ភ្នំពេញ ៖ ពិធីអាពាហ៍ពិពាហ៍កូនស្រីរបស់តារាកំប្លែងជើងចាស់ល្បីឈ្មោះនៅកម្ពុជានាយ កុយ ដែលរៀបធ្វើឡើងនៅរាជធានីភ្នំពេញកាលពីរាត្រីយប់ថ្ងៃទី០២ ខែវិច្ឆិកា ឆ្នាំ២០១៥បានប្រព្រឹត្តទៅយ៉ាងអធិកអធមដោយមានការចូលរួមពីសំណាក់សាច់ញាតិទាំងសងខាងនិងសិល្បករ-សិល្បការិនីល្បីៗរបស់ខ្មែរជាច្រើនដួងផងដែរ។
តាមរយៈការបង្ហោះរូបថតជាច្រើនសន្លឹកដែលបង្ហាញឲ្យឃើញពីសកម្មភាពនៃការរៀបមង្គលការរបស់កូនស្រីតារាកំប្លែងនាយ កុយ នោះគេសង្កេតឃើញមានវត្តមានរបស់តារាសម្ដែង និងចម្រៀងស្រី-ប្រុសល្បីៗឈ្មោះជាច្រើនដួងមកពីផលិតកម្មផ្សេងគ្នាក៏បានអញ្ជើញចូលរួមយ៉ាងច្រើនកុះករបង្កឲ្យមានបរិយាកាសសប្បាយរីករាយយ៉ាងខ្លាំងនៅក្នុងកម្មវិធីមួយនេះ។
ចំពោះវត្តមានភ្ញៀវសិល្បករស្រី – ប្រុសដែលបានបង្ហាញវត្តមានទៅចូលរួមជាភ្ញៀវកិត្តិយសនៅក្នុងពិធីរៀបអាពាហ៍ពិពាហ៍របស់កូនស្រីតារាកំប្លែងនាយកុយដែលកូនក្រមុំមានឈ្មោះ ជី លីកា គូជាមួយកូនកំលោះឈ្មោះ អ៊ឹម លីគង់ កាលពីររាត្រីយប់ថ្ងៃទី០២ ខែវិច្ឆិកា កន្លងទៅថ្មីៗនេះមានដូចជាកំពូលតារាចម្រៀងប្រុសរបស់ផលិតកម្មហង្សមាសលោកព្រាប សុវត្ថិ ,កញ្ញា ឱក សុគន្ធកញ្ញា ,អ្នកនាង យុគ ចិន្តា ,កញ្ញា ដួង ហ្សូរីដា លោក ខេមរៈ សិរីមន្ត និងពិធីករលោក ជា វណ្ណារិទ្ធ ព្រមទាំងតារាស្រី-ប្រុសជាច្រើនដួងផ្សេងទៀត។
ពិធីអាពាហ៍ពិពាហ៍ដែលរៀបចំឡើងប្រកបដោយទឹកមុខរំភើបរីករាយពីបណ្ដាភ្ញៀវកិត្តិយសដែលបានចូលរួមក្នុងនោះតារាកំប្លែងនាយ កុយ ដែលត្រូវជាលោកឪពុកខាងកូនស្រីក៏ហាក់បង្ហាញពីទឹកមុខញញឹមត្រេកអរបិទមាត់មិនជិត ព្រោះទទួលបានការផ្តល់កិត្តិយសអញ្ជើញចូលរួមពីសំណាក់កំពូលតារាចម្រៀងល្បីៗជាច្រើនក្នុងពិធីប្រារព្ធមង្គលការកាត់ចំណងដៃកូនប្រុស-ស្រីពេលនេះ។
តារាកំប្លែងនាយ កុយ នៅព្រឹកថ្ងៃទី០៣ ខែវិច្ឆិកា ឆ្នាំ២០១៥មិនអាចទំនាក់ទំនងដើម្បីសុំការសួរនាំបន្ថែមបានទេ ខណៈលេខទូរស័ព្ទរបស់លោកពេលតេចូលច្រើនដងត្រូវបានចុចផ្ដាច់ការទំនាក់ទំនងទៅវិញ។ ដោយឡែកបើសង្កេតមើលនៅលើបណ្ដាញសង្គមហ្វេសប៊ុករបស់តារាដែលបានទៅចូលរួមពិធីមង្គលការនេះបានសរសេរជាមួយនឹងការបង្ហោះរូបភាពថា រីករាយថ្ងៃសិរីសួស្តីជ័យមង្គលរបស់កូនពូ កុយ សូមជូនពរគូរស្វាមីភរិយាថ្មីស្រលាញ់គ្នាជារៀងរហូតដល់ចាស់កោងខ្នង…. ៕
មង្គលការកូនស្រីតារាកំប្លែងនាយ កុយ មានវត្តមានភ្ញៀវសិល្បៈល្បីៗជាច្រើនចូលរួម
0 Comments