តាកែវ ៖ មួយរយៈចុងក្រោយនេះខេត្តកំពតមានភ្លៀងធ្លាក់ជាបន្តបន្ទាប់ ប៉ុន្តែមិនបានរាយប៉ាយគ្រប់កន្លែងនោះទេ ជាហេតុធ្វើឲ្យប៉ះពាល់ផ្ទៃដីស្រូវវស្សាដែលប្រជាកសិករទើបតែធ្វើការដាំដុះប្រមាណជាង ១.០០០ ហិកតា ក្នុងស្រុកកំពង់ត្រាច និងស្រុកបន្ទាយមាស។
លោក គួច វេងស្រ៊ុន បានឲ្យដឹងថា ឆ្លើយតបទៅនឹងបញ្ហានេះ លោករដ្ឋមន្ត្រី លឹម គានហោ បានបញ្ជាមកមន្ទីរធនធានទឹក និងឧតុនិយមខេត្តកំពតឲ្យចុះអន្តរាគមន៍សង្គ្រោះភ្លាមៗ ដោយប្រើប្រាស់នូវទឹកដែលយើងបម្រុងទុក ព្រមទាំងចាត់ឲ្យក្រុមការងារបច្ចេកទេសក្រសួង ចុះមកពិនិត្យ និងជួយលើការងារនេះបន្ថែមទៀត។
លោកអនុរដ្ឋលេខាធិការបានបន្តថា ការងារអន្តរាគមន៍សង្គ្រោះស្រូវវស្សាចុងដៃខាងលើ ក្រុមការងារមន្ទីរធនធានទឹក និងឧតុនិយមខេត្តកំពតបាននិងកំពុងប្រើប្រាស់ម៉ាស៊ីនបូមទឹកខ្នាតមធ្យម (៦៥ សេះ) ចំនួន ០១ គ្រឿង បូមយកទឹកពីព្រែកតន់ហន់ ទម្លាក់ចូលប្រឡាយមេព្រែកក្រឹស ដើម្បីនាំទឹកមកស្រោចស្រពស្រូវវស្សាប្រមាណ ៥០០ ហិកតា ក្នុងឃុំព្រែកក្រឹស ស្រុកកំពង់ត្រាច និងស្ថានីយបូមទឹកហ៊ុនសែនទី ៤៥ បូមយកទឹកពីស្ទឹងទូកមាសទម្លាក់ចូលប្រឡាយស្ថានីយហ៊ុនសែនទី៤៥ទូកមាស ដើម្បីនាំទឹកមកស្រោចស្រពស្រូវវស្សាប្រមាណ ៦០០ ហិកតា ក្នុងឃុំទូកមាសខាងលិច ស្រុកបន្ទាយមាស។
ដោយឡែក ការងារបូមយកទឹកពីទន្លេបាសាក់មកបញ្ចូលក្នុងអាងទឹកដងខ្ញម សម្រាប់ផ្គត់ផ្គង់ផ្ទៃដីស្រូវរដូវប្រាំងរបស់ប្រជាកសិករប្រមាណ ៥០០ ហិកតា ស្ថិតក្នុងសង្កាត់រកាក្រៅ ក្រុងដូនកែវ និងឃុំស្រងែ ស្រុកទ្រាំង ត្រូវបានលោក គួច វេងស្រ៊ុន បញ្ជាក់ឲ្យដឹងថា បន្ទាប់ពីបានដាក់ឲ្យដំណើរបូមដោយប្រើប្រាស់ម៉ាស៊ីនខ្នាតមធ្យម (៦៥សេះ) ចំនួន ០៦ គ្រឿង មកដល់ពេលនេះ ទឹកក្នុងអាងដងខ្ញម កើនឡើងបានប្រមាណ ៤០ភាគរយហើយ ខណៈប្រជាកសិករកំពុងទាញយកទៅប្រើប្រាស់ក្នុងការសាបព្រោះដកស្ទូងដំណាំស្រូវរដូវប្រាំងរបស់ពួកគាត់ជាបណ្ដើរៗ។ លោកបន្តថា ការងារបូមទឹកបញ្ចូលអាងដងខ្ញមនេះនឹងបន្តរហូតដល់ទឹកទន្លេស្រកផុត៕
ក្រុមការងារក្រសួងធនធានទឹកចុះពិនិត្យការងារសង្គ្រោះស្រូវ និងការងារវេចខ្ចប់ទឹក
0 Comments