ភ្នំពេញ ៖ ការនាំចេញអង្ករក្នុងរយៈពេល ១០ខែ ឆ្នាំ២០១៥នេះ មានការកើនឡើងជិត ៣៤ភាគរយបើធៀបទៅនឹងរយៈពេលដូចគ្នាកាលពីឆ្នាំ២០១៤កន្លងទៅ។ ទោះជាបែបនេះក្ដី អ្នកនាំចេញអង្ករបានលើកឡើងថា ទីផ្សារអង្កររបស់កម្ពុជានឹងរងនូវផលប៉ះពាល់មួយចំនួនជាពិសេសការទម្លាក់តម្លៃអង្កររបស់ថៃ និងការថយចុះនៃបរិមាណផលស្រូវក្នុងរដូវច្រូតកាត់ខាងមុខ។
របាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ចេញផ្សាយនៅថ្ងៃទី៣ ខែវិច្ឆិកាបានបង្ហាញថា កម្ពុជាបាននាំចេញអង្ករទៅកាន់ទីផ្សារបរទេសក្នុងរយៈពេល១០ខែកន្លងទៅ មានចំនួន ៤០៨.១៦៩ (សែសិបម៉ឺនប្រាំបីពាន់មួយរយហុកសិបប្រាំបួន) តោន។ អត្រានេះមានកំណើន ៣៣,៩% បើធៀបទៅនឹងរយៈពេលដូចគ្នាកាលពីឆ្នាំ២០១៤ ដែលការនាំចេញមានទំហំត្រឹមតែ ៣០៤.៧៨៨តោនតែប៉ុណ្ណោះ។ ជាមួយគ្នាការនាំចេញអង្ករក្នុងខែតុលាឆ្នាំនេះក៏មានការកើនឡើងផងដែរ ដោយមានបរិមាណសរុប៣៩.០៦៤តោន កើនឡើង ១២,១% ខណៈដែលការនាំចេញនៅខែតុលា ឆ្នាំមុនមានត្រឹមតែ ៣៥.៤១៨តោនប៉ុណ្ណោះ។ ចំពោះប្រទេសដែលឈរលេខរៀងទី១ ក្នុងការបញ្ជាទិញអង្ករពីកម្ពុជាគឺនៅតែជាប្រទេសចិន និងសហគមន៍អឺរ៉ុបដដែល។
លោក សុង សារ៉ន ប្រធានក្រុមហ៊ុនអេមរុ៍រ៉ាយស៍ បានឲ្យដឹងថា គិតត្រឹមខែតុលាឆ្នាំ២០១៥នេះ ក្រុមហ៊ុនបាននាំចេញអង្ករសរុបចំនួន ៥ម៉ឺន ៣ពាន់តោន កើនឡើង៣៥%ធៀបទៅនឹងរយៈពេលដូចគ្នាកាលពីឆ្នាំមុន ដែលមានត្រឹម៣ម៉ឺន៨ពាន់តោនប៉ុណ្ណោះ។ លោកកត់សម្គាល់ថា ការនាំចេញអង្កររបស់កម្ពុជាក្នុងខែតុលាកន្លងទៅគឺមិនដូចទៅនឹងការរំពឹងទុកឡើយ ព្រោះថាទីផ្សារអង្ករថ្មីៗរបស់កម្ពុជាកំពុងតែទទួលរងនូវផលប៉ះពាល់ដោយសារតែការក្រឡុកទីផ្សារពីប្រទេសថៃ។ លោកថា បច្ចុប្បន្នប្រទេសថៃកំពុងទម្លាក់តម្លៃអង្កររបស់ខ្លួនទាបជាងអង្កររបស់កម្ពុជានៅក្នុងទីផ្សារថ្មីៗដូចជាប្រទេសចិន និងម៉ាឡេស៊ីជាដើម ដែលជាហេតុធ្វើឲ្យការបញ្ជាទិញពីប្រទេសទាំងនេះមានការថយចុះ។ ការថយចុះនេះក៏ព្រោះតែលំបាកក្នុងការប្រកួតប្រជែងតម្លៃអង្ករជាមួយប្រទេសថៃនេះឯង។ យ៉ាងណាក៏ដោយការទម្លាក់ថ្លៃអង្កររបស់ថៃមិនបានប៉ះពាល់ដល់ទីផ្សារអង្ករកម្ពុជានៅសហគមន៍អឺរ៉ុបឡើយ។
អ្នកនាំចេញអង្កររូបនេះ កត់សម្គាល់បន្ថែមថា ការប្រមូលផលស្រូវដែលធ្វើឡើងក្នុងឆ្នាំនេះក៏នឹងមានការថយចុះផងដែរ ព្រោះកម្ពុជាបានជួបប្រទះនូវបាតុភូត Elnino ដែលបង្កជាភាពរាំងស្ងួត។ កត្តានេះនឹងធ្វើឲ្យមានការធ្លាក់ចុះបរិមាណស្រូវថ្មីចន្លោះពី ២០ ទៅ២៥%។ ដូច្នេះការផ្គត់ផ្គង់អង្កររបស់កម្ពុជាទៅកាន់ទីផ្សារបរទេសនឹងមានកម្រិតទាបជាងមុនផងដែរ៕
រយៈពេល១០ខែ ឆ្នាំ២០១៥ ការនាំចេញអង្ករកើនឡើងតែអ្នកនាំចេញព្រមានពីបញ្ហាទីផ្សារ
0 Comments