ភ្នំពេញ ៖ អភិបាលរាជធានីភ្នំពេញលោកប៉ា សុជាតិវង្ស គ្រោងនឹងប្រកាសបញ្ចប់ការដោះស្រាយវិវាទដីធ្លីនៅក្នុងសហគមន៍អ្នកបឹងកក់ នៅសប្តាហ៍ក្រោយនេះ រួមនឹងការប្រកាសអោយសាធារណជន និងពិភពលោកបានដឹងពីបំណងប្រាថ្នារបស់អាជ្ញាធរ ក្នុងការដោះស្រាយ រួមជាមួយនឹងមូលហេតុនិងការទាមទាររបស់ប្រជាពលរដ្ឋ ដែលមិនព្រមទទួលយកសំណង ខណៈដែលអ្នកមិនទាន់ទទួលយកគោលនយោបាយសំណង់នៅសល់ចំនួន៧គ្រួសារទៀត។
ការលើកឡើងរបស់លោកប៉ា សុជាតិវង្សខាងលើ បានធ្វើឡើងក្នុងជំនួបដោះស្រាយវិវាទដីធ្លីរបស់អ្នកភូមិបឹងកក់កាលពីថ្ងៃទី០៤ ខែវិច្ឆិកា នៅសាលារាជធានីភ្នំពេញ ដើម្បីឈានទៅបញ្ចប់បញ្ហាបឹងកក់ទាំងស្រុង។
លោកប៉ា សុជាតិវង្សអភិបាលរាជធានីភ្នំពេញបានបញ្ជាក់ថា បញ្ហាវិវាទដីធ្លីនៅក្នុងសហគមន៍បឹងកក់មិនអាចអូស បន្លាយតទៅមុខបានទៀតទេ ពោលគឺទោះបីការដោះស្រាយយ៉ាងណាក៏ដោយនឹងត្រូវតែបញ្ចប់ជាផ្លូវការនៅសប្តាហ៍ក្រោយ។ លោកអភិបាលរាជធានីភ្នំពេញបានអះអាងថា ការឈានទៅបញ្ចប់ដូច្នេះដោយសារទំនាស់ កាន់តែរួមតូចពីជាង៤ពាន់គ្រួសារ នៅសល់ចំនួនត្រឹមតែ៧គ្រួសារទៀតប៉ុណ្ណោះ ហើយប្រជាពលរដ្ឋដែលនៅសេសសល់ទាំង៧គ្រួសារនេះនៅតែទាមទារសំណងខ្ពស់ ហួសពីលទ្ធភាពដែលអាជ្ញាធរមានសម្រាប់ផ្តល់ជូន។
តែទោះជាយ៉ាងនេះក្តី លោកបានបញ្ជាក់បន្ថែមថា ចាប់ពីពេលនេះរហូតដល់សប្ដាហ៍ក្រោយអ្នកនៅសេសសល់ទាំងនោះ នៅតែមានឱកាសចរចារលើក ជាសំណូមពរជាមួយគណៈកម្មការដោះស្រាយ ដើម្បីទទួលបានគោលការណ៍រួមមួយសម្រាប់យកមកពិភាក្សាចុងក្រោយ ហើយនឹងប្រកាសអោយសាធារណជន និងពិភពលោកបានដឹងពីបំណងប្រាថ្នារបស់អាជ្ញាធរ ក្នុងការដោះស្រាយ រួមជាមួយនឹងមូលហេតុនិងការទាមទារបស់ប្រជាពលរដ្ឋដែលមិនព្រមទទួលយកសំណង។
អ្នកស្រីលី ចាន់ណារី ជាប្រជាពលរដ្ឋ ដែលនៅសេសសល់មិនទាន់ទទួលយកសំណង់ពីអាជ្ញាធរបានបញ្ជាក់ថា សាលាក្រុងពុំអាចបិទការដោះស្រាយសុំណុំរឿងនេះ បានទេ ប្រសិនបើ ការដោះស្រាយមិនទាន់ចប់គ្រប់នោះ។ តែទោះជាយ៉ាងនេះក្តីអ្នកស្រីថា អាជ្ញាធរបានខិតខំចូលរួម ដោះស្រាយបញ្ហាវិវាទដីធ្លីនេះយ៉ាងសកម្មហើយ។ អ្នកស្រីបន្ថែមថា ការដែលមិនទាន់ទទួលយកសំណងនេះ ដោយការរដោះស្រាយពុំមាន តម្លាភាពនិងសមធម៌ ខណៈដែលដីមានទំហំធំចាប់ពីជាង1ពាន់ការ៉េឡើងទៅ ដូច្នេះដើម្បីដោះស្រា យបានអាជ្ញាធរគួរផ្តល់សំណងដីចំនួន៥៣ភាគរយសមាត្រទៅនឹងទំហំដីដែលបាត់បង់។
គួរបញ្ជាក់ផងដែរថា ទំនាស់ដីធ្លីរបស់អ្នកភូមិបឹងកក់ បានកើតឡើងតាំងពីឆ្នាំ២០០៧បន្ទាប់ពីរាជរដ្ឋាភិបាលបានសម្រេចឱ្យក្រុមហ៊ុនស៊ូកាគូអ៊ីន ធ្វើការវិនិយោគតំបន់បឹងកក់រយៈពេល៩៩ឆ្នាំ ដើម្បីប្រែក្លាយទឹកដីដែលធ្លាប់បង្ហាញនូវភាពកខ្វក់ និងភាពអនាធិបតេយ្យតាំងពីយូរមកហើយនោះ ឱ្យទៅជាគ្រាប់ពេជ្រ ជាតំបន់សេដ្ឋកិច្ចនិងទេសចរណ៍ដ៏ទាក់ទាញ។ តាមរយៈការអភិវឌ្ឍតំបន់ នេះបានធ្វើឲ្យប្រជាពលរដ្ឋ រងផលប៉ះពាល់ ចំនួន៤២៥២គ្រួសារ ក្នុងនោះជាង៣០០០គ្រួសារបានទទួលគោលនយោបាយទៅរស់នៅកន្លែងថ្មី ហើយចំណែកជាង១០០០គ្រួសារទៀតទទួលបានការអភិវឌ្ឍន៍នៅនឹងកន្លែង ហើយរហូតមកទល់ ពេលនេះនៅសល់តែ៧គ្រួសារទៀតប៉ុណ្ណោះដែលមិនព្រមទទួលយកគោលនយោបាយពីរដ្ឋ៕
នៅសប្ដាហ៍ក្រោយ អាជ្ញាធររាជធានីភ្នំពេញនឹងប្រកាស បិទការដោះស្រាយវិវាទដីធ្លីសហគមន៍អ្នកបឹងកក់
0 Comments