កំពង់ឆ្នាំង ៖ លោក ម៉ម ឈឿម ប្រធានមន្ទីរព័ត៌មានខេត្ត និងជាប្រធានក្រុមការងារចម្រុះខេត្ត អនុវត្តតាមបញ្ជារបស់លោក ឈួរ ចន្ទ័ឌឿន អភិបាលខេត្តកំពង់ឆ្នាំងនៅវេលាម៉ោង២និង៣០នាទីរសៀល ថ្ងៃទី០៤ ខែវិច្ឆិកា ឆ្នាំ២០១៥ បានដឹកនាំប្រធានមន្ទីរពាក់ព័ន្ធក្នុងខេត្តចុះទៅសាកសួរសុខទុក្ខ និងពាំនាំយកអំណោយទៅផ្តល់ជូនគ្រួសារកុមារីរងគ្រោះត្រូវគេចាប់រំលោភ និងវាយសម្លាប់បំបិទមាត់ ហើយបានកាឡៃជារឿងទៅជាគ្រោះថ្នាក់ចរាចរណ៍វិញ តែនាងមិនស្លាប់ គ្រាន់តែរងរបួសធ្ងន់។
លោក ម៉ម ឈឿម ប្រធានមន្ទីរព័ត៌មានខេត្តបានមានប្រសាសន៍ថា ក្រោយពីមានការចុះផ្សាយរបស់សារព័ត៌មាន និងទូរទស្សន៍ពីរឿងកុមារីរងគ្រោះ អាយុ១៤ឆ្នាំ ត្រូវយុវជន២នាក់ចាប់រំលោភ និងបានវាយក្បាលប៉ងសម្លាប់ តែមិនស្លាប់ គឺគ្រាន់តែរងរបួសធ្ងន់ ក្រោយមកកាឡៃថាជារឿងគ្រោះថ្នាក់ចរាចរណ៍វិញនោះ ត្រូវបានលោកអភិបាលខេត្តចាត់ឲ្យលោកនាំមន្ត្រីរាជការមកសាកសួរសុខទុក្ខគ្រួសារខាងលើនេះ។
ក្នុងឱកាសនោះដែរ លោកស្រីវរសេនីយ៍ត្រី មាស សុម៉ាលី តំណាងឲ្យលោកស្នងការនគរបាលខេត្តកំពង់ឆ្នាំងបានមានប្រសាសន៍ថា សូមកុំឲ្យគ្រួសាររងគ្រោះព្រួយបារម្ភអី ព្រោះសមត្ថកិច្ចនគរបាលខេត្តកំពុងចំណាត់ការក្នុងរឿងនេះយ៉ាងសកម្មហើយ គឺរឿងនេះវាស្ថិតក្នុងការស្រាវជ្រាវ និងស៊ើបអង្កេត វាមិនស្ថិតក្នុងបទល្មើសជាក់ស្ដែងឡើយ ព្រោះតែកើតហេតុជិត២ខែមកហើយ។ ចំណែកលោកស្រី មាស សាម៉េត អភិបាលរងក្រុងកំពង់ឆ្នាំងបានមានប្រសាសន៍ថា ចំពោះកូនតូចៗ២នាក់ដែលជាកូនគ្រួសាររងគ្រោះខាងលើ លោកស្រីនឹងជួយសម្រួលធ្វើសំបុត្រកំណើត និងចុះឈ្មោះចូលរៀន។
ក្នុងនោះដែរ លោកស្រី ឈឹម ចាន់សុក ប្រធានមន្ទីរកិច្ចការនារីខេត្តបានជួយឧបត្ថម្ភខោអាវសម្រាស់សិស្សដល់ក្មេងទាំង២ខាងលើ ម្នាក់២កំប្លេ សៀវភៅ២០ក្បាល និងប៊ិច៥ដើម ខោអាវនៅផ្ទះ៦កំប្លេ និងថវិកា៥ម៉ឺនរៀល។
លោក ប្រាក់ វុឌ្ឍី ស្នងការនគរបាលខេត្តឧបត្ថម្ភ១០ម៉ឺនរៀល លោក ថោង ចំរើន ប្រធានមន្ទីរសង្គមកិច្ច ឧបត្ថម្ភអង្ករ៥០គីឡូក្រាម ថវិកា៥ម៉ឺនរៀល និងលោក ម៉ម ឈឿម ប្រធានមន្ទីរព័ត៌មាន ថវិកា១០ម៉ឺនរៀល។
សូមបញ្ជាក់ថា កុមារីអាយុ១៤ឆ្នាំម្នាក់ត្រូវយុវជន២នាក់ ក្នុងចំណោម៤នាក់ ចាប់រំលោភបានសម្រេចរួចបានវាយបំបែកក្បាលប៉ងសម្លាប់ តែមិនស្លាប់ គ្រាន់តែរងរបួសរធ្ងន់ធ្ងរ ហើយត្រូវបានបំភ្លៃព័ត៌មានថា ជាករណីគ្រោះថ្នាក់ចរាចរណ៍ទៅវិញ ប៉ុន្តែក្រោយមក៩ថ្ងៃ បន្ទាប់ពីនាងដឹងខ្លួននៅមន្ទីរពេទ្យកាល់ម៉ែត ក្រុងភ្នំពេញ បានប្រាប់ឪពុកម្ដាយ គឺជាករណីចាប់រំលោភ ទើបប្តឹងមកសមត្ថកិច្ចឲ្យចាត់ការក្នុងរឿងនេះ។
ហេតុការណ៍នេះបានកើតឡើងកាលពីយប់ថ្ងៃទី២១ ខែកញ្ញា ឆ្នាំ២០១៥ នៅជិតសាលារៀនក្រុងកំពង់ឆ្នាំង ខណៈរូបនាង និងមិត្តភ័ក្ដិម្នាក់ទៀតត្រឡប់មកពីមើលការប្រគំតន្ត្រីវិញ។
ចំពោះកុមារីរងគ្រោះត្រូវបានគ្រូពេទ្យបានវះកាត់ឆ្អឹងលលាដ៍ក្បាលមួយដុំធំយកមកចិញ្ចឹមផ្សាំក្នុងពោះដើម្បីព្យាបាលរបួសក្នុងខួរក្បាល ហើយនៅថ្ងៃទី១០ ខែវិច្ឆិកា ឆ្នាំ២០១៥ខាងមុខនេះ គ្រូពេទ្យតម្រូវឲ្យនាងទៅវះកាត់យកលលាដ៍ក្បាលប៉ះ និងដេរភ្ជាប់ក្បាលវិញ។ ដោយសារក្រុមគ្រួសារក្រីក្រ រូបនាង និងក្រុមគ្រួសារសុំអំពាវនាវដល់សម្ដេច លោកជំទាវ ឯកឧត្ដម និងសប្បុរសជន មេត្តាជួយឧបត្ថម្ភថវិកាក្នុងការវះកាត់ខាងលើនេះជូនរូបនាងដោយសេចក្ដីអនុគ្រោះផង៕
កុមារីដែលគេចាប់រំលោភរួចបំភ្លៃថាជួបគ្រោះថ្នាក់ចរាចរណ៍ ទទួលបានអំណោយ
0 Comments