កំពង់ឆ្នាំង ៖ លោកដួង សាវ៉ាង ក្រុមការងារថ្នាក់កណ្តាល និងជាអនុប្រធានក្រុមការងារបក្សចុះជួយស្រុករលាប្អៀរ បានមានប្រសាសន៍នៅក្នុងពេលចូលរួមក្នុងពិធីបិទវគ្គបណ្តុះបណ្តាលសកម្មជនគណបក្សប្រជាជនកម្ពុជាស្រុករលាប្អៀរ នារសៀលថ្ងៃទី១១ ខែវិច្ឆិកា ឆ្នាំ២០១៥ នៅស្នាក់ការ គណបក្សប្រជាជនកម្ពុជា ស្រុករលាប្អៀរ ខេត្តកំពង់ឆ្នាំងថា បញ្ហានៅប្រទេសកម្ពុជាចុងក្រោយនេះ មានតែគណបក្សប្រជាជនកម្ពុជាមួយគត់ ដែលបានរំដោះប្រជាពលរដ្ឋចេញពីរបបប្រល័យពូជសាសន៍ប៉ុលពតឲ្យមានជីវិតលើកទី២នៅថ្ងៃទី៧ ខែមករា ឆ្នាំ១៩៧៩ និងចាប់ផ្តើមអភិវឌ្ឍន៍ប្រទេសតាំងពីបាតដៃទទេ ដោយការពារផង កសាងផង។
ដោយការអនុវត្តបានល្អនូវនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នៅឆ្នាំ១៩៩៨ បានរំលាយចោលអង្គការចាត់តាំងរបស់ពួកប៉ុល ពតទាំងស្រុង ហើយសង្គ្រាមរ៉ាំរៃរាប់ទស្សវត្ស នៅកម្ពុជាត្រូវបានបញ្ចប់ និងបាននាំមកនូវសន្តិភាពពេញលេញជូនប្រជាជនកម្ពុជាទូទាំងប្រទេស ហើយបានបន្តការកសាងប្រទេសឲ្យមានការរីកចម្រើនលើគ្រប់វិស័យដល់បច្ចុប្បន្ននេះ។
លោកអ៊ឹង លាងហ៊ួរ សមាជិកអចិន្ត្រៃយ៍គណបក្សប្រជាជនកម្ពុជា ខេត្តកំពង់ឆ្នាំង បានអានរបាយការណ៍ស្តីពីលទ្ធផលវគ្គបណ្តុះបណ្តាលដោយបានបញ្ជាក់ថា វគ្គបណ្តុះបណ្តាលសកម្មជនគណបក្សប្រជាជនកម្ពុជា ស្រុករលាប្អៀរ មានរយៈពេល២ថៃ្ង ដោយបានចាប់ផ្តើមពីថ្ងៃទី១០ ដល់ថ្ងៃទី១១ ខែវិច្ឆិកា ឆ្នាំ២០១៥ ដែលមានសិក្ខាកាមជាសកម្មជនគណបក្សប្រជាជនកម្ពុជាស្រុករលាប្អៀរចូលរួមសរុបចំនួន១៩១នាក់ ក្នុងនោះស្រី១៨នាក់ ហើយទទួលបានលទ្ធផលល្អប្រសើរ។
លោកបានបន្តទៀតថា គោលបំណងសំខាន់ គឺឲ្យសិក្ខាកាមដែលជាសកម្មជនយល់ពីប្រវត្តិសកម្មភាពស្នាដៃនិងបទពិសោធន៍ក្នុងការដឹកនាំទទួលបានជោគជ័យរបស់គណបក្សប្រជាជនកម្ពុជា ,លក្ខន្តិកៈគណបក្ស ,គោលការណ៍គ្រឹះនៃកម្មវិធីនយោបាយរបស់បក្ស ,ភារកិច្ចត្រូវបន្តអនុវត្តចំពោះមុខ ,ពង្រឹងក្រមសីលធម៌របស់មន្ត្រីគណបក្សប្រជាជន និងប្រជាពលរដ្ឋទូទៅ ដោយមិនប្រកាន់ពូជសាសន៍ និងនិន្នាការនយោបាយឡើយ និងកត្តាសំខាន់គឺឲ្យសកម្មជនគណបក្សបានយល់ពីច្បាប់បោះឆ្នោតនៅកម្ពុជា។
លោកស្រី ជុំ ពៅ តំណាងឲ្យសិក្ខាមបានឡើងធ្វើការប្តេជ្ញាចិត្ត បន្តគាំទ្រនិងចូលរួមអនវត្តនូវគោលនយោបាយរបស់គណបក្សទាំង១១ចំណុច និងគាំទ្រចូលរួមអនុវត្តតាមយុទ្ធចតុកោណតំណាក់កាលទី៣នៃរាជរដ្ឋបាលនីតិការទី៥នៃរដ្ឋសភា ដែលមានសម្តេចតេជោ ហ៊ុន សែន ជានាយករដ្ឋមន្ត្រី។
ប្តេជ្ញាកសាងសាមគ្គីភាពឯកភាពផ្ទៃក្នុង ទំនាក់ទំនងឲ្យបានល្អជាមួយប្រជាពលរដ្ឋ។ ប្តេជាប្រឆាំងដាច់ខាតនូវពួកអគតិមួយចំនួនតូចដែលប៉ុនប៉ងផ្តួលរំលំរាជរដ្ឋាភិបាលស្របច្បាប់។ ប្តេជ្ញាគាំទ្របេក្ខភាពសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីគ្រប់អាណត្តិ ដើម្បីឲ្យប្រទេសជាតិមានសុខសន្តិភាព និងទទួលបានការអភិវឌ្ឍន៍សមិទ្ធផលថ្មីថែមទៀតសម្រាប់កម្ពុជានាពេលអនាគត។
ឯកឧត្តម ដួង សាវ៉ាង បានផ្តាំផ្ញើដល់សិក្ខាកាមដែលជាសកម្មជនគណបក្សប្រជាជនកម្ពុជាត្រូវអនុវត្តឲ្យបានល្អ តាមលក្ខន្តិកៈគោលនយោបាយរបស់គណបក្ស និងច្បាប់របស់រដ្ឋ។ ត្រូវប្រកាន់ខ្ជាប់នូវក្រមសីលធម៌មានទំនាក់ទំនងល្អ និងកសាងអំពើល្អជាមួយប្រជាពលរដ្ឋ ដើម្បីទាក់ទាញភាពជឿទុកចិត្តពីប្រជាពលរដ្ឋ ពីសកម្មភាពជាក់ស្តែង និងការខិតខំប្រឹងប្រែងរបស់រាជរដ្ឋាភិបាល ដែលដឹកនាំដោយគណបក្សប្រជាជន ដើម្បីឈានទៅទទួលបានជ័យជំនះជូនគណបក្សប្រជាជនកម្ពុជា ក្នុងការបោះឆ្នោតឆ្នាំ២០១៧ និងឆ្នាំ២០១៥ខាងមុខនេះ៕
ក្រុមការងារបក្សចូលរួមពិធីបិទវគ្គបណ្តុះបណ្តាលសកម្មជនគណបក្សប្រជាជនកម្ពុជាស្រុករលាប្អៀរ
0 Comments