អ្នកប្រដាល់ឡៅ ចិត្រា ក្លិបកងពលតូចទ័ពឆ័ត្រយោង៩១១ បានផ្តួល អ្នកប្រដាល់ថៃ ផេត ង៉ាម វ៉.ស៊ូងនឺន (Phat Ngam Wor.Souneun) ក្នុងទឹកទី១ ហើយឡៅ ចន្ទ្រា អ្នកប្រដាល់ក្លិបកងពលតូចទ័ពឆ័ត្រយោង៩១១ដែរនោះ បានផ្ដួលអ្នកប្រដាល់ថៃគ្រៀង ក្រៃ(Krieng Krai) ឲ្យបោះបង់ចោលការប្រកួតក្នុងទឹកទី កាលពីយប់ថ្ងៃសុក្រ ទី១៨ ខែមករា ឆ្នាំ២០១៩ នៅសង្វៀនបាយ័នស្ទឹងមានជ័យ ។
ឡៅ ចិត្រា បានធ្វើឲ្យ ផេត ង៉ាម វ៉.ស៊ូងនឺន ត្រូវអាជ្ញាកណ្ដាលរាប់៨ នៅក្នុងទឹកទី១ ដោយការទាត់ឲ្យជើងខាងស្តាំរបស់ ផេត ង៉ាម ឈឺ និងដួល ហើយក្រោយងើបបន្តការប្រកួតទៀត ផេត ង៉ាម ក៏ត្រូវចិត្រា ទាត់ជើងឈឺដដែលនោះ ឲ្យដួលមិនអាចក្រោករួច ហើយអាជ្ញាកណ្ដាលក៏បញ្ឈប់លែងឲ្យប្រកួត និងផ្តល់ជ័យជម្នះឲ្យ ឡៅ ចិត្រា ក្នុងទឹកទី១នោះ។
សូមរម្លឹកថា ផេត ង៉ាម វ៉.ស៊ូងនឺន អ្នកប្រដាល់ថៃរូបនេះ គេធ្លាប់មកប្រកួតនៅស្រុកខ្មែរប្រមាណ១-២ ដងហើយ។ អ្នកប្រដាល់ថៃរូបនេះ មានកំណត់ត្រាប្រកួតចំនួន៨៩លើក ឈ្នះ៧៤លើក ចាញ់១៤លើក និងស្មើ០១លើក។ បើធៀបជាមួយ ឡៅ ចិត្រា គឺប្រហាក់ប្រហែលគ្នា ដោយ ចិត្រា គេមានកំណត់ត្រាប្រកួតចំនួន៨០លើក ក្នុងនោះឈ្នះ៧៣លើក ចាញ់០៥លើក និង ស្មើ០២លើក។
ចំពោះ ឡៅ ចន្ទ្រា ដែលត្រូវបានគេផ្តល់ឱកាសឲ្យជួបប្រកួតសាកកណ្ដាប់ដៃជាមួយអ្នកប្រដាល់ជើងខ្លាំងថៃឈ្មោះ គ្រៀង ក្រៃនោះ បានយកឈ្នះគ្រៀង ក្រៃ នៅដើមទឹកទី៥ បន្ទាប់ពីនៅចុងទឹកទី៤ គ្រៀង ក្រៃ ត្រូវឡៅ ចន្ទ្រា វាយកែងត្រូវចំចិញ្ចើមឆ្វេងមួយកែងពេញ ធ្វើឲ្យអ្នកប្រដាល់ថៃរូបនេះ ស្រុតដួលលើរេញ តែក្រោយពីអាជ្ញាកណ្ដាលរាប់ដល់៨ គ្រៀង ក្រៃ គេបន្តការប្រកួតទៀត។ មួយកែងឆ្វេងរបស់ ចន្ទ្រា នេះ បានធ្វើឲ្យគ្រៀង ក្រៃ បែករយះចេញឈាមខ្លាំង និងរំខានដល់ការប្រកួតរបស់គេ ទើបគេសុំបោះបង់ការប្រកួតមុនចូលប្រកួតទឹក៥នោះ។
នៅក្នុងការប្រកួតដែលមានស្ថានភាពប្រយ័ត្នប្រយែងរៀងខ្លួននោះ ឃើញថា ឡៅ ចន្ទ្រា គេមានប្រៀបឈ្នះលើថៃ ដោយគេដេញវាយមុនជានិច្ច។ ចំណែកគ្រៀង ក្រៃ វិញ គេព្យាយាមទាត់កាត់ និងដាល់មកលើចន្ទ្រា ដើម្បីទប់ដំណើរសម្រុករបស់ចន្ទ្រាដែរ ប៉ុន្តែមិនទប់ជាប់នឹងការសម្រុករបស់ចន្ទ្រាបាន ធ្វើឲ្យចន្ទ្រាចូលកៀកចាប់អោប រួចចន្ទ្រាដែលមានកែងរហ័សនោះ បានវាយទៅលើគ្រៀង ក្រៃមួយកែងឆ្វេង ត្រូវបានសម្រេច រហូតដល់បោះបង់ការប្រកួតនេះ។
គួរបញ្ជាក់ថា គ្រៀង ក្រៃ គេជាជើងខ្លាំងជើងចាស់នៅស្រុកថៃ និងធ្លាប់ឈ្នះខ្សែក្រវាត់នៅស្រុកខ្មែរម្តងហើយកាលពីពេលកន្លងមក។ គ្រៀង ក្រៃនេះ មិនធម្មតាទេ ដោយគេមានស្នៀតប្រដាល់ល្អ វាយចេញចូលរហ័ស កម្លាំងស៊ុហ្វខ្លាំង រឹងមាំ មិនងាយស្រួលនឹងបង្ក្រាបនោះទេ ប៉ុន្តែពេលនេះ ត្រូវ ឡៅ ចន្ទ្រា ដែលមានប្រវត្តិប្រកួត១០៣ប្រកួត ផ្តួលឲ្យចុះចាញ់ក្នុងទឹកទី៥។
ចំណែក ការប្រកួតរវាងខ្មែរ និងខ្មែរវិញ នួន រ៉ាថេប អ្នកប្រដាល់ក្លិបតាឯកដំបងដែកមានរិទ្ធ បានវាយឈ្នះ ឡេង ម៉ៅ អ្នកប្រដាល់ក្លិបម៉ៃទី ក្រាំងយ៉ូវ ក្នុងទឹកទី៤ ហើយ ឯម ដារ៉ូ អ្នកប្រដាល់ក្លិប ថ្មគោលពោធិ៍សែនជ័យ ក៏ផ្ដួល ឡុង សំណាង អ្នកប្រដាល់ក្លិបវិបុលដារិទ្ធ ឲ្យចុះចាញ់ក្នុងទឹកទី៤ ដែរ៕
Source: Kampuchea Thmey Daily
0 Comments