ភ្នំពេញ ៖ តាម លោក ហេង សួរអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា កាលពីព្រឹកថ្ងៃទី៤ ខែវិច្ឆិកា ឆ្នាំ២០១៥ (ម៉ោងនៅហ្សឺណែវ)នេះ នៅស្នាក់ការកណ្ដាលរបស់អង្គការអន្តរជាតិខាងការងារ (ILO) លោក អិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានដឹកនាំប្រតិភូកម្ពុជាប្រជុំពិភាក្សាការងារជាមួយ លោក Guy Ryder អគ្គនាយកអង្គការពលកម្មអន្តរជាតិខាងការងារ។
អគ្គនាយក ILO បានសម្ដែងការអបអរសាទរចំពោះរាជរដ្ឋាភិបាលកម្ពុជាដែលបានដាក់ឲ្យដំណើរការគោលនយោបាយជាតិស្ដីពីមុខរបរ និងការងារកាលពីថ្ងៃទី២២ ខែតុលា ឆ្នាំ២០១៥ កន្លងទៅនេះ។ លោកក៏បានកោតសរសើរ និងអបអរសាទរដល់កម្ពុជាផងដែរ ដែលមានយន្តការ និងលក្ខណៈវិនិច្ឆ័យច្បាស់លាស់ក្នុងការកំណត់ប្រាក់ឈ្នួលអប្បបរមា និងបានសម្របសម្រួលការចរចាដំឡើងប្រាក់ឈ្នួលអប្បបរមាផ្នែកវិស័យវាយនភ័ណ្ឌ កាត់ដេរ និងផលិតស្បែកជើង សម្រាប់ឆ្នាំ២០១៦ ពី១២៨ ដល់ ១៤០ដុល្លារអាមេរិកក្នុង១ខែ។ លោកអគ្គនាយក ILO បានទទួលស្គាល់ថា ជាទូទៅភាគីរដ្ឋាភិបាលមានការលំបាកក្នុងតួនាទីជាអ្នកសម្របសម្រួលរវាងភាគី២ គឺភាគីកម្មករនិយោជិត និងភាគីនិយោជកដែលមាននិន្នាការផ្សេងគ្នា ហើយបានលើកទឹកចិត្តដល់រដ្ឋាភិបាលក្នុងការបំពេញតួនាទីនេះបន្តទៀត ព្រមទាំងសន្យាថា ILO នឹងគាំទ្ររាល់លទ្ធផលនានាដែលកើតចេញពីការយន្តការត្រីភាគីពីរូបមន្ត និងលក្ខណវិនិច្ឆ័យក៏ដូចជាកាលវិភាគនៃការចរចាប្រាក់ឈ្នួលអប្បបរមា ដែលបានឯកភាពគ្នាកន្លងមកក្រោមជំនួយបច្ចេកទេសរបស់អ្នកជំនាញប្រាក់ឈ្នួលរបស់អង្គការ ILO។
ក្នុងឱកាសនោះលោក អិត សំហេង ក៏បានថ្លែងនូវអំណរគុណដល់អង្គការ ILO ដែលបានផ្តល់ជំនួយបច្ចេកទេសនានាដល់កម្ពុជានាពេលកន្លងមកជាពិសេសលើ (១) បញ្ហាប្រាក់ឈ្នួលអប្បបរមា (២) គោលនយោបាយជាតិស្ដីពីមុខរបរនិងការងារ និង(៣)កម្មវិធីការងារសមរម្យនៅកម្ពុជា។
លោកក៏បានអបអរសាទរដល់អង្គការ ILO ដែលទទួលបានជោគជ័យនៅក្នុងការដាក់បញ្ចូលគោលដៅរបស់ខ្លួនចូលទៅក្នុងគោលដៅអភិវឌ្ឍន៍ប្រកបដោយចីរភាព (SDG) របស់អង្គការសហប្រជាជាតិនាកិច្ចប្រជុំប្រចាំឆ្នាំលើកទី៧០ របស់អង្គការសហប្រជាជាតិនាខែកញ្ញា ឆ្នាំ២០១៥កន្លងទៅនេះ។
ឆ្លើយតបនឹងសំនួររបស់អគ្គនាយក ILO អំពីការយល់ឃើញរបស់កម្ពុជាលើកម្មវិធីរោងចក្រកាន់តែប្រសើរនៅកម្ពុជា (BFC) ឯកឧត្តម អិត សំហេង បានថ្លែងកោតសរសើរចំពោះលទ្ធផលការងារ និងសារៈសំខាន់របស់គម្រោង BFC នេះ តែសុំឲ្យគម្រោង BFC ធ្វើការកែសម្រួលចំណុចមួយចំនួនឲ្យ អនុលោមទៅតាមបទដ្ឋានអន្តរជាតិផង និងច្បាប់របស់កម្ពុជាផង។ ទន្ទឹមនឹងនោះឯកឧត្តមក៏បានសុំឲ្យ ILO គិតទៅដល់ចំណុចកសាងសមត្ថភាព និងធនធានមនុស្សរបស់មន្ត្រីអធិការកិច្ចការងារកម្ពុជា និងលើកកម្ពស់គុណភាពនៃរបាយការណ៍របស់ក្រុមអធិការកិច្ចការងារកម្ពុជា ដើម្បីកម្ពុជាទទួលយកកិច្ចការរបស់គម្រោង BFC មកអនុវត្តដោយខ្លួនឯង នៅពេលវេលាសមស្របណាមួយនាពេលខាងមុខនេះពីព្រោះ BFC គឺគ្រាន់តែជាយន្តការបណ្ដោះអាសន្នមួយប៉ុណ្ណោះ។
លោកអគ្គនាយក ILO បានឯកភាពចំពោះទស្សនៈរបស់ឯកឧត្តមរដ្ឋមន្ត្រីពាក់ព័ន្ធនឹងបញ្ហា BFC នេះ ហើយសន្យាថា នឹងត្រៀមខ្លួនជួយដល់កម្ពុជាក្នុងការទទួលយកមកអនុវត្តដោយខ្លួនឯងនូវកម្មវិធីនេះ។
កិច្ចប្រជុំបានប្រព្រឹត្តទៅក្រោមស្មារតីស្និតស្នាលត្រង់ទៅត្រង់មក និងប្រកបដោយផ្លែផ្កាវិជ្ជមាន៕
លោក អិត សំហេង បានជួបពិភាក្សាជាមួយអគ្គនាយកអង្គការILO
0 Comments