ព្រះសីហនុ ៖ ស្ត្រីមេម៉ាយវ័យ៣១ឆ្នាំម្នាក់ ឈ្មោះ ហែម សុផល ដែលមានប្តីជាជនរងគ្រោះឈ្មោះ ហែម ណារិន អាយុ៥២ឆ្នាំ ដែលបានស្លាប់ចោលរូបនាង និងកូនស្រីតូចក្នុងគ្រោះថ្នាក់ចរាចរណ៍រួមគ្នាជាមួយក្រុមតារាចម្រៀង ខេមរៈ សេរីមន្ត កាលពីយប់ថ្ងៃទី៨ ខែមីនា ឆ្នាំ២០១៣កន្លងទៅនៅតាមបណ្ដោយផ្លូវជាតិលេខ៤ បានធ្វើការអះអាងថា រហូតមកដល់ពេលនេះរូបនាងមិនទាន់បានទទួលសំណងអ្វីនៅឡើយទេ ជាហេតុធ្វើឲ្យរូបនាង និងកូនស្រីតូចរងទុក្ខលំបាកគ្រប់ពេលវេលា រកទីបំផុតគ្មាន។
ស្ត្រីមេម៉ាយឈ្មោះ ហែម សុផល អាយុ៣១ឆ្នាំ បាននិយាយរៀបរាប់ប្រាប់ឲ្យដឹងថា ប្តីរបស់ នាងឈ្មោះ ហែម ណារិន អាយុ៥២ឆ្នាំ និងត្រូវជាកូនប្រសារបស់បុរសជាឪពុក ដែលជាអ្នកបើកបររថយន្តស្ទូច នៅយប់កើតហេតុនោះ ប្តីរបស់គាត់ត្រូវបានគេហៅជួយស្ទូចយករថយន្តបុកប៉ះគ្នាចេញពីផ្លូវ ហើយក្នុងពេលកំពុងធ្វើការស្ទូចក៏មានទាំងកម្លាំងនគរបាលជួយបញ្ជាចរាចរណ៍ផងដែរប៉ុន្តែអកុសល ក៏ស្រាប់តែមានរថយន្តដឹកស្រាបៀរមួយគ្រឿងបើកលឿនមកបុកផ្ទប់លើរថយន្តស្ទូចបណ្តាលឲ្យអ្នកបើកបររថយន្តស្ទូចដែលត្រូវជាប្តីរបស់គាត់ និងជាកូនប្រសាស្លាប់បាត់បង់ជីវិត រួមមានទាំងសមត្ថកិច្ចខ្លះទៀតក៏រងរបួសជាមួយគ្នាដែរ។ ហើយបញ្ហានេះ ចាប់តាំងពីពេលនោះរហូតមកដល់ពេលនេះ រយៈពេលជិត៣ឆ្នាំហើយ គ្រួសាររបស់គាត់នៅពុំទាន់ទទួលបានសំណងណាមួយនៅឡើយ បើទោះជារឿងក្ដីនេះខាងសាលាឧទ្ធរណ៍បានសម្រេចឲ្យភាគីបង្កហេតុផ្តល់សំណងមក គ្រួសារនាងចំនួន៤ពាន់ដុល្លារអាមេរិកយ៉ាងណាក្តី។
ជុំវិញបញ្ហានេះ ស្ត្រីមេម៉ាយរងគ្រោះលើកដៃសំពះសុំឲ្យភាគីពាក់ព័ន្ធ និងស្ថាប័នមានសមត្ថកិច្ចគ្រប់ថ្នាក់ មេត្តាជួយពន្លឿនការបង់ប្រាក់សំណងដល់គ្រួសាររបស់ពួកគាត់ដោយការយោគយល់ពីទុក្ខលំបាក និងដោយការអនុគ្រោះផងចុះ ដើម្បីបានថវិកានេះយកទៅបំពេញតម្រូវការក្នុងគ្រួសារ និងជួយកូនស្រីតូចដែលកំព្រាឪពុកស្លាប់។
គួររំលឹកផងដែរថា គ្រោះថ្នាក់ចរាចរណ៍ផ្ទួនៗលើរថយន្តរបស់អ្នកចម្រៀងលោក ខេមរៈសិរីមន្ត នៅស្រុកព្រៃនប់ ខេត្តព្រះសីហនុ លើផ្លូវជាតិលេខ៤ ត្រង់ចំណុចឃុំបិត្រាងគឺកើតឡើងកាលពីយប់ថ្ងៃទី៧ ឈានចូលថ្ងៃទី៨មីនា ឆ្នាំ២០១៣ បណ្តាលឲ្យមនុស្ស៧នាក់ស្លាប់ និងរបួស៨នាក់ រួមនឹងរថយន្តតូច-ធំចំនួន៧គ្រឿងរងការខូចខាត៕
គ្រួសារជនរងគ្រោះដែលជួបគ្រោះថ្នាក់ចរាចរណ៍ជាមួយខេមរៈ សេរីមន្ត រកអន្តរាគមន៍ពីស្ថាប័នពាក់ព័ន្ធទាមទារសំណង
0 Comments