ក្រុមអ្នកប្រយុទ្ធអំបូរឃើដ ដោយមានការជួយគាំទ្រពីយុទ្ធនាការផ្លូវអាកាសនាំមុខដោយសហរដ្ឋអាមេរិកផងនោះ បានបើកការវាយលុកមួយកាលពីថ្ងៃព្រហស្បតិ៍ ដោយសំដៅទៅវាយដណ្ដើមយកក្រុងយុទ្ធសាស្ដ្រ Sinjar ដែលក្រុមរដ្ឋឥស្លាម IS វាយយកបានកាលពីឆ្នាំទៅនោះមកវិញ ពេលដែលកាលណោះមានការវាយប្រយុទ្ធគ្នាដ៏ខ្លាំង បណ្ដាលឲ្យមានការភៀសខ្លួនជនជាតិភាគតិច Yazidis ដល់ទៅរាប់សិបពាន់នាក់ ហើយក៏ជាលើកដំបូងដែលនាំឲ្យសហរដ្ឋអាមេរិក បើកការវាយប្រហារតាមអាកាសប្រឆាំងនឹងក្រុមសកម្មប្រយុទ្ធនោះ។
សេចក្ដីប្រកាសមួយ ធ្វើឡើងពីក្រុមប្រឹក្សាសន្ដិសុខតំបន់នៃជនជាតិឃើដ បាននិយាយថា ក្រុមអ្នកប្រយុទ្ធ Peshmerga ប្រមាណ៧,៥០០នាក់ កំពុងតែរួមផ្ដុំគ្នាត្រង់លើភ្នំដែលជាកូនទីក្រុង ដោយពួកគេមកពីរណសិរ្ស៣កន្លែងនៅក្នុងការប្រឹងប្រែងដើម្បីវាយដណ្ដើមយកទីក្រុងនោះមកគ្រប់គ្រងវិញ ជាមួយពេលត្រូវកាត់ផ្ដាច់បណ្ដាញផ្គត់ផ្គង់ ដែលត្រូវបានប្រើប្រាស់ដោយក្រុមសកម្មប្រយុទ្ធឥស្លាម។ សេចក្ដីប្រកាសនោះក៏បានទាំងនិយាយផងដែរថា ក្រុមឃើដមានបំណងបង្កើតតំបន់ការពារទ្រនាប់មួយដើម្បីការពារទីក្រុង និងពលរដ្ឋដែលរស់នៅទីនោះពីការបាញ់ផ្លោងដោយកាំភ្លើងផ្លោង។
ក្រុមអ្នកប្រយុទ្ធ Peshmerga ឃើដនិងក្រុមសកម្មប្រយុទ្ធ បានបាញ់តគ្នាទៅវិញទៅមកដោយកាំភ្លើងធុនធ្ងន់តាំងពីប៉ុន្មានម៉ោងនៅពេលព្រឹកព្រលឹមថ្ងៃព្រហស្បតិ៍ ខណៈពេលដែលក្រុមអ្នកប្រយុទ្ធឃើដ កាន់តែរំកិលខ្លួនទៅមុខកាន់តែជិត។
យន្ដហោះចម្បាំងនៅក្នុងក្រុមប្រទេសចម្រុះនាំមុខដោយសហរដ្ឋអាមេរិក ក៏បានបើកការវាយប្រហារនៅជុំវិញក្រុង Sinjar ផងដែរ ដើម្បីឆ្ពោះទៅរកការវាយលុកកាន់តែធំថែមទៀតនៅ ថ្ងៃព្រហស្បតិ៍។
ក្រុង Sinjar រងការវាយដណ្ដើមកាន់កាប់បានដោយក្រុម IS កាលពីខែសីហា ឆ្នាំ២០១៤ ក្នុងរយៈពេលយ៉ាងខ្លី បន្ទាប់ពីក្រុមជ្រុលនិយមនេះវាយដណ្ដើមយកបានទីក្រុងដ៏ធំជាងគេលំដាប់ទីពីរគឺក្រុង Mosul ព្រមទាំងវាយយកបានតំបន់ដ៏ល្វឹងល្វើយនៃទឹកដីអ៊ីរ៉ាក់ភាគខាងជើង មកនោះ៕
AP
ក្រុមឃើដអ៊ីរ៉ាក់ បើកការវាយលុកដ៏ធំមួយ ដើម្បីយកក្រុង Sinjar ពីក្រុម IS មកវិញ
0 Comments