ក្រចេះ ៖ ជនជាតិវៀតណាមចំនួន២នាក់ត្រូវបានកម្លាំងជំនាញសន្តិសុខធ្វើការឃាត់ខ្លួនជាមួយនឹងអាវុធខ្លី១ដើម និងសម្ភារៈមួយចំនួនកាលពីថ្ងៃទី៤ ខែវិច្ឆិកា ឆ្នាំ២០១៥។
ការឃាត់ខ្លួននេះធ្វើឡើងនៅពេលកម្លាំងខាងលើចុះត្រួតពិនិត្យជនបទេសចេញចូលស្នាក់នៅនិងប្រកបមុខរបរផ្សេងៗ នៅចំណុចអូរគគីរក្នុងភូមិសាស្ត្រ ភូមិស្រែថ្មីឃុំ ឃ្សឹម ស្រុកស្នួល ខេត្តក្រចេះ។
ប្រភពព័ត៌មានពីសមត្ថកិច្ច ដែលចុះប្រតិបត្តិការករណីខាងលើ បានឲ្យដឹងថា ជនជាតិវៀតណាមទាំង២នាក់នោះ ទី១.ឈ្មោះឡេ វាងអាំ ភេទប្រុស អាយុ៤៥ឆ្នាំ មានទីលំនៅភូមិតឹងហៀប ឃុំតឹងថាន់ ស្រុកបូដូប ខេត្តប៊ិញភឿកប្រទេសវៀតណាម ទី២.ឈ្មោះយឿង វ៉ាយអាំងភេទប្រុសអាយុ៤៧ឆ្មាំ មានទីលំនៅភូមិតឹងហៀប ឃុំតឹងថាន់ ស្រុកបូដប ខេត្តប៊ិញភឿ់ក ប្រទេសវៀតណាម។ ពួកគេបានកាន់កាប់ និងប្រើប្រាស់អាវុធដោយខុសច្បាប់ ហើយតាមចម្លើយសារភាពអាវុធនោះជារបស់ឈ្មោះហួត ជាយោធាវរៈការពារព្រំដែនគោកលេខ២០៤។ សមត្ថកិច្ចបានបញ្ជាក់ថា ជនជាតិវៀតណាមទាំង២នាក់ខាងលើបានចូលមកក្នុងទឹកដីកម្ពុជាដើម្បីស៊ីឈ្នួលអារឈើឲ្យឈ្មោះហួត ដែលជាម្ចាស់អាវុធនោះ។
ប្រភពបានឲ្យដឹងទៀតថា ក្នុងការឃាត់ខ្លួននោះកម្លាំងបានដកហូតម៉ូតូ២គ្រឿង ម៉ាស៊ីនត្រង់តឺន័រ២គ្រឿង អាវុធអាកាបត់១ដើម គ្រាប់២១គ្រាប់ បង់១។ បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកស្នួលដើម្បីកសាងសំណុំរឿងតាមនីតិវិធី និងបញ្ជូនខ្លួនជនសង្ស័យទាំង២នាក់ទៅសាលាដំបូងខេត្តចាត់ការទៅតាមច្បាប់៕
ឃាត់ខ្លួនជនជាតិវៀតណាម២នាក់ជាមួយនឹងអាវុធខ្លី១ដើម និងសម្ភារៈមួយចំនួន
0 Comments