រឿង សោភ័ណ្ឌ អ្នកប្រដាល់ក្លិបម្កុដរាជសីហ៍ នឹងត្រូវជួបប្រកួតជាមួយអ្នកប្រដាល់ថៃឈ្មោះPhachArounនារសៀលថ្ងៃអាទិត្យទី០៨វិច្ឆិកា ២០១៥នេះ នៅលើសង្វៀន SEA-TV ។ ពីរនាក់នេះ ប្រកួតគ្នាក្នុងទម្ងន់៦៩គីឡូក្រាម។ PhachAroun នេះ ធ្លាប់មកប្រកួតនៅសង្វៀនSEA-TVនេះ ចំនួនពីរលើកហើយ ដោយវាយឈ្នះមឿន សុខហ៊ុច អ្នកប្រដាល់ក្លិបពុទ្ធសេរីវង្សកីឡាទាំងពីរលើក ដែលលើកទី១គេឈ្នះសុខហ៊ុចត្រឹមពិន្ទុ តែមកលើកទី២ គេផ្តួលសុខហ៊ុចអោយសន្លប់ក្នុងទឹកទី២ ។ដូច្នេះ អ្នកប្រដាល់ថៃរូបនេះ គេខ្លាំងមិនធម្មតាទេ។ តែយ៉ាងណា PhachArounមកលើកនេះ ជួបជាមួយរឿង សោភ័ណ្ឌ ប្រហែលជាមិនអាចធ្វើព្យុះភ្លៀងបានដូចមុនៗបានឡើយ។
រឿង សោភ័ណ្ឌ គេធ្លាប់បានបំបាក់អ្នកប្រដាល់ថៃអស់ច្រើននាក់មកហើយ ក្នុងការប្រកួតក្នុងស្រុកកន្លងមក។ សោភ័ណ្ឌ ធ្លាប់ចាញ់តែពីរនាក់ទេ ក្នុងជំនួបជាមួយថៃប្រមាណ១៦នាក់កន្លងមកនេះ គឺចាញ់Jetsada និង Kam Lai Phach។ សោភ័ណ្ឌ ជួបជាមួយថៃលើកចុងក្រោយនេះ គេផ្ដួលChaleDetSor. អោយសន្លប់ក្នុងទឹកទី២ កាលពីថ្ងៃទី២៥ តុលាកន្លងមកនេះ។ និយាយរួម រឿង សោភ័ណ្ឌ គេជាអ្នកប្រដាល់ដែលវាយខ្លាំង វាយមិនញញើតចំពោះគូប្រកួតទោះបីជាធំជាងឬប៉ុនគ្នាយ៉ាងណាក៏ដោយ គឺគេវាយមិនលាក់កម្លាំង មិនលាក់ស្នៀតនោះទេ។
ប៉ុន្តែយ៉ាងណា អ្នកប្រដាល់ថៃដែលនឹងមកជួបសោភ័ណ្ឌលើកនេះ គេមានស្នៀតប្រដាល់ល្អនិងខ្លាំងដែរ ហើយបទពិសោធន៍លើរេញរបស់គេ ក៏មិនធម្មតាដែរ ព្រោះគេមានប្រវត្តិប្រកួតបាន៨២ដង ក្នុងនោះវាយឈ្នះ៧២ដង និងចាញ់១០ដង មិនដែលស្មើទេ។
ដូច្នេះរឿង សោភ័ណ្ឌ ដែលជួបប្រកួតជាមួយPhachArounលើកនេះ ប្រហែលជាមិនស៊ីផុយប៉ុន្មានទេ។ តែយ៉ាងណា បើតាមកម្រិតសមត្ថភាពរបស់រឿង សោភ័ណ្ឌ អាចចាត់ទុកថា PhachArounពុំអាចជាបន្លាក្នុងកែវភ្នែករបស់គេនោះឡើយ ។ សោភ័ណ្ឌ គេមានប្រវត្តិប្រកួតរហូតដល់១៣៥ដងឯណោះ ក្នុងនោះឈ្នះ១២៤លើក ចាញ់១០លើក និងស្មើ០១លើក ហើយសោភ័ណ្ឌធ្លាប់ផ្ដួលគូប្រកួតឲ្យសន្លប់ចំនួន៥៤លើក ។ តែយ៉ាងណា រឿង សោភ័ណ្ឌ ក៏ត្រូវប្រយ័ត្នដែរ។ អ្នកប្រដាល់កម្ពុជារូបនេះ មានកណ្តាប់ដៃខ្លាំងណាស់ ពិសេសកណ្តាប់ដៃឆ្វេង ។ ដូច្នេះចាំមើល តើនរណាឈ្នះរវាងរឿង សោភ័ណ្ឌ និងPhachArounនេះ ? ។
ង៉ែត្រ រដ្ឋា អ្នកប្រដាល់ក្លិបតាព្រហ្មមានជ័យ នឹងជួបប្រកួតជាមួយអ្នកប្រដាល់ថៃឈ្មោះThorngChhaiដោយប្រកួតក្នុងទម្ងន់៦០គ.ក្រ ។ អ្នកប្រដាល់ថៃរូបនេះ មិនធ្លាប់មកប្រកួតនៅកម្ពុជានោះទេ។
ThorngChhai នេះនៅស្រុកថៃ គេជាជើងខ្លាំងក្នុងប្រភេទទម្ងន់៦០គ.ក្រនេះ ដោយគ្រប់គ្រងខ្សែក្រវាត់បីម្នាក់ឯងសព្វថ្ងៃនេះ ។ អ្នកប្រដាល់ថៃរូបនេះ មានប្រវត្តិប្រកួត៨៥លើក វាយឈ្នះ៦៥លើក ចាញ់១៧លើក និងស្មើ០៣លើក ខណៈដែលង៉ែត្រ រដ្ឋា គេមានប្រវត្តិប្រកួតចំនួន៦៩លើក ឈ្នះ៥៩លើក ចាញ់០៨លើក និង ស្មើ ០២លើក។
ទោះជាយ៉ាងណា ង៉ែត្រ រដ្ឋា ត្រូវតែខំព្យាយាមខ្លាំងមែនទែន ទើបមានសង្ឃឹមឈ្នះThorngChhaiនោះ បើមិនដូច្នោះទេ គឺចាញ់ទៀតហើយ ។ រដ្ឋា ធ្លាប់វាយជាមួយថៃចំនួន៥នាក់ហើយ ដោយចាញ់៤នាក់ និងអត់ប្រកាសលទ្ធផល១នាក់ ។ ដូច្នេះជាលើកទី៦សម្រាប់គេស្តារកេរ្តិ៍ឈ្នះឡើងវិញ ក្នុងការដែលជួបប្រកួតជាមួយថៃThorngChhaiនេះ ។ ចាំមើល ង៉ែត្រ រដ្ឋា អាចវាយឈ្នះអ្នកប្រដាល់ថៃThorngChhai ដែលមកនេះ បានឬអត់ ? ។ រដ្ឋា មួយរយះចុងក្រោយនេះ គេរាងធ្លាក់ចុះច្រើនជាងមុន ដោយវាយចាញ់ទាំងអ្នកប្រដាល់រួមជាតិស្រករក្រោយផង៕
រឿង សោភ័ណ្ឌ និងង៉ែត្រ រដ្ឋា ជួបថៃលើសង្វៀនSEA-TV
0 Comments