កំពង់ឆ្នាំង ៖ ស្ត្រីម្នាក់បានយកក្រមាចង.កសម្លាប់ខ្លួននឹងមែកឈើក្បែរគុម្ពឫស្សី រហូតសពមានសភាពស្អុយរលួយ បន្ទាប់ពីបានបាត់ខ្លួនពីផ្ទះអស់រយៈពេល៣ថ្ងៃ ទើបក្រុមគ្រួសារបានរកឃើញនៅម៉ោង២និង១៥នាទីរសៀលថ្ងៃទី២៥ ខែវិច្ឆិកា ឆ្នាំ២០១៥ នៅភូមិស្រាងខ្ពស់ ឃុំពង្រ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានបានឲ្យដឹងថា សពស្ត្រីរូបនេះមាន ឈ្មោះ កែវ សារិន អាយុ៦០ឆ្នាំ រស់នៅភូមិអណ្ដូងពោធិ៍ ឃុំពង្រ ស្រុករលាប្អៀរ ខេត្តកំពង់ឆ្នាំង។ កាលពីថ្ងៃទី២១ ខែវិច្ឆិកា ឆ្នាំ២០១៥ ស្ត្រីរូបនេះបានមកលេងបងប្អូនគាត់នៅភូមិស្រាងខ្ពស់ ឃុំពង្រ ស្រុកលាប្អៀរ លុះដល់ថ្ងៃទី២៣ ខែវិច្ឆិកានៅវេលាម៉ោង៤ល្ងាចស្ត្រីរូបនេះបានចេញបាត់ពីផ្ទះបងប្អូន នៅពេលនោះបងប្អូនបាននាំគ្នាដើររកដែរ តែរកមិនឃើញឡើយ។
លុះដល់ថ្ងៃទី២៥ ខែវិច្ឆិកា ឆ្នាំ២០១៥ នៅវេលាម៉ោង២និង១៥នាទីរសៀល មានក្មួយស្រីម្នាក់របស់សពស្ត្រីរូបនោះបានទៅមើលទា ហើយពេលដេញទាចុះទឹក គឺនៅក្បែរគុម្ពឫស្សីនោះ ក៏ស្រាប់តែមានធុំក្លិនស្អុយ ពេលនាងបានដើររកមើលក៏បានប្រទះឃើញសពស្ត្រីរូបនេះចង.កសម្លាប់ខ្លួន ដោយយកក្រមាចង.កទៅនឹងមែកឈើក្បែរដើមឫស្សី ហើយនាងក៏បានរត់ទៅប្រាប់អ្នកផ្ទះឲ្យមកមើល និងបានរាយការណ៍ជូនសមត្ថកិច្ចនគរបាលមូលដ្ឋាន ដើម្បីមកធ្វើការពិនិត្យសាកសពនៅកន្លែងកើតហេតុ។
ក្រោយពីសមត្ថកិច្ចពិនិត្យសាកសពរួចមកបានសន្និដ្ឋានឲ្យដឹងថា ស្ត្រីរូបនេះ ពិតជាបានចង.កសម្លាប់ខ្លួនឯងពិតប្រាកដមែន ដោយសារតែតូចចិត្តនឹងមានជំងឺប្រចាំកាយក្រីក្រគ្មានលទ្ធភាពព្យាបាល។
បន្ទាប់មកសមត្ថកិច្ចក៏បានប្រគល់សពជូនក្រុមគ្រួសារគាត់ ដើម្បីយកទៅធ្វើបុណ្យទានតាមប្រពៃណីនៅក្នុងមូលដ្ឋាន៕
ស្ត្រីម្នាក់បាត់ពីផ្ទះ៣ថ្ងៃ ប្រទះឃើញស្លាប់ស្អុយរលួយនៅលើដើមឈើ
0 Comments