ភ្នំពេញ ៖ នៅម៉ោង៨ និង ០០នាទី ថ្ងៃទី២២ វិច្ឆិកានេះ ពិធីបង្សុកូលឧទ្ទិសកុសលដល់ជនរង គ្រោះដែលបានបាត់បង់ជីវិតក្នុងឧបទ្ទវហេតុរត់ជាន់គ្នាលើស្ពានពេជ្រគំរប់ខូប៥ឆ្នាំបាននឹងកំពុងធ្វើឡើងនៅស្តុបមជ្ឈមណ្ឌលសន្និបាតនិងពិព័រណ៍កោះពេជ្រ ដោយបាននិមន្តព្រះសង្ឃចំនួន១០៨អង្គរាប់បាត្រទៅតាមទំនៀមទម្លាប់ប្រពៃណី ព្រះពុទ្ធសាសនា ដែលពិធីនេះរៀបចំដោយសាលារាជធានីភ្នំពេញ។
ពិធីនេះត្រូវបានធ្វើឡើងនៅស្តូបរំលឹកវិញ្ញាណក្ខន្ធ ជនរងគ្រោះស្ថិតនៅ ជាប់ស្ពាននាគនៃតំបន់កោះពេជ្រជាទីដែលជនរងគ្រោះបានបាត់បង់ជីវិត កាលពី៥ឆ្នាំមុនក្នុងឧបទ្ទវហេតុរត់ជាន់គ្នាកាលពីថ្ងៃទី២២ វិច្ឆិកាឆ្នាំ២០១០ កន្លងទៅ។ អញ្ជើញចូលរួមនាឱកាសនោះរួមមានលោកប៉ា សុជាតិវង្ស អភិបាល នៃគណៈអភិបាលរាជធានីភ្នំពេញ និងលោកជំទាវលោកម៉ប់ សារិន ប្រធាន ក្រុមប្រឹក្សារាជធានីភ្នំពេញ,មន្ត្រីរាជការ,អាជ្ញាធរដែនដី,សាច់ញាតិ ក្រុមគ្រួសារ របស់ជនរងគ្រោះ និងប្រជាពលរដ្ឋបានចូលរួមជាច្រើនរយនាក់។
នេះជាពិធី តាមបែបសាសនាសុទ្ធសាធ ដើម្បីឧទ្ទិសកុសលជូនដួងវិញ្ញាណក្ខន្ធជូនជនរង គ្រោះនៅលើស្ពានកោះពេជ្រ និងសូមបួងសួងឲ្យដួងវិញ្ញាណក្ខន្ធអ្នកដែលបាន លាចាកលោកទៅនោះ សូមបានទៅកាន់សុគតិភពកុំបីឃ្លៀងឃ្លាតឡើយ។ ម្យ៉ាងទៀតក៏បានបង្ហាញ ឲ្យឃើញពីមនោសញ្ចេតនាសោកស្តាយ អាឡោះអាល័យយ៉ាងក្រៃលែង ជាមួយក្រុមគ្រួសារនៃជនរងគ្រោះចំពោះការបាត់បង់ សមាជិកគ្រួសារក្នុងហេតុការដ៏សោកសង្រេងកាលពី៥ឆ្នាំមុន៕
និមន្តព្រះសង្ឃចំនួន១០៨អង្គរាប់បាត្របង្សុកូលឧទ្ទិសកុសលដល់ ជនរងគ្រោះដែលស្លាប់ដោយរត់ជាន់គ្នានៅកោះពេជ្រគម្រប់ខួប៥ឆ្នាំ
0 Comments