ស្វាយរៀង ៖ ក្រុមចោរប្លន់ប្រដាប់អាវុធចំនួន៤នាក់ បានបើករថយន្តកាមរីឆ្លាម ពណ៌ខ្មៅមួយគ្រឿង ទៅធ្វើសកម្មភាពបាញ់ប្លន់ ប៉ងយកទ្រព្យសម្បត្តិ ពីផ្ទះលក់ថ្នាំពេទ្យ និងរកស៊ីលក់ទិញដី ស្ថិតនៅកណ្តាលក្រុងស្វាយរៀង ក្នុងភូមិចុងព្រែក សង្កាត់ស្វាយរៀងខេត្តស្វាយរៀង នាម៉ោង១៨និង៥៩នទីព្រលប់ៗថ្ងៃទី២១ ខែវិច្ឆិកា ឆ្នាំ២០១៥។
មន្ត្រីនគរបាលមូលដ្ឋានក្រុងស្វាយរៀង បានឲ្យដឹងថា មុនពេលកើតហេតុជនសង្ស័យបានបើករថយន្ត ទៅឈប់នៅមុខផ្ទះជនរងគ្រោះ រួចបក្ខពួក៣នាក់ បានចុះពីរថយន្តចូលទៅទិញថ្នាំពេទ្យ ស្រាប់តែកំពុងឈរទិញនោះ ជនសង្ស័យបានដកកាំភ្លើង ទៅភ្ជង់ជនរងគ្រោះជាប្តី ពេលនោះជនរងគ្រោះ មានការប្រតាយប្រតប់ បានបង្ខំឲ្យក្រុមចោរបាញ់មួយគ្រាប់ត្រូវចំស្មា និងផ្លាតទៅត្រូវជើង កូនប្រុស អាយុ៦ឆ្នាំ នៅពីក្រោយផងដែរ។
ក្រោយមានការភ្ញាក់ផ្អើលហើយ ក្រុមចោរប្លន់២នាក់ បានបើករថយន្តចេញពីកន្លែងកើតហេតុ ខណៈ២នាក់ទៀត បានរត់គេចខ្លួនតែម្តង។
មន្ត្រីនគរបាលបានបញ្ជាក់ថា ជនរងគ្រោះជាឪពុកឈ្មោះ ឈួរ សុម៉ាលី អាយុ៤៧ឆ្នាំរបួសស្មាឆ្វេង និង កូនប្រុស ឈ្មោះ ឈួរ ម៉ាលីរតនៈ អាយុ៦ឆ្នាំ របួសកែងជើងខាងស្តាំ។
កម្លាំងសមត្ថកិច្ចជាច្រើននាក់នគរបាល និងអាវុធហត្ថ បានចុះទៅជួយអន្តរាគមន៍ និងធ្វើការសួរនាំជនរងគ្រោះដើម្បីតាមស្រាវជ្រាវ ចាប់ក្រុមចោរប្លន់ទាំងនោះ។បច្ចុប្បន្នសមត្ថកិច្ចកំពុងដុតដៃដុតជើងធ្វើការស្រាវជ្រាវរកមុខសញ្ញាយកមកផ្ដន្ទាទោសតាមច្បាប់៕
ក្រុមចោរប្លន់ប្រដាប់អាវុធចូលបាញ់ប្លន់ព្រលប់ៗផ្អើលពេញក្រុងស្វាយរៀង
0 Comments