ប៉ោយប៉ែត ៖ ពលរដ្ឋចំនួន១៤គ្រួសារនាំគ្នាតវ៉ានៅខាងមុខសាលាក្រុង ក្នុងគោលបំណងទាមទារ ឲ្យចៅហ្វាយក្រុងជួយរកយុត្តិធម៌ឲ្យពួកគាត់ ខណៈដែលក្រុមហ៊ុនអានកូបានផ្តាច់ចរន្តអគ្គិសនីរបស់ពួកគាត់អស់រយៈពេល៥ថ្ងៃមកហើយ បើទោះជាពួកគាត់តវ៉ាយ៉ាងណាក៏ដោយក៏គេមិនអនុគ្រោះឲ្យដែរ។
នៅព្រឹកថ្ងៃទី១០ ខែវិច្ឆិកា ឆ្នាំ២០១៥នេះ នៅចំណុចខាងមុខសាលាក្រុងប៉ោយប៉ែតតែម្តងគឺមានប្រជាពលរដ្ឋ១៤គ្រួសារ ដែលរស់នៅលើចិញ្ចើមផ្លូវរបស់កាស៊ីណូហ្គោលដិនក្រោន ស្ថិតក្នុងភូមិក្បាលស្ពាន១សង្កាត់ និង ក្រុងប៉ោយប៉ែតខេត្តបន្ទាយមានជ័យ ដែលត្រូវក្រុមហ៊ុនខាងលើផ្តាច់ចរន្តអគ្គិសនីក្នុងលំនៅដ្ឋានពួកគាត់អស់រយៈពេល៥ថ្ងៃមកហើយ មកដល់ពេលនេះ គឺមិនទាន់ដោះស្រាយដាច់នៅឡើយទ។
តាមការលើកឡើង របស់ជនរងគ្រោះទាំង១៤គ្រួសារបានឲ្យដឹងថា ពួកគាត់មករស់នៅតាមបណ្តោយផ្លូវជាប់កាស៊ីណូខាងលើតាំងពីឆ្នាំ២០០១មកម្ល៉េះ ហើយពួកគាត់បានមានការទទួលស្គាល់ពីអាជ្ញាធរទៀតផង ជាពិសេសមានប័ណ្ណភ្លើង និង ប័ណ្ណទឹក សម្រាប់យកបង់ជូនក្រុមហ៊ុនអានកូទៀតផង។
ជនរងគ្រោះបានបន្តទៀតថា ការផ្តាច់ភ្លើងរបស់ក្រុមហ៊ុនខាងលើនោះ គឺបង្កការប៉ះពាល់ដល់ក្រុមគ្រួសារ ដែលមានចំនួនខាងលើទៀតផង ត្រង់ថា ក្នុងផ្ទះនីមួយៗ គឺប្រើប្រាស់ភ្លើងអគ្គិសនីទាំងអស់តែឥឡូវបែរជាមកប្រើភ្លើងទៀនទៅវិញ ហើយធ្វើឲ្យពួកគាត់ភ័យខ្លាចនៅពេលខ្យល់ភ្លៀងម្តងៗ គឺភ្លើងទៀននោះអាចទៅប៉ះជញ្ជាំងស្លឹកបង្កើតទៅជាអគ្គិភ័យធ្ងន់ធ្ងរនាពេលណាមួយមិនខាន។
អាជ្ញាធរក្រុងប៉ោយប៉ែត បានធ្វើការសម្របសម្រួលជូនជនរងគ្រោះរួចហើយ ដោយសន្យាថានឹងពិភាក្សាគ្នាជាមួយក្រុមហ៊ុនអានកូ ដើម្បីរកគន្លឹះសមស្របណាមួយជូនប្រជាពលរដ្ឋ ដែលអាចធ្វើទៅបានដើម្បីបញ្ចៀសរាល់បញ្ហាផ្សេងៗ ដែលបានកើតឡើងជាយកថាហេតុ នាពេលខាងមុខនេះ ហើយអាជ្ញាធរដដែលនោះ សំណូមពរដល់ប្រជាពលរដ្ឋធ្វើយ៉ាងណាអនុវត្តទៅតាមនីតិវិធីច្បាប់ឲ្យបានត្រឹមត្រូវពាក់ព័ន្ធនឹងការរស់នៅ លើចិញ្ចើមផ្លូវ ដែលប៉ះពាល់ទៅលើផ្លូវសាធារណ ឬ ផ្លូវឯកជនក្តីគឺត្រូវយកយល់គ្នាទៅវិញទៅមកឲ្យបានល្អ៕
ពលរដ្ឋ១៤គ្រួសារមកតវ៉ានៅមុខសាលាក្រុងរឿងក្រុមហ៊ុនអានកូផ្តាច់ចរន្តអគ្គិសនី
0 Comments