក់ពាក្យបណ្ដឹងនៅប៉ុស្ដិ៍ភ្លើងឆេះរទេះហើយសមត្ថកិច្ចយើងក៏ចាប់ផ្ដើមធ្វើការស្រាវជ្រាវជាបន្ដបន្ទាប់ លុះមកដល់យប់ថ្ងៃទី៩ខែតុលាឆ្នាំ២០១៨ ដោយមានការសង្ស័យព្រោះជនសង្ស័យមានភិនភាគដូចការរៀបរាប់ក្នុងពាក្យបណ្ដឹងជនរងគ្រោះជាពិសេសភិនភាគម៉ូតូទើបសមត្ថកិច្ចយើងឃាត់ដើម្បីសួរនាំទើបជនសង្ស័យនិយាយប្រាប់ពីដំណើររឿងដែលពួកគេបានធ្វើសកម្មភាពនាពេលកន្លងមក ពេលនេះសមត្ថកិច្ចកំពុងតាមស្វែងបក្ខពួក៤នាក់ទៀត ដើម្បីចាប់យកមកផ្តន្ទាទោសតាមច្បាប់ដូចយុវជនពីរនាក់នេះដែរ៕
Source: Kampuchea Thmey Daily
0 Comments