ភ្នំពេញ ៖ យុវជនម្នាក់ជិះម៉ូតូមិនប្រុងប្រយ័ត្ន ក៏ជ្រុលបុករថយន្ត បណ្ដាលឲ្យ រងរបួសខ្លួនឯងបាក់ដៃស្ដាំនិងបែកថ្ងាស យ៉ាងធ្ងន់ធ្ងរកាលពីវេលាម៉ោង០២និង៥០នាទីរសៀលថ្ងៃទី២៦ ខែវិច្ឆិកា ឆ្នាំ២០១៥ ស្ថិតនៅចំណុចមុខតុលាការកំពូល តាមមហាវិថីសម្ដេចសុធារស កែងនិងវិថី ឧកញ៉ា ឈុន ក្នុងសង្កាត់ជ័យជំនះ ខណ្ឌដូនពេញ។
សមត្ថកិច្ចមូលដ្ឋានបានឲ្យដឹងថា នៅមុនពេលកើត ឃើញមានយុវជនម្នាក់ជិះម៉ូតូម៉ាកស្ទេព ពណ៌ខ្មៅ គ្មានស្លាកលេខ ធ្វើដំណើរតាមបណ្ដោយមហាវិថីសម្ដេចសុធារស ក្នុងទិសដៅពីត្បូងទៅជើងយ៉ាងលឿនខណៈនោះ មានរថយន្ត១គ្រឿងម៉ាកសាំយុងធ្វើដំណើរតាមវិថី ឧកញ៉ា ឈុន ក្នុងទិសដៅពីលិចទៅកើត ពេលមកដល់ចំណុចមុខអតីតតុលាការកំពូល ស្រាប់តែយុវជនជិះម៉ូតូបានទៅបុករថយន្តសាំយុងយ៉ាងពេញទំហឹង បណ្ដាលឲ្យយុវជននោះរងរបួសបាក់ដៃស្ដាំនិងបែកថ្ងាស យ៉ាងធ្ងន់ធ្ងរតែម្ដង។
ក្រោយពេលហេតុសមត្ថកិច្ចចរាចរណ៍បានចុះមកដល់កន្លែងកើតហេតុភ្លាមៗ ធ្វើការវាស់វែង។ចំណែកជនរងគ្រោះត្រូវបានសមត្ថកិច្ចហៅរថយន្តសង្គ្រោះបន្ទាន់ដឹកទៅព្យាបាលនៅមន្ទីរពេទ្យ។
បច្ចុប្បន្នរថយន្តរួមទាំងម៉ូតូរបស់ជនរងគ្រោះត្រូវបានសមត្ថកិច្ចនាំយកទៅរក្សាទុក ដើម្បីដោះស្រាយតាមនីតិវិធី៕
យុវជនម្នាក់ជិះម៉ូតូលឿន មិនប្រយ័ត្នជ្រុលបុករថយន្ត រងរបួសធ្ងន់ធ្ងរខ្លួនឯង
0 Comments