ឧត្ដរមានជ័យ ៖ យ៉ាងហោចណាស់មានមនុស្សប្រុស/ស្រី២នាក់បានរងរបួសធ្ងន់ដោយសារគ្រោះថ្នាក់ចរាចរណ៍ម៉ូតូបុកជាមួយគោយន្តកន្ត្រៃ ខណៈធ្វើដំណើរតាមដងផ្លូវកាលពីវេលាម៉ោង១៩និង១០នាទីយប់ ថ្ងៃទី០៣ ខែវិច្ឆិកា ឆ្នាំ២០១៥ ស្ថិតក្នុងភូមិអូរស្រឡៅ ឃុំថ្លាត ស្រុកអន្លង់វែង ខេត្តឧត្តរមានជ័យ។
ជនរងគ្រោះក្នុងហេតុការណ៍គ្រោះថ្នាក់ចរាចរណ៍នោះត្រូវបានគេស្គាល់ ១/ឈ្មោះ ញាត ផល្លា ភេទស្រី អាយុ១៧ឆ្នាំ រស់នៅក្នុងភូមិ/ឃុំកើតហេតុខាងលើ បើកបរម៉ូតូម៉ាកឌ្រីម ពណ៌ខ្មៅ ស៊េរី២០១៣ ពាក់ស្លាកលេខ ឧ.មានជ័យ 1B:0077 រងរបួសបែកក្បាលធ្ងន់ធ្ងរ។ ២/ឈ្មោះ ចម វាសនា ភេទប្រុស អាយុ១៨ឆ្នាំ រស់នៅភូមិប្រលាន ឃុំ/ស្រុកអន្លង់វែង រងរបួសធ្ងន់បែកអង្គញ់ជើងឆ្វេង។ ជនរងគ្រោះទាំង២នាក់ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យខេត្តសៀមរាប។
រីឯអ្នកបើកបរគោយន្តឈ្មោះ ប៉ាន់ ឈួក ភេទប្រុស អាយុ១៩ឆ្នាំ រស់នៅភូមិប្រលាន ដៃគោយន្តបោកក្បាលបណ្ដាលឲ្យសន្លប់ និងមនុស្ស១០នាក់ផ្សេងទៀតគ្មានរបួស។
ជុំករណីនេះ លោក ហាស់ ហេង អធិការរងផ្នែកសណ្ដាប់ធ្នាប់ស្រុកអន្លង់វែងបានឲ្យដឹងថា មុនពេលកើតហេតុគេបានឃើញគោយន្តកន្ត្រៃមួយគ្រឿងបើកតាមបណ្ដោយផ្លូវក្នុងភូមិអូរស្រឡៅដោយគ្មានភ្លើងបំភ្លឺ ឬចំណាំផ្លាត ទើបធ្វើឲ្យម៉ូតូជនរងគ្រោះបុកពេញទំហឹង បង្កឲ្យរងរបួសធ្ងន់-ស្រាលដូចនេះ។
ក្រោយកើតហេតុ ជនរងគ្រោះត្រូវបានគេបញ្ជូនទៅមន្ទីរពេទ្យ ហើយម៉ូតូនិងគោយន្ត ត្រូវបាននគរបាលនាំយកទៅរក្សាទុកដើម្បីដោះស្រាយគ្នាតាមច្បាប់៕
ជិះម៉ូតូបុកគោយន្តកន្ត្រៃ របួសធ្ងន់២នាក់
0 Comments