បន្ទាយមានជ័យ ៖ គ្រោះថ្នាក់ចរាចរណ៍២៨៨ករណី ក្នុងឆ្នាំ២០១៥ ទូទាំងខេត្តបន្ទាយមានជ័យសម្លាប់មនុស្ស និងរបួសធ្ងន់-ស្រាល៥៨៧នាក់ តែចំនួននេះបើធៀបទៅនឹងឆ្នាំ២០១៤វិញ មានការថយចុះ ដោយឡែកការស្លាប់កើនឡើង។
យោងតាមរបាយការណ៍ នៃការិយាល័យចរាចរណ៍ជើងគោក នៃស្នងការនគរបាលខេត្តបន្ទាយមានជ័យបានឲ្យដឹងថា សម្រាប់ខេត្តបន្ទាយមានជ័យក្នុងឆ្នាំ២០១៥ ដោយគិតចាប់ពីថ្ងៃទី១១ខែវិច្ឆិកា ឆ្នាំ២០១៤ ដល់ថ្ងៃទី១០ ខែវិច្ឆិកា ឆ្នាំ២០១៥ មានគ្រោះថ្នាក់ចរាចរណ៍កើតមានឡើងចំនួន២៨៨ករណី បណ្តាលឲ្យមានអ្នកស្លាប់ចំនួន១៤៧នាក់ ក្នុងនោះមានស្ត្រី២៨នាក់ បើប្រៀបធៀបទៅនិងគ្រោះថ្នាក់ឆ្នាំ២០១៤ មាន១៣៥នាក់ កើនឡើង១២នាក់ ស្មើនឹង៩%។ របួសធ្ងន់២៣៩នាក់ ស្រី៥៤នាក់ ថយចុះ២០នាក់ ស្មើនឹង៨% ទៅនឹងឆ្នាំ២០១៤ របួសស្រាល២០២នាក់ ស្រី៥៤នាក់ បើប្រៀបធៀបទៅឆ្នាំ២០១៤វិញ ថយតែម្នាក់ស្មើនឹង១%។
គ្រោះថ្នាក់ចរាចរណ៍ដែលកើតឡើងញឹកញាប់ជាងគេ គឺនៅក្រុងសិរីសោភ័ណមានរហូតដល់១០០ករណី បន្ទាប់មកស្រុកព្រះនេត្រព្រះ៤៩ករណី មង្គលបូរី៤៤ករណី ក្រុងប៉ោយប៉ែត៤៨ករណី ស្វាយចេក២៤ករណី អូរជ្រៅ១០ករណី ម៉ាឡៃ៧ករណី ភ្នំស្រុក៦ករណី។
ជាមួយនឹងការស្លាប់ និងរបួសនេះដែរ ក៏បណ្តាលឲ្យខូចផ្នែកសម្ភារៈដូចជា ម៉ូតូ៣០១គ្រឿង រថយន្តតូច-ធំ១៧៩គ្រឿង និងយានយន្តផ្សេងៗ៣១គ្រឿង មូលហេតុបណ្ដាលឲ្យគ្រោះថ្នាក់ភាគច្រើន គឺកត្តាមនុស្សមានដល់២៨០ករណី ក្រៅពីនោះកត្តាយានយន្ត និងកត្តាអាកាសធាតុ។
គ្រោះថ្នាក់នេះ ទោះបីជាសមត្ថកិច្ចនគរបាលចរាចរណ៍ផ្លូវគោក នៃស្នងការនគរបាលខេត្តបន្ទាយមានជ័យបានខិតខំធ្វើការផ្សព្វផ្សាយច្បាប់ចរាចរណ៍គ្រប់រូបភាពដល់ប្រជាពលរដ្ឋ និងសិស្សានុសិស្ស ក៏ដូចជាការត្រួតពិនិត្យ រឹតបន្តឹង ការបើកបរ និងយានយន្តគ្រប់ប្រភេទដែលចរាចរណ៍លើផ្លូវសាធារណៈ៕
ឆ្នាំ២០១៥ ស្លាប់ និងរបួស៥៨៧នាក់នៅខេត្តបន្ទាយមានជ័យ
0 Comments