ភ្នំពេញ ៖ ក្នុងជំនួបទេ្វភាគីរវាង រដ្ឋមន្ត្រីកសិកម្ម និងអភិវឌ្ឍជនបទនៃសាធារណរដ្ឋសង្គមនិយមវៀតណាមលោក ង្វៀន សួនគឿង កាល ថ្ងៃទី១២ តុលា ដោយបាន ស្នើឲ្យ រដ្ឋាភិបាលវៀតណាមឲ្យមានវិធានការតឹងរ៉ឹងបន្ថែមទៀត ពាក់ព័ន្ធនឹងការនាំអនុផលព្រៃឈើខុសច្បាប់ពីកម្ពុជាចូលទៅលក់នៅប្រទេសវៀតណាម។
ក្នុងជំនួបនោះ លោក វេង សាខុន បានស្នើទៅភាគីវៀតណាម ជួយមានវិធានការបន្ថែមទៀត ពាក់ព័ន្ធនឹងការគ្រប់គ្រងពាណិជ្ជកម្មផល អនុផលព្រៃឈើខុសច្បាប់ និងការនេសាទឆ្លងដែនខុសច្បាប់ ដែលពុំមានការអនុញ្ញាត និងមិនមានរបាយការណ៍ទៅប្រទេសវៀតណាម។ លោក វេង សាខុន ក៏បានលើកឡើងប្រាប់ភាគីវៀតណាមផងដែរថា កម្ពុជាកំពុងតែពង្រឹងប្រសិទ្ធភាពទប់ស្កាត់បទល្មើសព្រៃឈើឆ្លងដែន ដើម្បីឆ្លើយទៅនឹងតម្រូវការរបស់សហភាពអឺរ៉ុប។
ជាមួយ គ្នានេះ លោករដ្ឋមន្ត្រី ក៏បានស្នើឲ្យភាគីវៀតណាមជួយពិនិត្យលទ្ធភាពក្នុងការបង្កើនតម្លៃកៅស៊ូ ដែលប្រមូលទិញពីកម្ពុជា ដើម្បីសម្រួលដល់ជីវភាពកសិករកម្ពុជា។ ចំពោះការចលនាសត្វឆ្លងដែន លោករដ្ឋមន្ត្រី បានស្នើឲ្យភាគីវៀតណាមជួយពង្រឹងការបង្ការ និងទប់ស្កាត់ជំងឺឆ្លងរាតត្បាត ដើម្បីបញ្ចៀសនូវហានិភ័យរវាងប្រទេសទាំងពីរ។ ក្រៅពីនេះ លោករដ្ឋមន្ត្រី ក៏បានស្នើដល់ភាគីវៀតណាម ជួយមានវិធានការតឹងរឹងបន្ថែមទៀតពាក់ព័ន្ធដល់ការគ្រប់គ្រងពាណិជ្ជកម្មផល អនុផលព្រៃឈើខុសច្បាប់ និងការនេសាទឆ្លងដែនខុសច្បាប់ ពុំមានការអនុញ្ញាត និងមិនមានរបាយការណ៍ ព្រោះកម្ពុជាកំពុងស្ថិតក្នុងដំណាក់កាលរៀបចំលិខិតបទដ្ឋាននានា ដែលសមស្របទៅនឹងលក្ខខណ្ឌតម្រូវរបស់សហភាពអ៊ឺរ៉ុប។
ជាការឆ្លើយតប លោក ង្វៀន សួនគឿង សន្យាថានឹងសហការជាមួយវិស័យឯកជនវៀតណាមក្នុងការពិនិត្យមើលនូវលទ្ធភាពក្នុងការប្រមូលទិញកៅស៊ូពីកម្ពុជាក្នុងតម្លៃមួយសមស្រប។ ចំពោះបញ្ហាដំឡូងមី បច្ចុប្បន្នវៀតណាមក៏កំពុងជួបប្រទះនូវបញ្ហាជំងឺឆ្លង ហើយក្រសួងនិងអ្នកជំនាញកំពុងមានវិធានការកំចាត់ចោលនូវប្រភេទជំងឺឆ្លង និងកែលម្អឡើងវិញនូវការខូចខាត និងប្រើប្រាស់ពូជថ្មីដែលមានភាពធន់នឹងជំងឺ ហើយលោក នឹងជំរុញដល់វិស័យឯកជនវៀតណាមបន្តរក្សានូវលំនឹងតម្លៃដំឡូងមីនៅកម្ពុជា។ ចំពោះការនេសាទឆ្លងដែន និងការដឹកជញ្ជូនផល អនុព្រៃឈើឆ្លងដែន ខាងភាគីវៀតណាមកំពុងមានការយកចិត្តទុកដាក់យ៉ាងខ្លាំង ហើយរដ្ឋាភិបាលវៀតណាមបានជំរុញឲ្យមានការដាំព្រៃឈើឡើងវិញជាលក្ខណៈពាណិជ្ជកម្ម និងជួយដល់បរិស្ថាន។ ក្រៅពីកិច្ចការដទៃទៀត ឯកឧត្តម ស្នើឲ្យភាគីទាំងពីររៀបចំក្រុមការងារកម្រិតជំនាញ ដើម្បីបន្តធ្វើការពិភាក្សា និងដោះស្រាយនូវបញ្ហានានាដើម្បីជំរុញកិច្ចសហប្រតិបត្តិការទ្វេភាគី និងពង្រីកនូវទំហំពាណិជ្ជកម្មកសិកម្មរវាងប្រទេសទាំងពីរ។
Source: Kampuchea Thmey Daily
0 Comments