ភ្នំពេញ ៖ បុរសម្នាក់ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីថ្ងៃទី២៧ ខែវិច្ឆិកា ឆ្នាំ២០១៥ ឃុំខ្លួនដាក់ពន្ធនាគារ ក្រោមការចោទប្រកាន់ ពីបទឃាតកម្ម ពាក់ព័ន្ធការកាប់គេស្លាប់ម្នាក់ និង របួសធ្ងន់ពីរនាក់ ព្រោះទំនាស់ក្នុងវង់ផឹកស៊ី។
ជនល្មើស ត្រូវចោទប្រកាន់ តាមមាត្រា១៩៩ នៃក្រមព្រហ្មទណ្ឌ ដែលអាចប្រឈមមុខនឹងការជាប់ពន្ធនាគារពី១០ឆ្នាំទៅ២០ឆ្នាំ ប្រសិនបើតុលាការរកឃើញថា មានពិរុទ្ធភាពដូចការចោទប្រកាន់មែន ។
បុរសរូបនេះឈ្មោះ មាស រិទ្ធី ហៅមាស សុធី អាយុ២៤ឆ្នាំ មុខរបររត់ម៉ូតូឌុប ស្នាក់នៅផ្ទះជួលលេខ១៨ ផ្លូវជាតិលេខ២ ក្នុងភូមិព្រែកតាឡុង២ សង្កាត់ចាក់អង្រែក្រោម ខណ្ឌមានជ័យ ត្រូវបាននគរបាលខណ្ឌមានជ័យឃាត់ខ្លួន កាលពីថ្ងៃទី២៤ ខែវិច្ឆិកា ឆ្នាំ២០១៥។
ចំណែកជនរងគ្រោះទាំង៣នាក់ ទី១ឈ្មោះ ទូច សំអាង ភេទប្រុស អាយុ២៤ ឆ្នាំ មុខរបរ កម្មកររោងចក្រ របួសឆ្អឹងជំនីឆ្វេងបណ្ដាលឲ្យស្លាប់នៅពេលបញ្ជូនទៅដល់មន្ទីរពេទ្យ ទី២ ឈ្មោះ ទូច សំអុល ភេទប្រុស អាយុ៣៥ឆ្នាំ មុខរបរ កម្មកររោងចក្រ របួសលើដោះខាងឆ្វេង និង ទី៣ ឈ្មោះ ហ៊ីង មករា ភេទប្រុស អាយុ២៤ឆ្នាំ មុខរបរកម្មកររោងចក្រ របួសលើដោះខាងស្តាំ។
សមត្ថកិច្ចបានឱ្យដឹងថា កាលពីវេលាម៉ោង១៩ យប់ថ្ងៃទី២៣ ខែវិច្ឆិកា ឆ្នាំ២០១៥ នៅចំណុចបន្ទប់ផ្ទះជួល លេខ ១៧១៣ ក្នុងក្រុមទី១៧ ភូមិព្រែកតាឡុង២ សង្កាត់ចាក់អង្រែក្រោម មានករណីហិង្សាបង្កឡើង ដោយជនសង្ស័យម្នាក់ ឈ្មោះ មាស រិទ្ធី ហៅ មាស សុធី ទាស់ពាក្យសំដីគ្នាក្នុងវង់ស៊ីផឹក ទាញកូនកាំបិតចុងស្រួចចាក់សំដៅលើជនរងគ្រោះ ផឹកស៊ី ជាមួយគ្នាចំនួន៣នាក់ បណ្តាលឲ្យបុរសម្នាក់ត្រូវជនសង្ស័យ ចាក់មួយកាំបិតចំដើមទ្រូងស្លាប់ ពេលបញ្ជូនទៅ មន្ទីរពេទ្យ និង២នាក់ផ្សេងទៀត ត្រូវចាក់បណ្តាលឲ្យរងរបួសធ្ងន់ធ្ងរ។
ប្រភពព័ត៌មានបន្តថា ដំណើររឿងមុនឈានដល់ការចាក់សម្លាប់គ្នានេះ គឺដំបូងឡើយ ជនរងគ្រោះទាំង ៣នាក់ ដែលទី១ ឈ្មោះ ទូច សំអាង ទី២ ទូច សំអុល ទី៣ ហ៊ឹម មករា កំពុងអង្គុយផឹកស៊ី ក្នុងផ្ទះជួលរបស់ខ្លួន ដែលជាចំណុចកើតហេតុ ។ ខណៈកំពុងអង្គុយហូបចុកសុខៗ ស្រាប់តែឈ្មោះ មាស រិទ្ធី ហៅមាស សុធី ជាជន សង្ស័យ ដែលជាមនុស្សស្គាល់គ្នា ជាមួយម្ចាស់ផ្ទះជួល បានដើរចូលទៅក្នុងហ្វូងហូបចុក ហើយ សុំចូលរួម ផឹកស៊ីជាមួយផង ទាំងរូបគេ និជនរងគ្រោះទាំង៣នាក់ ជាមនុស្សមិនស្គាល់គ្នាពីមុនមកនោះទេ។ លុះហូប មកដល់វេលាម៉ោង១៩និង៤៥នាទី យប់ ពួកគេទាំង៤នាក់ បានទាស់ពាក្យសម្ដីគ្នា អំពីរឿង « តម្លើងប្រាក់ខែឲ្យកម្មករ » រហូតធ្វើ ឲ្យឈ្មោះ មាស សុធី ជាជនសង្ស័យ ខឹងសម្បាងើបឈរឡើងរួចទាញកាំបិតចុងស្រួចចេញពីចង្កេះ ចាក់ទៅលើ ឈ្មោះ ទូច សំអាង ចំឆ្អឹងជំនីពីមុខ បណ្តាលឲ្យរងរបួសធ្ងន់ ។ ភ្លាមនោះឈ្មោះទូច សំអុល និងឈ្មោះហ៊ឹម មករា ក៏បានលោតចូលទៅជួយឈ្មោះ ទូច សំអាង ក៏ត្រូវជនសង្ស័យចាក់ម្នាក់មួយកាំបិតបន្ថែម បណ្តាលឲ្យ រងរបួស ទាំង ២នាក់ទៀត។
ក្រោយហេតុការណ៍នេះ ជនសង្ស័យ បានជិះម៉ូតូម៉ាកអាយខុន ពណ៌ទឹកសមុទ្រ ពាក់ស្លាកលេខ 1w -0168 ជិះរត់គេចខ្លួនបាត់ស្រមោល ។ ប៉ុន្តែរយៈពេលមួយយប់ក្រោយមក នគរបាលបានចាប់ខ្លួនជនសង្ស័យមកវិញ៕
បុរសម្នាក់កាប់គេស្លាប់ម្នាក់ និងរបួសធ្ងន់ពីរនាក់ ប្រឈមជាប់គុក១០ឆ្នាំទៅ២០ឆ្នាំ
0 Comments