កំពង់ចាម ៖ ប្រជាពលរដ្ឋប្រមាណជាង៥០០នាក់ មកពីភូមិចំនួន៣ គឺភូមិឫស្សីស្រុក ភូមិត្នោតក្រោម ភូមិត្នោតលើ ស្ថិតក្នុងឃុំឫស្សីស្រុក ស្រុកស្រីសន្ធរ ខេត្តកំពង់ចាម បាននាំគ្នាតវ៉ាចំពោះសេវាករអគ្គិសនីខេត្តកំពង់ចាម ដែលបានរៀបចំតបណ្ដាញអគ្គិសនីថ្មីសម្រាប់ភូមិទាំង៣ខាងលើ ដោយពួកគាត់សុំប្រើប្រាស់អគ្គិសនីចាស់ដែលធ្លាប់ប្រើតាំងពីឆ្នាំ២០១២មកម្ល៉េះ។
ការតវ៉ានេះធ្វើឡើងនៅព្រឹកថ្ងៃទី០៥ ខែវិច្ឆិកា ឆ្នាំ២០១៥ នៅសាលាឃុំឫស្សីស្រុក ដោយមានការអញ្ជើញចូលរួមពីលោក កៅ ម៉ុយថង ប្រធានក្រុមការងារចុះជួយរស្រុកស្រីសន្ធរ ខេត្តកំពង់ចាមនិងលោកអភិបាលស្រុកស្រីសន្ធរ។
លោក ម៉ៅ កកឃាង តំណាងសេវាករអគ្គិសនីយៀបម៉ី ប្រចាំខេត្តកំពង់ចាមបានលើកឡើងថា ក្រុមសេវាករយៀបម៉ីមានអាជ្ញាប័ណ្ណត្រឹមត្រូវពីអាជ្ញាធរអគ្គិសនីកម្ពុជាបានផ្តល់សេវាអគ្គិសនីជាច្រើនស្រុក និងមកដល់ភូមិទាំង៣ខាងលើ។
ក្នុងនោះ លោក ម៉ៅ កកឃាង បានសង្កត់ធ្ងន់ថា អគ្គិសនីយៀបម៉ីមានសសរបង្គោលខ្សែភ្លើងកម្ពស់១២ម ត្រឹមត្រូវ តាមស្តង់ដារ មានកម្លាំង២២០វ៉ាត់ពេញ ហើយការត.បណ្ដាញនៅពេលនេះក្រុមហ៊ុនមិនយកថ្លៃសេវា ឬថ្លៃកុងទ័រឡើយ រីឯតម្លៃក្នុង១គីឡូវ៉ាត់១០៥០រៀល។
លោក ហ៊ុច អេង អាយុ៧០ឆ្នាំ ជាប្រជាពលរដ្ឋរស់នៅភូមិត្នោតក្រោម និងលោក ស៊ាម វុត្ថាអាយុ៤៥ឆ្នាំ រស់នៅភូមិឫស្សីស្រុក ក៏ដូចជាប្រជាពលរដ្ឋទាំង៣ភូមិខាងលើ បានសំដែងមតិដូចគ្នាថា ពួកគាត់មិនព្រមប្រើអគ្គិសនីថ្មីនោះទេ ទោះបីការលើកឡើងរបស់សេវាករថ្មីនេះក៏ដោយ ព្រោះកន្លងមកចាប់តាំងពីឆ្នាំ២០១២ ពួកគាត់បានសុំឲ្យអាជីវករឈ្មោះ ឡាយ វេងឃាង នៅព្រែកដំបូកតបណ្តាញអគ្គិសនីជូនពួកគាត់ទាំង៣ភូមិ ព្រោះកាលណោះខាងអគ្គិសនីកំពង់ចាមមិនបានមកត.បណ្តាញអគ្គិសនីឲ្យដល់ពួកគាត់ទេ ធ្វើឲ្យភូមិទាំង៣គ្មានអគ្គិសនីប្រើ។
ប្រជាពលរដ្ឋដែលមកធ្វើការតវ៉ាបានលើកឡើងថា ចាប់តាំងពីឆ្នាំ២០១២នោះមក ពួកគាត់បានប្រើអគ្គិសនីនៅព្រែកដំបូកបានស្រួល ហើយពួកគាត់មិនចង់ឲ្យផ្លាស់ប្ដូរទេ ពួកគាត់បានសុំអាជ្ញាធរជួយសម្រួលតាមសំណូមពររបស់ពួកគាត់ផង ទោះបីយ៉ាងណាក៏គាត់មិនព្រមឲ្យដាំបង្គោល
អគ្គិសនីថ្មីដែលជារបស់សេវាករថ្មីនេះដែរ។
ដោយប្រជាពលរដ្ឋទាំង៣ភូមិមានការស្រុះស្រួលគ្នាបែបនេះ លោក កៅ ម៉ុយថង ជាគណៈអធិបតី និងជាអ្នកសម្របសម្រួលក៏បានឲ្យតំណាងសេវាករថ្មីបំពេញបំណងរបស់ប្រជាពលរដ្ឋទាំង៣ភូមិ គឺទុកឲ្យសេវាករចាស់បន្តការផ្គត់ផ្គង់អគ្គិសនីបន្តទៀត៕
ប្រជាពលរដ្ឋ៣ភូមិធ្វើការតវ៉ាមិនទទួលយកការផ្គត់ផ្គង់អគ្គិសនីរបស់សេវាករថ្មី
0 Comments