ភ្នំពេញ ៖ ជនសង្ស័យម្នាក់ត្រូវបានកម្លាំងសមត្ថកិច្ចប៉ុស្តិ៍នគរបាលផ្សារដើមថ្កូវធ្វើការឃាត់ខ្លួនកាលពីវេលាម៉ោង១៧និង៤០នាទីល្ងាច ថ្ងៃទី២៦ ខែវិច្ឆិកា ឆ្នាំ២០១៥ នៅចំណុចផ្ទះគ្មានលេខ ច្រកចូលផ្លូវឌឿងហែម ក្រោយក្រុមហ៊ុន QB(013) ផ្លូវមុនីវង្ស ក្រុម៣២ ភូមិ៥ សង្កាត់ផ្សារដើមថ្កូវ ខណ្ឌចំការមន។
សមត្ថកិច្ចបានឲ្យដឹងបន្តថា មុនពេលឃាត់ខ្លួន កម្លាំងសមត្ថកិច្ចប្រចាំការប៉ុស្ដិ៍នគរបាលផ្សារដើមថ្កូវកំពុងល្បាតនៅក្នុងភូមិសាស្ត្ររបស់ខ្លួន ក៏ប្រទះឃើញបុរសម្នាក់ជិះម៉ូតូម្នាក់ឯង គួរឲ្យសង្ស័យ សមត្ថកិច្ចក៏បើកម៉ូតូដេញតាមឃាត់សាកសួរ ប៉ុន្តែជនសង្ស័យមានខ្លួន បានព្យាយាមបើកគេច ខណៈនោះនៅតែគេចមិនរួច ក៏ត្រូវសមត្ថកិច្ចឃាត់ខ្លួនបាននៅចំណុចផ្ទះគ្មានលេខ ច្រកចូលផ្លូវឌឿងហែម ក្រោយក្រុមហ៊ុន QB(013) ផ្លូវមុនីវង្ស ក្រុម៣២ ភូមិ៥ សង្កាត់ផ្សារដើមថ្កូវ ខណ្ឌចំការមន ធ្វើការឆែកឆេរឃើញគ្រឿងញៀន១កញ្ចប់ធំ, យ៉ាម៉ា១៣គ្រាប់, ជញ្ជីងថ្លឹង២ ឧបករណ៍សម្រាប់ញេចគ្រឿងញៀន១ និងថង់សម្រាប់ច្រកគ្រឿងញៀនមួយចំនួន ព្រមទាំងវត្ថុតាងមួយចំនួនទៀតដែលនៅលើដងខ្លួន។
សមត្ថកិច្ចបានប្រាប់ឲ្យដឹងថា ជនសង្ស័យមានឈ្មោះ ម៉ា ចាន់ថន អាយុ៣០ឆ្នាំ រស់នៅផ្ទះលេខ41E2Z ផ្លូវ១០៨ ភូមិ៥ សង្កាត់វត្តភ្នំ ខណ្ឌដូនពេញ រាជធានីភ្នំពេញ ជិះម៉ូតូម៉ាកហុងដាឌ្រីម សេ125 ស៊េរី2011 ពណ៌ខ្មៅ ពាក់ស្លាក់លេខភ្នំពេញ1BA-9124 និងដកហូតបានឧបករណ៍ញេចថ្នាំ១ដើម, ជញ្ជីងថ្លឹងថ្នាំ២គ្រឿង, ថ្នាំយ៉ាម៉ាផ្កាឈូក១៣គ្រាប់, ក្រាមពណ៌.ស ១កញ្ចប់ធំ និង៣កញ្ចប់តូច, លុយចំនួន២០ម៉ឺនរៀល រួមមានវត្ថុតាងមួយចំនួនទៀតផងដែរ។
ក្រោយពីធ្វើការឃាត់ខ្លួនជនសង្ស័យរួចមក សមត្ថកិច្ចបានបញ្ជូនជនសង្ស័យទៅប៉ុស្តិ៍នគរបាលរដ្ឋបាលផ្សារដើមថ្កូវដើម្បីធ្វើការសាកសួរ និងកសាងសំណុំរឿងបញ្ជូនបន្តទៅកាន់អធិការដ្ឋាននគរបាលខណ្ឌចំការមនដើម្បីចាត់ការតាមផ្លូវច្បាប់៕
ឃាត់ខ្លួនជនសង្ស័យម្នាក់ គ្រឿងញៀន១កញ្ចប់ធំ រួមនឹងយ៉ាម៉ា១៣គ្រាប់
0 Comments